كنت في حفلة تخريج مجموعة من الدارسين في شهادة (ما)..وطبعا كان حاضر عدد من المسؤلين والشخصيات الهامة ، وكمان كان فيه ضيف اجنبي مسئول عن التعليم في احدى الدول الاوربية وقاعد معاهم على المنصة..
طبعا انا بصفتي من المهمين (‘;’) كنت قاعد في الصف الاول .
المهم انه تفكيري " التيت " كالمعتاد صمم انه يتابع ادق التفاصيل..
ولحظات السعادة والفرح على وشوش الناس.
وفجأة جه في دماغي فكرة..اني اتابع الناس اللي المفروض انها بترسم الابتسامة على وشوش الناس دي وهي هيئة تسليم الشهادات..
طبعا لحظة تسليم الشهادة فيها طرفين.. طرف بيسلم الشهادة وده بيكرر الفعل ده مع اكتر من واحد..
وطرف بيتسلم الشهادة ودي بتحصل معاه لمرة واحدة بس..!!
قررت اتابع تعبيرات الوشوش بتاعت الطرفين واشوف خيالي وتفكيري ها يوديني لفين.
المهم..لقيت اللي بيسلم الشهادة بدأ يشعر بالرتابة والملل وكان بيسلم على الناس بنفس الـــ (آلـية) اللي بأكرهها جدا...
ومش عارف انه اللحظة دي قد ايه مميزة في حياة الطرف الاخر اللي بيتسلم الشهادة...!!
والصورة اللي بياخدها في اللحظة دي ممكن تكون هي الصورة الوحيدة اللي ها تفضل تفكره بالذكرى دي.
واللي استغربت له اكتر من متابعتي انه الضيف الاجنبي واللي بيسلم على الناس كا بروتوكول من ضمن الهيئة (ولو انه مش بيعرف اللغة العربية ولا فاهم معنى الاسماء اللي بتتنطق)
الا انه كل مرة...فعلا كل مرة...بيجي حد يستلم الشهادة ويسلم على اللجنة والمسؤلين اللي بيسلموا بسرعة وبوشوش خشبية...لما ييجي دور انه يسلم علي الضيف الاجنبي يلاقيه بيقابله بحفاوة وطريقة راقية جدا...مع ابتسامة مختلفة في كل مرة وكأنه بيقول (الابتسامة دي مش زي اللي فاتت عشان اللي فاتت بتعبر عن حاجة والابتسامة ده بتعبر عن سعادتي بيك انت)
ولحد آخر دارس...فضل الضيف يرسم تعبيرات مختلفة وحلوة...وطبعا انا تخيلته بيقول كل مرة تعبير ما..
الدروس المستفادة:
بجد..بيفرق كتير الاهتمام بالآخر..وتخصيص ولو لحظة واحدة من اجله (هو).
ولحد آخر دارس...فضل الضيف يرسم تعبيرات مختلفة وحلوة...وطبعا انا تخيلته بيقول كل مرة تعبير ما..
الدروس المستفادة:
بجد..بيفرق كتير الاهتمام بالآخر..وتخصيص ولو لحظة واحدة من اجله (هو).
كلمة حلوة قريتها زمان وعلقت بذهني:
(أقسى من القسوة على الناس..ان لا تبالي بمشاعرهم)
(أقسى من القسوة على الناس..ان لا تبالي بمشاعرهم)
.
.
...............................اعتذار عن التأخير........................
((بكرة برجع بوقف معكن..
اذا مش بكرة..
البعده أكيد..
انتوا احكوني وانا بسمعكم..
حتى لو للصوت بعيد..
حتى..
لو..
للصوت..بعييييد..))
......................................صوت الملائكة.............
((بكرة برجع بوقف معكن..
اذا مش بكرة..
البعده أكيد..
انتوا احكوني وانا بسمعكم..
حتى لو للصوت بعيد..
حتى..
لو..
للصوت..بعييييد..))
......................................صوت الملائكة.............
هناك 80 تعليقًا:
نقول ايه....اذا كان رب البيت بالدف ضارب....هو سيستم...ومنساش ابدا تعبيرات الرئيس وقت تكريم اهالى الضياط الشهداء!
لحظات التكريم يا تيمو ممتنسيش....خصوصا لو فى تعليق مع ابتسامة حلوة...تفضل معانا لحد ما حياتنا تنتهى...حتى ولو كنا بنعانى من ضعف شديد فى الذاكرة...
سيبك انت اهم حاجة كنت قاعد فى الصف الأول....شوفت كل حاجة؟!
اه نسيت....انت بتختار فيروز صح على فكرة!
احساسك عالى بجد
هى فعلا لحظات من اهم وامتع اللحظات
قريت انا حاجه بئا من قبل بتقول
قد يغفر المرء القسوه والظلم .. ولكنه لا يغفر عدم المبالاه به ( جان جاك روسو )
بس حضرتك من الاخر عايز توصل ان الراجل الاجنبى ده طلع حساس عن الاخرين الا هما المصرين
بص هقلك لما تلاقى الناس منفضه ليك ومش مهتمه بيك ولا بنجاحك يبقا انتا اكيد اكيد فى مصر
تحياتى الكبيره
ملاحظاتك جميلة اوى يا تيموو
الروتين والآلية هما اللى عاملين كده فينا
الدروس المستفادة:
بجد..بيفرق كتير الاهتمام بالآخر..وتخصيص ولو لحظة واحدة من اجله (هو).
صح جدااا
وهقولك صدقنى ان الناس اللى بتحس بس هى اللى بتحس بغيرها
لكن فاقد الاحساس مستحيل
لان فاقد الشىء لا يعطيه ابداااا
تحية ليك يا تيموو
اها نسيت اقولك
جميلة اوى موسيقى البلوج
احترم جدا فيك الاهتمام بتفاصيل الاشياء فهي صفه تدل علي الدقه والتفاني في العمل
وايضا دليل علي رقه الاحساس (أصل انا كده برضه هههههههه شفت التواضع)
تحياتي ...
اصلك مش عادى فبتشوف الغير عادى
جميل احساسك وتأملاتك وليدة اللحظة بس انا بفهم انك احترمت مشاعرنا لانك بتصبرنا على تأخيرك علينا
الاجنبى طبعا فاهم لغة الجسد لانها مهمة جدا فى التعامل لكن ثقافتنا تعررف لغة الشباشب ولمؤاخذة
جميلة كلمات الاغنية بس فيييييييين الرابط برضه ياتيموووووووووووووووو(:
السلام عليكم ورحمة الله وبركاتة
حلو اوى اننا نهتم بلحظات مميزة لناس غيرنا علشان نقراء تعبيرتهم فى المواقف المميزة دية ..ووحش اوى اننا نلاقى فى لحظاتنا المميزة دية ناس مش مهتمة ومش حاسة بيناوبتتعامل معانابالية وروتين...انا بردوك بحب اتابع اللحظات دية بس مش فى تسليم الشهادات بس فى تلبيس الدبل بحب اتابع ملامح العريس والعروسةهههههههه بس انا عندى ملاحظة اخيرة علشان مكونش رغيت كتير (المصريين اكتر شعب بيحس ..بس جايز مبيعرفش يعبر عن احساسة دة )
To know How & when to appreciate the feelings of others....It is a value that is not available for every body , yet those who are gifted with it are very special
Nice Post
it reminds me of a song for Dalida called
Little words
http://www.youtube.com/watch?v=-OCLr96HteE
Enjoy the Song
Baskouta
كالعادة متميز جدا يا تيمو
فعلا الكلام ده بيحصل
بس ممكن جوة نفس اللجنة اللي بتسلم الشهادات دي....واحد راسم ابتسامة خشبية وواحد زي الضيف الأجنبي ده
ده بيعتمد على الأشخاص نفسهم
وشخصياتهم وطريقة تعاملهم مع الناس
كل ده بينعكس على سلامهم وترحيبهم
متبقاش تغيب علينا بقى :)
اغنية فيروز المختارة روعة أحبها جدا كلمتها رغم انها لمفارق لكنها مليئة بالاشراق والتفاؤل والامل
بالنبة لموضوع التدوينة الامر في الواقع لا علاقة له لا بالوطني ولا بالاجنبي الموضوع موضوع وعي وتربية وطريقة في التعامل في الحياة بالمجمل مختزلة في هذه اللحظات القصيرة
فعلا
"أقسى من القسوة على الناس..ان لا تبالي بمشاعرهم" عندما تأملت هذه الجملة وجدتها فعلا حقيقية الى ابعد الحدود وهذه القناعة ستجعلني افكر دائما اكثر من مرة في مشاعر من امامي
دمت بكل الود
فعلاً أنه يكون في لظظة نقدمها للغير نشاركهم فيها فرحتهم
او حزنهم إحسآآس القلب الواحــد إحسآآس أنه في تقدير لمشاعرهم أنه في إهتما م
شيء يمكن له ناتج إيجابي جداً على الآخر وعلى الشخص نفسه كمان
وبشكل عام أنا بحس أنه تقدير المشاعر الإنسانية للغير مهما كانت درجة صلته بينا بعيدة إلا إنه بيعمل نوع من الود والمحبة والتقدير بين النااس
ياريت كل حد مبيخلش بلحظة إهتمام بمشاعر الغير
دايماً بوستات معبرة بحس فيها القلم له صوت بيخرج عن حدود الكلام عشان يوصل جوانا
متابعة من فترة
ودي وإحترامـــي
هنآآآآآآآ
السلام عليكم ورحمه الله وبركاته
هنقول ايه دي عاده الشعب المصري والا هيشتريها ملل وبرود فكل حاجه
وعادي ممكن يكون الي بيسلم الشهاده من الزهق مبوز وكومنت ع وشه كفايه بقي والصوره تطلع بايظه
مع ان المفروض الشخص ده بيتمثل فيه الفرح والسعاده بمجهودهم
الجمله الاخيره تحفه لان اكتر شئ شيفاه مكروه عدم التقدير والاهتمام واصعب شئ التجاهل بيجرحني جامد
دومت بخير
مبدئيا يا أخ تيمو
سورى جدا عشان التعليق المتأخر سوى عندى أو عندك بس ده لأن بنى أدمة مشغولة و على نفس الدرجة من الأهمية بتاعتك دى ( احم احم ) ههههههههه
أنت لن تتخيل أنا فرحت قد ايه بالبوست ده
عشان لقيت حد لاسع زيى بيحب يتفرج على شكل تعبيرات الناس
بس مش بيعملك مشاكل الموضوع ده ؟؟
عملى قبل كده فى بوست قديم عندى لو عندك وقت ابقى شوفوا اسمه ساعة لقلوب غيرك
تقريبا فى حاجة شبه دى ...
منورة أنا
vision:
يعني لو التعليق والابتسامة الحلوة مش من Camera girl يبقى من مين يعني يا ميرو..؟؟ (';')
وبعدين خدي بالك من حكاية ضعف شديد في الذاكرة لانك كده بتتكلمي عن ميرو (وش خبيث) :)
داليـا:
قد يغفر المرء القسوه والظلم .. ولكنه لا يغفر عدم المبالاه به ( جان جاك روسو )
اللله.. حلوة قوي ومعبرة كمان.
Ms Venus:
طيب تتخيلي فاقد الاحساس ده واحنا مجبرين نتعامل معاه في لحظة مهمة قوي في حياتنا بالشكل ده..؟؟!!
الآلية دي انا من كتر ما بقيت اشوفها في كل حتة كتبت موضوعات كتير عنها..!!
Ms Venus:
آآآآ...
........
نسيت اقولك..
جميل قوي تعليقك (';')
البنفسج الحزين:
للاسف دي بقت طباع يتوارثها الناس ..!!
وبعدين لو انت كمان كده طيب ما تيجي نعمل حملة ضد الآلية دي :)
مي:
ميوووويه :)
والله التأخير مش بإيدي وبعدين انا كمان مودي شوية ومش بحب اكتب الا لما اكون حاسس باللي باكتبه :)
وبعدين فيه اجمل من فيروز ايه اصالحك بيه..؟؟ :D
سمسمة الاسكندرية:
احييكي على كلماتك يا سمسمة لانك قلتي الخلاصة بجد
"احنا اكتر شعب بنحس لكننا فقدنا القدرة على التعبير عن احساسنا"
علي فكرة طول عمري بهتم بطريقة تفكير الناس
عاجبني النظرة المختلفة في تفكيرك
تقبل مروري
صباح الخير والورد والسكر يا مدونتى الجميلة وصديقى الأجمل
:)
أولا وقبل كل شىء أنا بعتذر عن الغياب الغيبوبى دة وحشتونى ووحشتنى المدونة الجميلة دى بجد
بلوجر كان كارهنى ومخاصمنى ومش عاوزنى اهىء ومش بيدخلنى بقاله اسبوع
بس على مين أنا طموحة بردوه :D
....................
بجد..بيفرق كتير الاهتمام بالآخر..وتخصيص ولو لحظة واحدة من اجله (هو).
متعرفش أد ايه الجملة دى معبرة
احنا بجد محتاجين أوى نحس بعض مش نحس ببعض
وهى تفرق كتير من انك تحس بيا او تحسنى
محتاجين ندى دايما احساس للاخر انه بيمثل كيان له قيمته فى حياتنا لان دة مهم أوى
بجد احساسك كما تعودته عالى جداااااااا
وبيأثر فيا ببساطة ونفاذ شديد جدا
وخد منى الياسمينة دى بقى هدية :)
وعلى فكرة....
حبيت الموسيقى الرقيقة دى جدااااااا
تيمو يا تيمووووووو
ازيك
اخبارك ايه
انا بعتذر جدا جدا على التأخير
وميرسي خالص خالص لسؤالك عليا
.............
بصراحة يا تيمو انت بجد مميز
بتهتم بحاجات صعب حد ياخد باله منها
تعرف انى من الناس اللى بجد بيفرق اوى موقف زى اللى ذكرته دا
يعنى لو حتى بشترى حاجة اى مكان بيفرق معايا اوى ابتسامة او معامله بلطف من البائع او البائعة
بهتم اوى بالتفاصيل دى
الراجل الاجنبي اللى كان بيسلم الشهادات دا حد فاهم اوى ان دى لحظة مميزة في حياة كل واحد منهم
فرق بين انها بالنسبة للى بيستلم الشهادة فرجة ومحطة في حياتة سعيدة عاوز يحسها ويسعد بيها
وبين انها مهمة ثقيلة وشغل وواجب وخلاص بالنسبة للى بيسلم الشهادات
كالعادة دايما يا تيمو تغيب كتير وترجع ببوست مختلف تغوض به في احاسيس البشر وجوانب مش حد بياخد باله منها
وكمان في الاخر تسعدنا بفيروز
انت حد جميل يا تيمو والله
سررنا بالمرور
نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com
" تبسمك فى وجه اخيك صدقه "
ده فى العاااااااادى فمابالك بقى بلحظه هو مش بس محتاج لابتسامتك هو محتاج لمشاركتك معاه
بس للاسف الناس بقت اخرررر حاجه تفكر فيها مشاعرغيرها
يعنى المهم هو حاسس بايه لكن مش مهم غيره حاسس بايه وعايزه يحسسه بايه
البوست ده ينم عن شخصيه حساسه جدااا وغير نمطيه خاااالص وعلى فكره قليل لما بدخل مدونه وتلاقينى قلبت فى كذا موضوع وشدتنى كذا حاجه فيها
ومدونتك قريت فيها اكتر من موضوع لانها فعلااااا تستحق
سعيده جدااا بزيارتى لمدونتك
عارف ان البسمه دى فلسفه تعامل ومش اى حد يقدر يحس بمشاعر اللى قدامه الا اذا كان كائن ذو طبع حساس ومعظم الناس والهيئات عندنا تفتقد هذا الطابع فالروتين والملل اكل من احساسهم وارتباطهم بالزمن والمشاعر لو عرف قد ايه ممكن البسمه تفرق قد ايه نظرت عينه بتقصر فى اللى قدامه الموضوع دا اتعلمته من الصيدليه كل مريض تقف معاه محتاج منك طوله بال وهدوء وان تتحدث معاه واكانه اول شخص تقابله ومفيش غيره دخلك ولا هيدخلك بيكون احساس المريض اللى قدامك لو شايل هموم الدنيا هينساها وديما بفكر انه يكفى اللى بيعانى منه مش محتاج كمان معاناه من اللى بيتعامل معاه موضوع جميل فعلا تسلم ايدك
مجتمعنا العزيز مفتقد لثقافات كثيرة جداً..
ثقافة المشاعر و ثقافة الاحترام و ثقافة النقد ..
و ثقافات كتيييييرة .. :)
فماجتش على دي !!
هو دا الكلام يا تيمو
مساء الخير الاول على فكره انادخلت صدفه
انا بجد مبسوطه اوى عشان لاقيت حد بيفرق معاه احساس الاخر وده مش سهل ابدا
انت فعلا رقيق المشاعر
وياريت تقبل مرورى واشوفك ف البوست اللى جاى
اه نسيت اعرفك بيا
انا مونتى
اتمنالك كل خير وسعاده
تيمو يا تيمو يا عزيزى تيمو
صباح الخيييير
صباحك ورد وياسمين وكل حاجة حلوة
مع احلى مج كابتشينو وشوكولاتاية
:)
ربنا يسعدك يارب
ماشاء الله عليك
يالها من اجمل اللحظات والمشاعر
دمت اخى ودام اسمك وقلمك
هضيف مدونتك عندى للتواصل
دمت بكل الخير
تحياتى شذا الروح
السلام عليكم
ازيك يا تيمو؟ حمد الله على سلامتك
بجد تفكيرك رائع واهتمامك بادق التفاصيل شىء جميل والاجمل البوست اللى خرج بالاسلوب ده
حقيقى لازم نهتم بمشاعر الاخرين ونعطيهم اهميتهم لكن صعب عند الناس اليومين دول مش هاقول صعب فى الزمن ده لان العيب فى الناس مش فى الزمان
احنا بجد فى زمن غابت فيه الاحاسيس والمشاعر من قلوب معظم الناس مش هقول كلهم لانى ببساطه مش بحب الظلم
تحياتى لك ولتفكيرك
تقبل مرورى
تيمو ..:)
* * * *
يااااااااااااه..بقالي كتير معلقتش ع مدونات :)
اول مرة اشوف البوست ده
وتوقيته غريب..بكرة عندي تكريم والغريب اني مش عاوزة حتى احضره..
فايدة التكريم انه يحسسني اني مميزة ولكن انا مش هحس كده ...اذن باي باي
ثم ان الاتيكيت والذوقيات بتقول انك فعلا لازم تشجع اللي قدامك وتحسسه انه مختلف عن غيره عشان هوا نفسه يحس انه مميز جوا نفسه
كلام ملخبط مش عارفة ارتبه
بس عجبني البوست :)
وجامدة الميوزيك على فكرة خلتني عاوزة انام اكتر ما انا نايمة ^_^
* * * * * * *
ده كومينت كتبته من حوالي اسبوع كنت التعليق السادس بس النت فصل ساعتها وبعديها سيبت البيت مدة...وملحقتش انزل التعليق ده ولسه راجعة من مفيش ساعة فمعذرةً
:)
Timo ..
عاجبني اوي الرس المستفاد ..
عارف بجد صعبه اوي وقاسيه اوي ع الواحد ان محدش يحس بيه ويقدر مشاعره ..
صعب اوي ابقي انا بعيط ومستنيه حد يطبطب عليه والاقي كل الناس بتضحك ولا فارق معاها ..
وصعب اوي انني ابقي في اسعد لحظات حياتي سعاده والاقي سعاده الناس اللي حواليا مزيفه .. مجرد ضحكه صفرا وماسكات محطوطه علي شوية وشوش مش فاهمه ان قمة السعاده هي اسعاد الاخر ..
يااااه
البوست ده طلع من جوايا مشاعر كتير قاعد تتنطط قدامي دلوقتي ..
عارف
اكتر حاجه بتشدني هنا انني ببقي عارفه انني هدخل اقرا موضوع بجد .. حاسه لازم اقراها بكل حواسي ولازم اركز معاها واركز في كل تفاصيلها ..
يمكن مقلتلكش كده قبل كده بس بجد البلوجايه وحشاني اوي .. واكتر حاجه بخبها في كتاباتك اهتمامك بالتفاصيل .. و العمق ..
تسلم يا تيمو :)
تحياتي
نسيت اقولك انني بعشق فيروز .. :)
وبعشق الميوزك اللي بسمعها لما بدخل هنا .. ياريت تقوللي لمين عشان عايزاها
السلام عليكم
سعيده اوى انى دخلت المدونه دى
بجد الصدفه بتورينى مدونات بحس انى محظوظه لانها جات فى سكتى
انت بجد انسان هايل وانا بحب اخد بالى من التعبيرات والابتسامات وبجد فرحانه انى لاقيت حد بيناقش حاجه بتهمنى بالشكل الراقى ده
تقبل مرورى وياريت نتواصل
تحياتى
الحاجة اللى بحبها فى الاجانب ان ما بيقدروا المشاعر الانسانية طبعا باسثناء بوش وامثاله ...بس مش عارف هى دى طبيعة ولا تمثيل
تحياتى
لو أن كل مصري خلع عباءة اللامبالاة
لصلح حال الدنيا جميعها
تقبل مروري الأول
أسعدك الله
تيمو يا تيمو ياتيموووووووووووو
ازيك
فينك يا تيمو
بجد بفتقدك لما تغيب كدا
طمنا عليك
وسلم لى على فريدة
واااااااااااء انا علقت وتعليقي منزلش عشان الجهاز فصل هرجع اعلق تاني
فعلا اسوأ شعور لما شخص يكون فرحان ومبسوط وانت متبادلهوش نفس الشعور ونفس الابتسامه وتحسسه كأنه مش بشر زيك
فكرتني لما رحت استلم الشهاده بتاعت الثانويه العامه
والمديره بتسلمهالي بقرف اوي عشان انا كنت طالبه شقيه شويتين وكان شكلها مضايقه وحزينه اكنها بتسلم شهاده لعفريت كان نفسي وقتها اقولها ما تبتسمي ولا تضحكي بدل ما انتي شكلك عامل زي عفريته العلبه
بس احيانا كتير الصمت بيكون احسن من الكلام
انا اول مره ازور مدونتك وان شاء الله مش رح تكون الاخيره
باااايو
عجبتني اوي الجملة دي يا تيمو
الابتسامة دي مش زي اللي فاتت عشان اللي فاتت بتعبر عن حاجة والابتسامة ده بتعبر عن سعادتي بيك انت
-------------------
بحب أوي فكرة انك بتلقط بعدسة دماغك لقطات مميزة ، ممكن تعدي على كل الناس عادي لكن على حد فنان بيطلع منها حاجة مميزة
البوست دا ليه علاقة بالبوست اللي فات اوي
--------------
على فكرة ممكن كمان الوش الخشب يكون مش بس رتابة وملل لأ دا من باب رسم البرستيج
انت مين يعني علشان ابتسم في وشك
احمد ربنا انك سلمت عليا أساساً :D
احنا كده ما بنراعيش بعض ما بنحترمش مشاعر بعض
عارف كل الناس مش راضيه عن حياتها
اصل الى بيسلم الجواز ده اصلا عايش والسلام وما بيعملش اي حاجه بيحبها
والى بيستلم وحياتك فى الغالب ما بيدرس حاجه عشان بيحبها
ده بيرضي المجتمع
وبعدين انت عايز الباشا رئيس جامعةالمتخلفين شخصيا يتباسط كده ويضحك مع الطلبه
مش لازم يعمل لنفسه منظر ولا ايه
وطبعا عجبتنى الجمله اوي
أقسى من القسوة على الناس..ان لا تبالي بمشاعرهم
واتشرفت بزيارتك
Baskouta:
you know..
you told me a sweet words..
from a sweet person..
you
are
my best Baskouta ;)
stil Searching:
والله غصب عني الغياب (وش مكسوف)
وبعدين احنا كده ها نحتاج ضيف اجنبي في كل حفلة عشان يعوض اللي الناس بتوعنا مش بيعملوه..!!
خواطر شابة:
فعلا يا صديقتي زي ما قلتي..
الموضوع موضوع وعي وتربية وثقافة التعامل مع الاخر وطريقة في التعامل في الحياة بالمجمل..
احييكي على رايك :)
hana:
اسف قوي على تاخيري يا هنا..
ووالله انا مبسوط انك متابعة من فترة وان ده رايك في المدونة (وش مكسوف)
انا باسمي طريقة التواصل مع الاخر (فن) زي ما انت وصفتي :) :)
القمر الباكي:
ياريت كل حد يفهم المعنى المقصود من البوست ويعمل اللي عليه للاخر بدون انتظار المقابل..
سعدت بمرورك ويارب تبقي القمر الـ (مش) باكي :):)
سارة نجاتي:
طبعااااا منورة يا سووو :)
وانا فرحان انك جيتي هنا رغم مشاغلك الكتيرة :)
انا قريت البوست بتاعك وعجبني جدا طبعا..
نورت وها استناك تهربي من مشاغلك وتيجي تبصي بصة :)
Boky:
يا بوكي صباحك ورد وفل وياسمين..
ديما منوراني يا صديقتي العزيزة :)
وبعدين لو البلوجر موش عاوزك فا احنا كلنا عاوزينك يا بوكي( امشي يا بلوجر يا وحش من هنا بوكي خلاص ها تسمع الكلام) :) :)
انا مش عارف ارد على كلامك الجميل والرقيق يا اجمل بوكي..وبجد استنشقت عبير الياسمينة من مكاني هنا يا ابنه عم البنفسج :)
Reem:
ريم يا ريم يا ريم..يا قمر :)
والله شكلي مكسووووف جدا بعد الكلام الحلو اللي انت قولتيه حتى شوفي (';')
بجد بيفرق قوي الاهتمام بالاخر حتى لو مش بادلنا نفس الاهتمام..:)
دعاء العطار:
انا اللي سعيد بمجرد مرورك عندي فما بالك بانك قلبت في المدونة..؟؟
وصدقيني الاهتمام بالاخر لا يقدرة الا حد متفهم للنوع ده من المشاعر الراقية..وواضح انك بتعرفي تقدري ده جدا. :):)
طوبة فضة وطوبة ذهب:
فعلا البسمة فلسفة تعامل وفن للتواصل مع الاخرين ومش ها يكلفنا حاجة بالعكس ها ناخد ثواب ونحسس اللي قدامنا قد ايه هو مهم عندنا..!!
رايك عجبني جدا خاصة وانت بتطبقي المبدأ ده في حياتك العملية. :)
قهوة بالفانيليا:
الاسم كل ما بأقراه بحس اني نفسي اشرب قهوة بالفانيليا فعلا :)
فعلا يا شيمو مجتمعنا بحاجة لاعادة (تربية) انا طول عمري باقول ده :)
غير معروف (مونتي):
كان نفسي اعرفك اكتر من كده عشان اعرف اتواصل معاك..وطبعا نورت بالزيارة واتمنى اتعرف عليك قريب :)
شذا الروح:
مشاركة الاخرين لحظاتهم المميزة شيء بيسعدني جدا..
وطبعا بنفس القدر يسعدني التواصل معك :)
miroooo:
فعلا العيب في الناس يا ميرو مش في الزمان لكن نعمل ايه بقى في الناس كلها..؟؟
اللي بقوا بيحسوا بغيرهم عددهم بيقل كل يوم..
وللاسف غصب عني باخد بالي من الحاجات دي..!!
طالبة مقهورة درجة اولى:
حمد الله على سلامتك للبيت انت كمان :)
وبعدين يا ستي اعتبري نفسك التعليق الاول مش السادي لانك مميزة عندي يا طالبة (مش) مقهورة زي ما اتعودت اقولك.
و........تصبحي بالف خير يا قمر :)
Hager Za3bal:
اقولك سر..؟
انا باتابع كتاباتك وبتعجبني قوووي ومش متخيل ان اللي انا باكتبه ممكن يعجبك لانك حد راقي جدا وبتعرفي تختاري كتاباتك..فا لك ان تتخيلي مدى السعادة اللي حسيت بيها من كلماتك الرقيقة..
وبجد كلامك دفعني لانتقاء ما اكتب عشان احافظ على وجودك هنا :)
الموسيقى للرائع : James Horner
الشوكة الناعمة:
طبعا يشرفني التواصل وعلى فكرة الصدفة دي كانت سعيدة ليا انا كمان انك جيت هنا وها استناك ديما هنا من غير (صدف) :) :)
well:
اعتقد ان دي طبيعة لانهم مش مجبرين يمثلوا ولا عندهم (قوالب) اجتماعية زينا..ودي الحقيقة (للاسف)
نورت بمرورك
احمد المصري:
فعلا كلامك مظبوط وخاصة على مستوى العمل والموظفين اللي مش بيحسوا بمعاناة الناس اللي بتروح لهم...!!
ياريم يا ريييييييم..
انا اهو..
هنا..هناااا..
انت بجد حد جميل قوي يا ريم ولو في يوم حضرت لقاء ها احرص اني اشوفك :)
انا اللي عاوز حد يسلم لي على فريدة..!!
marmar:
نورت يا مرمر وياريت تبقى تيجي تورينا شقاوتك من وقت للتاني. اما بالنسبة للمديرة بتاعتك فا شكلها كانت زعلانة عشان ها تفتقدك وتفتقد شقاوتك (وش خبييييث جدا) :) :)
سمو الاميرة سارة:
بجد انت اكتر حد ربط بين البوستين بالطريقة دي عشان انت حد مميز قوي وانا ديما باستنى تعليقك ومبروك على كتابك يا سووووو :)
عاوزين نعمل لك حفلة بقة وانا اللي اقطع التورتة ومش ها ادي حد منها (وش خبيث)
انت كمان على فكرة بتعرفي تهتمي بالاخر بدليل انك وسط انشغالاتك وكتابك جيتي هنا وقريت وعلقت كمان :)
ندى الياسمين:
طب والحل ايه في رايك..؟
انا بقول لو نجمع الشعب كله في ساحة كبيرة ويعاد تربيته من تاني ممكن ده يكون حل... بس المشكلة فين الساحة اللي تاخد الشعب ده كله..؟؟ :)
نورت المدونة بعبير الياسمين :) :)
تحياتي لك ..
وللاسف لحد دلوقت مش عندنا احترافية حتي لو بتصنع ,,
لا نجعل من عقلنا هوا المحرك بقدر اهمامتنا ..........
تسلم الأيادي خصوصا الجملة الأخير ,, شكرا لأنك انت ادتنا خلاصة قرايتك
يفرق بأن الشخص اللي بيتسلم الشهادة بيحصد تعب سنين كتيرة تعب فيها
والطرف اللي بيسلم الشهادة شخص يستكثر حتى الابتسام في وجهه
سحقاً لهم
/
/
أطربتني فيروز
السلام عليكم
أقسى من القسوة على الناس أن لاتبالى بمشاعرهم
بجد لو حسنا المعنى هنختلف كتييييييييييييير والزمن هريجع بكل حاجة حلوة فيه
هى ملهاش علاقة بمسؤل أجنبى أو مصرى هى علاقتها بأحسسنا كأنسان بمعنى كلمة أنسان بنحس بغيرنا ومش بنشيل حد همومنا ولو بمجرد النظر
فأصدق الحزن أبتسامة في عيون دامعة
تحياتى
مدونتك جامدة جدا وافكارك عجبانى جدا وبس بجد تسلم على مجهودك الكبير جدا ده :)
وأتمنى أن تشرفنى بزيارة مدونتى المتواضعة
بالفعل عندك حق الإهتمام بالآخر بيفرق كتييير جداً فى نفوس ومعاملة الآخر لك
أتمنى أن نتعلم الدرس جيداً حتى لا نقسو أو نجرح أقرب الناس لينا بعدم إهتمامنا بيهم
أحييك على النصيحة الغالية دى
MR.PRESIDENT:
دي مش بس خلاصة قراءة دي خلاصة تعامل ومراقبة للاخرين وطريقة تعاملهم..نورت المدونة :)
جارة القمر:
جارة القمر يا قمر...
متهيالي "سحقا لهم" شوية عليهم ولا انت رايك ايه...؟ :) :)
ليله شتاء:
"فأصدق الحزن أبتسامة في عيون دامعة"
فعلا المعنى قاسي جدااااااا..
عندك حق في انها احساس انسان بانسان..!!
elsayed azab:
بجد متشكر على التعليق الحلو ويارب ديما تنورني وتعجبك موضوعاتي .. :)
صدى الصمت - عاشقة الورد:
"أتمنى أن نتعلم الدرس جيداً حتى لا نقسو أو نجرح أقرب الناس لينا بعدم إهتمامنا بيهم "
فكرتيني بجملة ديما والدي يقولها:
"بدلا من ان تقابل اعداءك بلطف حتى تكسبهم..عامل اصدقاءك بلطف حتى لا تخسرهم..!!"
عزيزى اسف على الازعاج نظرا للاعجابى الشديد بتدوين حضرتك واسلوبك
قررت اعرف عن حضرتك المزيد لانى فضوليه درجه اولى
فاقررت ادبس حضرتك فى الاجابه عن بوست ظريف كده
ويارت ماتنساش ان لحظه تعنى بالنسبه لى الكثير واتمنى اشوف اجابات حضرتك
وياريت تتوجه للينك ده
http://forksoft.blogspot.com/
اختك شوكه
متنظراك وياريت ماكونش تقلت عليك
اعتبر انوا انت كده قبلت التاج ؟
انت مشكله بجد فى اهتمامك بالتفاصيل الصغيره المهمه :))
"بجد..بيفرق كتير الاهتمام بالآخر"
بتوجع اوى اللامبالاه وعدم الاهتمام بلحظه مميزه فى حياه الطرف اللى قدامك
إرسال تعليق