الأحد، يناير 23

ذكريــاتك.. صفــــر

" من المحزن ان تقضي وقتا طويلا مع شخص ما عن قرب..
وبالرغم من هذا..تكتشف انك حقـاً..لم تعرفه...!!
"


دي الجملة اللي كانت في آخر فيلم:
Eternal Sunshine of the Spotless Mind

فكرت في يوم انك ممكن تصحى من نومك وناس موجودة في الحياة ومختفية من حياتك..؟؟
يا ترى ممكن تحس بإيه وقتها..؟؟
يا ترى ممكن وقتها تفتقدهم..؟؟
الفيلم ببساطة عبارة عن فكرة..
فكرة فكرت فيها زمان..
لما يوم اتمنيت اني انام من غير ما احلم..!!
ومع ذلك...كنت بأنام،،،  و
بأحلم..!!

فكرة انك تقدر تمسح شخص ما او حدث من حياتك..
من عقلك.. من ذكرياتك.. من كل لحظة بتفتقده فيها..
من كل وجود في حياتك..
تفتكر ممكن تدفع كام في تحقيقها..؟؟

لو عاوز تعرف ممكن تدفع كام..
فكر في التمن اللي ممكن تدفعه لو عاوز ترجع تاني بالزمن ..
او ترجع للذكريات..
او...تغيير فيها..
فكر بالمقابل اللي ممكن تضحي بيه عشان تعيش الاحساس ده !!
شوفت قد ايه التمن ممكن يهون عشان تحس باللحظة دي...؟
هو ده بالضبط نفس التمن اللي ممكن تدفعه عشان تمسحه او ما تفتقدش وجوده في حياتك..!!
الفيلم ده محتاج يتشاف مرتين عشان الاحداث تتفهم بطريقة الـ ( فلاش باك).
لكن..
الحياة..بنعيشها مرة واحدة..
مش مرتين عشان نقدر نفهمها..!!

الاغنية دي دايما بتتردد في دماغي  بشكل متكرر..!!
" لما تقوم الصبح وذكرياتك ميح..
مانتاش عارف نايم جارح ولا جريح..
حُب..وذكرى ، امبارح ، بكرة.. كل ده صفـــر..!!
هتلاقي نفسك تايه زي القشة في ريح.

ولا داري مين صاحب مين..؟!
وفلان بوش..ولا بوشين..؟!!
لو بالنسيان احنا عيانين..
اكيد.. احسن لنا..!! "
تامر مغازي
23-1-2011