الأحد، أغسطس 30

اعترافات سريعة..


  • اعترف باني تلقيت درسا سياسيا قاسيا مؤخراً في كيفية "مسايسة الناس" حتى وان كنت تقودهم الى الذبح..!!
  • اعترف باني كنت مخطئأ حين تخيلت ان للمباديء مكان في دنيا الواقع خارج الكتب والمقالات البطولية..!!
  • اعترف انني عشت وهم كبييير اسمه : من جد وجد..!!
  • اعترف بانني تعلمت مؤخرا اننا في المدرسة نتعلم الدروس..ثم نواجه الامتحانات ، أما في الحياة فإننا نواجه الامتحانات..وبعدها نتعلم الدروس..!!
  • اعترف أنه يوجد كثيرا من المتعلمين ، ولكن قلة منهم مثقفون..!!
  • اعترف بانه لا حياة مع المباديء...ولا مبادي في الحياة..!

    الخلاصة:

    كن صاحب مباديء....تصبح مشهورا وسط المئات...
    كن عديم المباديء... تصبح محبوبا من الملاييييييين..

السبت، أغسطس 29

كيف تتجرع المرارة بمساعدة الآخرين..!!

اصبت ببدايات برد من يومين بسبب تعرضي لعوامل جوية مختلفة
فكان لازم احاول الحق نفسي خاصة وان الكحة بتستمر معي فترات طويلة حتى بعد علاج البرد وبتعطلني عن آداء عملي اللي هو "الكــلام"
في ظل الانشغالات اللي ما بتخلصش دورت في صيدلية البيت على اي دوا سعال لان الساعة بقت 3 ومفيش صيدلية قريبة ولم اجد الدواء (اللذيذ ) اللي انا متعود عليه.

ووجد فقط علبة دواء كحة اشتريتها منذ فترة ولم اخذ منها الا جرعة واحدة نظرا لان طعمها شديييييد المرارة (فكروني مرة أبقى أعمل تظاهر ضد شركات الادوية اللي بتعمل ادوية شديدة المرارة ).
المهم ما كانش قدامي حل تاني غير اني اغصب على نفسي واخد جرعة المراراة.. قصدي الدواء شديد المرارة..!!

تاني يوم اللي انا حكيت فيه( يوميات لذيذة جدااا ) أعراض البرد والكحة زادت بسبب الضغوط اللي انا فيها وعدم الاهتمام بصحتي وضغوط ومتطلبات الاخرين ( اللي ديما اكتر من الوقت المخصص لاخذ الدواء ) ، وبرضة لقيت نفس السيناريو قدامي والساعة 3 ونص ومفيش حل غير اني اخد بنفسي من نفس الدواء المُـر تاااني..بس كان الموضوع ألـذ شوية !!
امبارح (مش هحكي ايه اللي حصل) بس تقريبا Copy و Paste من الايام السابقة بس الموضوع بقى عادي او اصبح تعود على المرارة...!!
(ده انا خايف كمان اكون حبيت الدوا المُـر ده او أدمنه)..!!
وهكذا خلصت الزجاجة كلها وخفيت الحمد لله من أعراض البرد.. ودخلت في أعراض الاكتأب..!!

كلمة شكر لابد منها :

شكرا لكل الظروف والآخرين الذين ساعدوني في تجرع المرارة بطريقة بسيطة .

الثلاثاء، أغسطس 25

يوميات لذيذة جدااا...

يوميات لذيذة جدااا...


ده ملخص ربع يوم امبارح..

  • خلصت شغل الساعة 12بالليل ..
  • خرجت 12 وربع..
  • طريق 45 كان زحمة جداا..
  • المفروض اكون في دمنهور قبل 1 معرفش ازاي..!!
  • المفروض اعدي على شركة اشتري حاجات مطلوبة ومتاخرة بقالها 4 ايام
  • مفيش شركة في رمضان بتستنى لبعد 12 عشان التراويح والسحور وكده..
  • اضطريت اظبط مع واحد صاحبي في الشركة عشان يستناني ويعمل لي اوردر ويطلع الحاجات من المخزن ويعمل لي الفاتورة ..كل ده بالتليفون..!
  • المفروض اوصل ياسر بعد كل ده لانه استناني بعد مواعيد الشركة.
  • الساعة بقت 1 الا ربع وانا لسه ع الطريق..
  • ياسر بيطلبني يستعجلني
  • نسيت جهاز صيانة واصلا ماكونتش ها الحق شركة الصيانة..!!
  • اكتشفت ان العربية بتغلي وانه فيه مشكلة حرارة..
  • المشكلة زادت ومفيش مية كافية ع الطريق..
  • ياسر بيطلبني تاني يستعجلني..
  • اتصال من الشناوي..
  • اتصال سخيف من حد (ة) للسؤال على كورس والمفروض اني اجاوب طبعا :(
  • الساعة بقت 1 وانا لسة ع الطريق والطريق واقف معرفش ليه..!!
  • ياسر بيطلب تالت والمفروض انه اتاخر كتير عشاني..!!
  • العربية بتغلي ومفيش وقت اقف احط لها مية لان الطريق ماشي ببطء بسبب مشكلة وانا في الحارة اللي في النص ومينفعش أقف وكمان مستعجل..!!
  • 6 اتصالات من ارقام غريبة..واصرار كبير اني ارد وسط كل ده..
  • الطريق وقف خالص بسبب حادثة عربية نقل..
  • التليفون التيت بيعمل (تيت..تيت...تيت..) يعني انا خلاص باموت وباخلص شحن..
  • وصلت دمنهور 1:30........وياسر مشي..والشركة قفلت..!!
  • اكتشفت المفاجأة...طلمبة المياة بتاعت العربية هي سبب المشكلة...
  • اللي يغيظ اكتر اني مغيرها من حوالي شهرين بمبلغ وقدره لانها الاصلية ومش المفروض تبوظ قبل 3-4 سنين خالص..!!
  • الميكانيكي التيت اللي بص على العربية قال لي كلمة طريفة قرت اخدها منهج في حياتي بعد ان حاولت الاستفسار من سيادته عن سبب زعل الست طلمبة هانم فرد بكل ذوق واناقة وتنميق وتدقيق وقال بلغة اهل الصنعة..(ماليش فيه يا استاذ)
  • اتصال من حد رخم بيستفسر عن الصيانة..
  • الساعة 2 ولازم الحق اروح وفي نفس الوقت ما عملتش اي حاجة وكمان لازم امشي براحة واخد معايا مية بزيادة.
  • وصلت دسوق 2:45 بطلوع الروح..
  • قابلت (صدفة) مهندس صيانة قال لي خبرين..واحد وحش..والتاني اوحش..الاول انه انا كان ليا قطعة مرتجع وفلوسها متاخرة...والتاني..انه القطعة مش ها تدخل مرتجعات الشركة ومبروك عليك القطعة البايظة يا معلم..!!
  • المفروض بكرة عندي كورس 11 صباحا..وميعاد بعد الظهر في المحافظة وبعد الفطار اطير على اسكندرية للشغل
  • المفروض ااجل كل ده عشان اظبط العربية لاني مش ها ينفع اسافر باليل ولا اتحرك من غيرها خااالص.
  • وصلت البيت 3:45 ومليش نفس اعمل حاجة وعاوز انام فقط..عشان اليوم ده يخلص..!

..........................................................................وغدا...يوم جديد.

الثلاثاء، أغسطس 4

آسف..على الازعاج..




أبدأ منين..
كل الببان متأفـله..
أبدأ منين..
كل الخطاوى مزلزله..

أبدأ منين..
و انا الغريب و غريبه فيا الأسئله..
والأسئله تبدأ منين.. أبدأ منين..


آسف..على الازعاج..

السيد / رئيس الجمهورية
ارسل لك الخطاب رقم 372
انا المواطن / حسن صلاح الدين زيدان




السبت، أغسطس 1

حلم رجل مضحك

في بحثه عن الاجوبة للاسئلة الأزلية..

كتب الرائع "فيودور ديستوفسكي" هذه الرواية الخيالية..

حلم رجل مضحك - ديستوفسكي


"أنا رجلٌ مضحك، وهم ينعتونني الآن بالمجنون، وقد كانَ من شأن هذا النعت أن يكونَ رفعاً من قَدْري لو أنّهم تراجعوا عن اعتباري مضحكاً، كما فعلوا في السابق. لكنني بعد اليوم لن أغضبَ عليهم، فجميعُهم لطفاء بالنسبة لي حتى وهم يهزؤون بي، بل لعلهم يصبحونَ أكثر لطفاً حين يفعلونَ ذلك، ولو لم أكن شديد الحزنِ وأنا أنظر إليهم لضحكت معهم ليسَ على نفسي بالطبع ولكن لكي أُسرّي عنهم، شديد الحزن لأني أراهم يجهلونَ الحقيقة؛ بينما أعرفُها أنا، ما أصعَبَ الأمرَ على من يعرف الحقيقةَ وحده، إنهم لن يفهموا ذلك.‏"

ده جزء صغير من الرواية للتشويق..
وده كلام من النوع التقيل..
وعشان محدش يتهمني بأني الأخ الرفيق" تيموفيـتـش"
او اني افقه سراديب اللغة الروسية مرفق ترجمة القصة باللغة العربية للناس اللي موش بتعرف روسي.