الثلاثاء، فبراير 2

كلام مع فريدة..


عارفة يا فريدة أول حاجة باعملها ديما ايه؟
اول ما بارجع البيت بافتح الميل....
ايوة..الميل مش الــ Messenger ..
زي ما عملت دلوقت..!!
معرفش.. كأني مستني رسالة..!!
رسالة ليا انا..
رسالة حد كتبها..
كتبها ..مش عملها تمرير " Forward"
زي ما كل الناس بتعمل..
بأدور على رسالة مفيش قبلها : Fw
شوية تفكير وشوية تأمل جوايا..
لقيتني مستني بقالي كتير..
وشوية..شوية اكتشفت اني بأكرة حاجات كتير "مستحدثة"..
او ممكن أسميها مشاعر مهجنه..
مثلا اكتشفت اني بأكره سياسة التمرير دي جدا..
حاجة جافة وخالية من المشاعر..
حتى لما باعيد تمرير رسالة لحد...باحاول اخليها تظهر كأني انا اللي عملتها او ع الاقل اني ارسلتها ليك انت ومهتم انها توصلك بالشكل ده..
يعني بتاخد مني وقت ومشاعر كان ممكن يكون اقل لو عملت زي باقي الناس..

ساعات بحاول واكتب رسالة ..وانتظر الرد على احر من الجمر...
و ديما انا المرسل... وديما باستنى ((رد))..عارفه يا فريدة يعني ايه رد...؟؟
يعني مش كلام..!!

ده انا كمان اكتشفت اني باكره صدى الصوت....لأنه ببساطة....مش صوت..!!

شوية شوية بدأت اقتنع (او اقنع نفسي) اني بحاول اطبق احلام على ارض الواقع وده عمره ما بيحصل لانها ببساطة..احلام..!!
ووصلت في الاخر اني اكره الاحلام...لانها ببساطة...مش واقع..!!

تيجي نسمع اغنية..؟؟

قد إيش كان فى ناس ع المفرق تنطر ناس..
وتشتى الدنى.. ويحملوا شمسيه..
وانا بأيام الصحو ما حدا نطرنى..!!

صار لى شى 100 سنه مشلوحه بها الدكان..
ضجرت منى الحيطان.. ومن صبحيه بقوم..
وأنا عينى ع الحلا والحلا ع الطرقات..
غني له غنيات وهو بحاله مشغول..
نطرت مواعيد الارض وماحدا نطرنى..!!

قديش كان فى ناس ع المفرق تنطر ناس..
وتشتى الدنى.. ويحملوا شمسيه..
وأنا بأيام الصحو ما حدا نطرنى..!!
وأنا بأيام الصحو ما حدا نطرنى..!!
وأنا..
بأيام الصحو..
ما حدا نطرنى..!!
تصبحي على خير..

هناك 88 تعليقًا:

مي يقول...

وأنا..بأيام الصحو..ما حدا نطرنى..!!
جميل ياتيمو كنت منتظرة اللينك زى ما كنا منتظرينك
وحشتنا بجد مع انى زعلانة:(
يارب اكون التعليق الاول

مي يقول...

طلعت اول تعليق هيييه بالعند فيك
بس برضه زعلانة منك

Timo.. يقول...

مي:
ميويه
ليه بس زعلانة..؟؟
والله ما كنت موجود ع النت خالص (';')
وها اضيف لك اللينك ياستي :)

مي يقول...

ولا الميل برضه زحححححححححححححلانة لسة ماليش دعوة
اهىء اهىء

reem يقول...

تيمو انت فين ياتيمو ؟

كدا بردو كل دا مش تكون موجود

ازيك واخبارك ايه ؟

تصدق يا تيمو انا بجد زيك كدا بحب لما ابعت لحد ايميل ابعته باسمه وبحب اوى اللى ابعت له يكون عارف انى مهتمه وانه مش مجرد اسم من اسماء كتير عندى

وبفرح اوى اوى لما بلاقي ايميل باسمى وبحس بالاهتمام

في حاجات صغيرة اوى بس بتفرق اوى اوى

دايما بتختار اغانى رائعة

الشعب لابد له من حكومه تشكمه يقول...
أزال المؤلف هذا التعليق.
الشعب لابد له من حكومه تشكمه يقول...

..
اممممممممممممممم انا كمان بكره اوى fw,

كثيرا ما نبحث عن رسائلهموجهه الينا شخصيا ,

ويطول بنا الانتظار لنجد فى النهايه ان كل الرسائل محوله,

وان رسالتك التى باسمك لم تصل بعد فتغلق الميل وتظل منتظرا علُها تأتيك يوما.

وتتامل وانت تمضى فى الطريق وترى شخصا يقف فى المطر والبرد منتظرا,,
ثم يتهلل وجهه بابتسامه وترى انسانه قادمه تجاهه بابتسامه,
تنظر وتبتسم وتقول لنفسك:
اديش كان فى ناس عالمفرق تنطر ناس ويشتى الدنى ويحملوا شمسيه وانا بايام الصحو ماحدا نطرنى.


** بوست حلو اوىىىىى ياتيمو بجد بجد حلو اوىىىىىىىىىىى,وعجبنى فوق ماتتصور,
تقريبا غيرلى المود بعد مكنت مضايقه شويه بجد بجد اتبسطت لما قريته.دا غير فيروز اللى بتغيرلى المود كله.
حلو اوىىىىىىىىىىىىىىىى.

Baskouta يقول...

بوست حلو اوي

الطبيعي الناس تخاف من الكوابيس
انا بقا بقيت اخاف من الاحلام الحلوة اللى انا عايشة فيها لاني لما بصحى منها بصحى على كابوس الواقع
الناس بتهرب من كوابيس الاحلام لارض الواقع
وانا بالنسبالي الواقع كابوس بتمنى انام واحلم ومصحاش تاني

احساس الانتظار احساس مؤلم
عارفاه وحساه
بس الاكثر ايلاما هو انك متبقاش عارف اللى انت مستنيه
هيعمل فيك ايه
يعني اوقات بنستنى حاجات علشان هتفرحنا او حاجات هتطمنا
انما لما نستنى حاجات مش عارفين هتعمل فينا ايه ده المؤلم اكثر

حاسة انى الكومنت بتاعي ملخبط
معلش اعذرني
I am Not What I used to be

تحياتي البسكوتية

shemo يقول...

السلام عليكم.......
ازيك يا تيمو ايه الغيبة دى ياراجل
بجد من كلمات البوست باين انك حد جميل اوى من جوا
اكتر ما اعشقة فى الحياة التفاصيل
والاياء الى احنا بس بنهتم انها تكون مهمة وبنحترم الى حوالينا فى تصرفتنا وبنقدرهم عشان احنا عاييزن وبنحب كدا
اننا ناخد من مشاعرنا ووقتنا عشان نحسس حد اننا مهتميين بيه دى حاجة حلوة اوى
بس مش عارفه ليه دايما لما نعمل كدا ع الرغم اننا بنكون مبسوطين بالى بنعمله بنتجرح دايما لاننا دايما بننتظر الرد والسؤال والاهتمام من الى حوالينا ............
دومت بخير
فى رعاية الله .
shemo

حرروف يقول...

ضجرت منى الحيطان.. ومن صبحيه بقوم..


صارلي شي 100 سنه عم ألف عناوين مش معروفه لمين
ووديلهون اخبار ...............والي تزكر كل الناس بالاخر زكرني


دية من اغنياتي المفضلة ودول من اكتر وبليهات اللي بقف عندها في الاغنيه

البوست عنوانة الوحدة
الالم خرج من مكانة واصبح له انين
انين يؤلم اكثر من الوحدة

دمت بخيرر

ميرسي علي كلماتك الرقيقة ومنورني دايمااا

أم .. بوبه يقول...

أنا عن نفسى معدتش بفتح الميل خالص من كتر ما اتقعدت من الرسايل دى وبقى عندى حوالى 300 رسالة ومليش نفس أقراهم .. وأنا عمرى ما بعت لحد رسايل من دى

بس بوست جميييل جدااا وفكرة فعلا محدش بيتكلم فيها كتير مع إننا بنشوفها كل يوم

العيسوى الصغير يقول...
أزال المؤلف هذا التعليق.
العيسوى الصغير يقول...

انت منتظر الناس محدش منتظرك

و بان مفيش فريدة
يبقى مفيش رد

ولا فى فريدة بس مفيش رد

ولافى فريدة وفى رد

البت المواجع اصلى كمان مفيش ليلى

snow girl يقول...

wow
what a beautiful feeling
I wish oneday you will have this e-mail
best regards

Hager Za3bal يقول...

انا كمان بحسها مشاعر مزيفه .. او يمكن مصطنعه، واكيد اي حاجه مصطنعه بيبقي طعمها ماسخ اوي ..

بوست مميز زي كل البوستات اللي هنا :)
واغنيه بعشقها :)

تسلم ايديك

Timo.. يقول...

Reem:
انا هنا يا رييييييييييم..
اهو..اهو..على يمينك..
هاااا...شوفتيني ولا لسه.؟؟
(';')

"في حاجات صغيرة اوى بس بتفرق اوى اوى"
انت بالجملة الصغنونة دي قولتي بتلخيص اللي انا قعدت ارغي فيه كللللل ده :)

Timo.. يقول...

الشعب لابد له من حكومه تشكمه:
شيمااااا..
انا مبسوط قوي اني قدرت اغير لك المود..
وعشان تتأكدي من ده..اقري اللي مكتوب على البانر اللي فوق في المدونة عندي لان السعادة فعلا في اسعاد الاخرين..
وبعدين يا شيما ما انت لازم تلاقي حاجات تضايقك ولا انت فاكرة الشعب كله ها يرضى بحكم بحكم شيما يعني؟
(';')

Timo.. يقول...

الشعب لابد له من حكومه تشكمه:
"رسالتك التى باسمك لم تصل بعد فتغلق الميل وتظل منتظرا علُها تأتيك يوما"
بس الانتظار الكتير قاتل يا شيما :)

Timo.. يقول...

Baskouta:
انا كمان بخاف من الاحلام الحلوة انها بتنتهي بكابوس الواقع.. وعجبني قوي التعبير بتاعك عن انتظار المجهول.
على فكرة الكومنت بتاعك مش ملخبط ولا حاجة.. هو بس عميق شوية :)

Timo.. يقول...

Shemo:
وانت بجد باين من كلماتك حد بيعرف يفرق بين الاشياء وبعضها..وهو ده التذوق.
احنا ديما بنتصدم لما نستنى الاهتمام ومش نلاقيه..
وعمق الجرح ديما بيكون بطوووول الانتظار.. ومكن كمان مش بييجي الرد في النهاية.!!

Timo.. يقول...

حرروف:
"الالم خرج من مكانة واصبح له انين..
انين يؤلم اكثر من الوحدة"
طب اقول ايه تاني بعد الكلام الحلو اللي انت قولتيه..؟
بجد تعليقك واحساسك بالكلمات حلو.

Timo.. يقول...

ام بوبة:
منوراني بجد بتعليقك الجميل ومبسوط قوي انك جيتي هنا وعلى فكرة انا كنت من اول المعلقين عندك لما بدأت التدوين :)
ولو بتعجبك المواضيع اللي محدش بيتكلم فيها..ابقى تعالي هنا ديما..س هاتِ معاكِ بووووبة (';')

Timo.. يقول...

العيسوي الصغير:
انت كمان مفيش ليلى..؟؟ بصرررة
طب ايه رأيك نعمل عنهم اعلانات.؟ :)

Timo.. يقول...

Snow Girl:
what a beautiful comment
and beautifl blog "serendipity"
i like that word sooooooooooooooo.. :)
regards 4 you :)

Timo.. يقول...

Hager Za3bal:
بجد كنت خايف يكون البوست مش على مستوى البوستات الي فاتت لكنك طمتنيني..
تحياتي ليك يا هاجر ولمرورك الجميل ولو اني مقصر شوية في حقك الفترة اللي فاتت لكن باتابع اول ا تيجي فرصة :)

صدى الصمت - عاشقة الورد - يقول...

الله الله كنت بجد محتاجة أسمع رائعة من روائع فيروز
أحييك عليها
فكرة البوست جديدة ومافكرتش فى موضوع التمرير دة قبل كدة

Timo.. يقول...

صدى الصمت - عاشقة الورد:
لو على فيروز بسيطة انزلك كل بوست اغنية ليها (';') وبالنسبة للفكرة فا لسسسسه فيه افكار تانية واجزاء تانية لنفس الموضوع اللي ديما بافكر فيه لانه من الاشياء الدقيقة والتفاصيل اللي باعشقها :)

العيسوى الصغير يقول...

فكرة!!

حرروف يقول...

ميرسي لكلامك تيمو انت دايما كلامك رقيق بس تقصد انه اغاني؟؟؟

حرروف يقول...

عموما اهديللك يا سيدي الاغنيه دية

بعد ما ادى وبعد ما خد بعد هد وبنى واحتد
شد لحاف الشتا من البرد
بعد ما لف وبعد ما دار بعد ما هدى وبعد ما ثار
بعد ما داب واشتاق واحتار
حط الدبلة وحط الساعة حط سجايرة والولاعة
علق حلمة على الشماعة
شد لحاف الشتا على جسمة
دحرج حلمة و همة واسمة
دارى عيون عايزين يبتسمو
الى قضى العمر هزار والى قضى العمر بجد
شد لحاف الشتا من البرد

مجرد حلم... صغنتوت يقول...

بتحسسني اني عمري ما اتفرجت على الفيلم ده بجد
بقرأ الحاجات اللي بتكتبها بحس اني بعيش بعيييد اوي
حلو اوي البوست ده
مشكلة فعلا ان الواحد يوصل انه يكره الاحلام في الاخر
بس هنعمل ايه

خوخه يقول...

تيمو على فكره انت انسان ذوق جدا وميرسي اوي على سؤالك
انا بس كان عندي امتحانات وخلصت يوم الجمعه علشان كدا مش كنت باجي خالص ولا اكتب لاني كنت بذاكر
بس ان شاء الله مش هغيب تاني
وميرسي مره تانيه

وحبي لك لن يموت يقول...

:)

Sharm يقول...

فنان في اختياراتك

reeee يقول...

kjoj[o

reeee يقول...

افكارك حلوة اوى وخيالك جميل
الرسايل الواحد بيكتبها بفكرة ومشاعرة ليها طعم تانى المرسل الية لما بيستقبلها بيحس بيها وبيفكر فيها لان فيها رسالة ليها معنى بيبقى عايز يوصلة غير الرسائل المصطنعة بيقرأها ويركنها

الطيــر العاشـق يقول...

أولا تقبل مروري
بصراحه دخلت لما شفت اسم فريدة
كلامك ماشاء الله عليه حلو ومعبر وطريقتك في الكلام لذيذة تسلم علي كلامك
كل التوفيق

معلومه انا اسمي فريدة

سمو الأميرة سارة يقول...

زييييييييييييييييي يا تيمو بالظبط
بكره اي رسالة كده وبحذفهم من غير ما ابص فيهم
حتى رسايل الموبايل العادية اللي بتروح لمليون بني آدم دي ما بحبهاش
وما ببعتهاش لإنسان يهمني
اني اكتب كلمة بإيديا مهما تكون عبيطة وساذجة بحس انها احسن من اني اروح انقل اروع كلمة كتبها شاعر لحد تاني
لأنها مش للانسان اللي يهمني دا لأ دي لحد يهم الشاعر
بتعامل كده بس ماعرفش هم بيفهموا دا ولا لأ
بس دا بيريحني
بالنسبة للأغنية فبجد بعشقها
وآخر موسم اكتئاب ليا ما ارتحتش غير لما شغلتها باعلى صوت وبدأت اغني معاها يجي عشر مرات تتعاد وانا بغني وبفرغ شحنة اكتئابي كلها معاها
وبقالي اسبوع او اكتر عايزة اكتب بوست معين بنفس عنوانها .. عمرك اطول من عمري بقى :)

riham attya يقول...

تيمو مدونتك حلوة جدا جدا بدون مبالغة بجد

وبجد موضوعاتك مع فريدة مش حلوة لا

دى تحفة بجد مشاء الله دى بجد عايزة تتنشر فى جريدة او مجلة

بتمنى ليك التوفيق حقيقى

Timo.. يقول...

حرروف:
منوراني ديما بتعليقاتك وتواصلك وانا اللي ديما متأخر (وش مكسوف)

Timo.. يقول...

مجرد حلم صغنتوت:
.... يمكن عشان باحب المح اعمق التفاصيل..وأقرأ ما بين السطور :)
منوراني ديما وبجد بأستنى تعليقك د. دعاء :)

Timo.. يقول...

خوخة:
اخيررررا ظهرت يا خوخة..؟
كده برضه كل الغيبة دي..؟
يا رب الامتحانات تكون عدت على خير وتنوريني ديما بتعليقك :)

Timo.. يقول...

وحبي لك لن يموت:
.....!
.........؟
.............(';')

Timo.. يقول...

Sharm:
بجد تعليقك ده وسام على صدري لانك حد مميز جدا في التدوين..ويسعدني زيارتك ديما :)

Timo.. يقول...

Reeee:
يا ري..يا ري...يا ر ي ي ي..
نورت المدونة باول واجمل زيارة ليها..
ها استنى رأيك ديما..
اوع ما تجيش لحسن اشكي لـ تي..و في..وسي (';')

Timo.. يقول...

الطير العاشق:
اخييييرا فريدة..الفريدة..؟
انت فين من زمان بأدور عليك:)
نورت المدونة بجد في زيارتك الاولى وها استناكي تردي على كلامي معاك ديما (';')

Timo.. يقول...

سمو الاميرة سارة:
سمو الاميرة بنفسها عندي هنا في المدونة..؟
وشرف ليا اني اكون بافكر زي سموك وبعدين ربنا يطول لنا في عمرك لحد ما تكتبي البوست رقم 8..آآى...قصدي رقم 18..يووووه..قصدي رقم 800 (وش خبيث) :)

Timo.. يقول...

Riham Attya:
بجد تعليقك اسعدني كتيييير بدون مبالغة ونورتيني بالزيارة الاولى،
وبعدين بدل ما تدعي لي التوفيق..ادعي اني الاقي فريدة اللي دوختني وراها :)

dr.nour يقول...

طيب انا بجد محظوظه ان حضرتك دخلت مدونتى صدفه علشان انا اوصل للمدونه ديه


لا بجد ما شاء الله يعنى مدونه اكتر من رائعه


بالنسبه للبوست

انا كل يوم برضه اول حاجه بعملها افتح الميل و الفيسبوك والمدونه يمكن يكون حد باعتلى حاجه

وطبعا بلاقى fw بس انا بقى مش بتعب نفسى ومش بقراها

لانى بعتبرها رساله مش مخصوصه ليا

ولان غالبا الى عملها fw اصلا مقرهاش وميعرفش فيها ايه وهى جتله وبدوره بيمررها وبس

كلنا بنحب الحاجات الواقعيه بس كمان بنحب حاجات تبقى واقعيه علشان نعيشها

ومش معنى كده نكره الاحلام لا نحاول نخليها واقعيه

حتى لو صعب خلى عندك ديما امل فى التغيير



ايه ده تعليقى سرح لبعيد اوى

معلش بقى اصلى ما صدقت ولاقيت حاجه عايزه اتكلم فيها من زمان


تقبل مرورى واسمحلى اضيف مدونه حضرتك عندى

Timo.. يقول...

dr.Nour:
نورت المدونة واسرحي بخيالك وتعليقك زي ما انت عاوزة وطبعا شرف ليا انك تختاري مدونتي وتضيفيها عندك وها استنى تعليقاتك ديما :)

reem يقول...

تيمو انت فين بس

انا مش صدقت نفسي لما شفت الكومنت عندى

انت من الناس القليلين اللى بستنى منهم بوست او كومنت بفارغ الصبر

وربنا يا سيدى يوفقك وتلاقي فريدة وتكون عسوله زيك كدا

سألتنى على عيد ميلادى عندى

انا 15 / 5

شهر مايو ينفع ؟

ولا انت مش بتحب غير نوفمبر ؟

سورى طولت عليك بس انا فرحانة اوى انى اتطمنت عليك

reem يقول...

ربنا يخليك ياتيمو

وانت طيب يارب

اه الله يخليك حب مايو

هو بصراحة انا مش بحبه اوى بس مضطرة اقول كدا

ههههههههههههه


تصدق انا كل ما ادخل هنا اعصابي تهدا بسبب الاغنية

انا بعشق فيروز

لسه بدوّر يقول...

والله كلامك حلو اوي
معاك حق في كل كلمة كتبتها
ده انا كمان اكتشفت اني باكره صدى الصوت....لأنه ببساطة....مش صوت..!!

حلوة أوي الحتة دي

شوية شوية بدأت اقتنع (او اقنع نفسي) اني بحاول اطبق احلام على ارض الواقع وده عمره ما بيحصل لانها ببساطة..احلام..!!
ووصلت في الاخر اني اكره الاحلام...لانها ببساطة...مش واقع..!!

بس لولا الأحلام مكنش هيبقى في حاجات كتير من اللي عايشينها دلوقتي

لو بطلنا نحلم يمكن نموت

تحياتي :)

The illusionist يقول...

على فكره يا تيمو
انا قولت استنى تنزل بوست جديد فريش عشان اتابعك
مفيش خالص
بقالك كتير مش بتنزل
كنت عايز اعلق فى بوست من الجداد مش لاقى
انت مش بتكتب ليه

yasmina يقول...

هااااااااى
ازى حضرتك يارب تكون بخير
ايه البوست الرائع اللى مليان معانى رائعة وجميلة دة
بجد المعانى اللى بين سطور البوست عجبتنى كتييييييير
وخصوصا شوية شوية بدأت اقتنع (او اقنع نفسي) اني بحاول اطبق احلام على ارض الواقع وده عمره ما بيحصل لانها ببساطة..احلام..!!
ووصلت في الاخر اني اكره الاحلام...لانها ببساطة...مش واقع..!!

yasmina يقول...

الحاجة الغريبة اللى حصلت بقى فى الجزئية اللى عجبتنى خصوصا دى
ان الجملة ذات نفسها تحفة بجد ورائعة
اما معناها انا مش من مؤيدينه
لانى انا عايشة عشان احقق الاحلام واللى كتير بتتحقق
وماينفعشى اننا نكره الاحلام لاننا لو بطلناها مش هنعيش بجد مش كلام
الموضوع دة يطووووووووول الكلام فيه
بس كله كوم والاغنية كوم تانى خاااااالص
اول ما شوفت الكلمات فضلت اغنيها وحبيت اسمعها من فيروز الجميلة بجد دى انسانة رااااائعة وعبقرية لاختيارها الكلمات الجميلة دى
برضو فيروز يطووووووووول الكلام عليها

تحياتى سلام عشان ماسرحشى كدة واطول
انا عارفة نفسى ههههههههههههههههه
سلاااااام وشكرا للتعليق الجميل اوى دة

فكرة من الزمن ده يقول...

تيمو تصدق بجد كلامك في عمق رهيب
انا كمان والله بكر الحرفين اللي بيدلو على التمرير وبحرص اني امسحهم
مش عارفة ليه وكمان امسح الاسطر اللي بتبقى في اخر الميل
وبتبين كام مرة اتمررت الرسالة
على فكرة فريدة في الاخر حاتتحول لفيلسوفة من كتر ما بتسمع الكلام ده
تحياتي

غير معرف يقول...

ممكن اكون مش الاولى و لا الاخيره فى كتابة نفس التعليق بس اكيد ان كل الرسائل مجرد مجاملة بتعملها لكل الناس بنفس الشكل لان مفيش حد بقى بيحس بالتانى و حاسس انه عايز يوجهله كلام ممكن يكون نظرتى تشاؤمية بس ديه الحقيقة
انا زيك بحس بنفس الاحساس بس عندى يقين انه كل الناس بتعمل حاجات للظهورات و بس و الله اعلم

miroooo يقول...

السلام عليكم
انا عارفه انى جايه متاخر جدا ومقصره جدا كمان بس غصب عنى والله
بس انا جيت اسلم عليك واشوف البوست الرائع ده وكمان اسمع الاغنيه الرائعه دى بجد ايه الجمال ده رائع بجد ممتاز بسم الله ماشاء الله عليك وعلى كلماتك المتميزه بس اموت واعرف ايه حكايه فريده معاك؟ هههههههه على العموم فريده دى انسانه محظوظه
تمنياتى لك بالتوفيق
تقبل مرورى
تحياتى

lostlove يقول...

السلام عليكم

حسه اني جيا بعد وقت طويل
بس النت المفتري معزبني
حلو البوست وحلوه الاغنيه

وانا كلي فكره بعمل كده كتير وبكره اوي حكايت تمرير الرسايل ديه

بحس انها حاجه مش بتعتي
عشان كده لما بتجلي واحس انها مش خاصه مش بعتها لحد وبيبقي اخرها عندي عشان بكون عارف انها اكيد كانت في يوم خاصه بحد واحد بس واتعملت ليه
ولو هبعتها تاني اختار الي يستهالها

تحياتي

اتمني التوفيق

Timo.. يقول...

Reem:
الاغنية الجاية متأكد انها ها تعجبك :)

Timo.. يقول...

لسه بأدور:
نورت المدونة في زيارتك الاولى.
ولو بطلنا نحلم...فعلا ها نموت..بس لو الحلم حسيت انه فعلا مش ها يتحقق..مش ها انام عشان مش احلم بيه تاني.

Timo.. يقول...

The illusionist:
بجد مبسوط اني شوفتك عندي..لكن انا مش باكتب كتير لاني باهتم باللي باكتبه ومش بأكتب يومياتي وكمان عشان ديما مشغول جدا :)

Timo.. يقول...

yasmina:
منوراني ديما وعاوزك ديما تسرحي براحتك وتقولي كل اللي انت عاوزاه :)

Timo.. يقول...

فكرة من الزمن ده:
على فكرة..
فريدة هي اللي علمتني الفلسفة (';')

Timo.. يقول...

miroooo:
حكاية فريدة معايا حكاااااااية ولا الف حكاية..
وان كان فيه حد محظوظ..فهو انا.. ومش ها اقولك ليه :)

Timo.. يقول...

lostlove:
يا ريت كل الناس تعمل كده وتهتم بالتفاصيل وتهتم انها توصل اهتمامها للاخرين..
وكمان لاازم اقول انه مش كل الناس ها تتذوق الاهتمام ده..

جاية متأخر او بدري...انت ديما منوراني :)

Boky يقول...

صباح الخير :)
عارف قبل أى حاجة..بجد أحلى حاجة على الصبح نعملها لما امسك الكابتشينو بتاعى والشوكولاتة واعيش الجو دة وأنا بفتح المدونات اللى بحبها واتصفحها واقرا كلام جميل بيلمسنى أوى :)
احساس رائع
والاحساس اللى انت وصلتهولى كمان رائع لانه معبر اوى..لما وصفت خصوصا الرد انه زى صدى الصوت اللى بيزعلك لانك عارف كويس انه مش صوت..الوصف دة حكى حاجات كتير فى كام كلمة
اوقات لما بنعبر بصدق كبير عن مشاعرنا ومش بنلاقى رد او حتى تفهم لاد ايه جوانا احساس..بنحس بحالة زى الجفاف فى احساسنا..ولو الرد مصطنع ومتكلف بنحس على فكرة..
زى ما تقول كدة بنفقسه :)
ودة غالبا بيكون مؤلم لينا اكتر من عدم الرد نفسه..بجد ارتاحت أوى لما قريت البوست دة
رغم انى مش عارفة مين فريدة ؟ :)
بس لما هقلب فى البوستات بمزاج مع نفسى يمكن اعرف لوحدى

لولا وزهراء يقول...

السلام عليكم ورحمة الله وبركاته

اشمعنى يعني فريدة؟
هي فريدة فريدة ولا فريدة بتاعت اسف ع الازعاج؟!!!!

انت فعلا بتدقق في تفاصيل التفاصيل هومش شئ جميل لانك هتتعب تفكيرك كدة كتيييير باشياء غير مجدية لكن الاجمل انك بدقق في تفاصيل تؤدي بك لنتايج مش سلسلة من الاسئلة زي تدقيقك في حكاية الفوروارد لانها بتورينا اهميتنا عن الاخر ايه..ويارب فريدة متتأخرش عليك اكتر من كدة في الرسالة :d

dondon يقول...

انا اول مرة بجد ابعت ايميل من غير ما اعمل فوروورد..بجد حسيت اد اية ان الموضوع بيفرق كتير..فى كلام كتير انا مش بعرف اقولة فى الحقيقة بس بطلع كل اللى جواية فى الايميل واتاكدت اد اية انا لو كنت عملت كدة من زمان كان الموضوع حيفرق كتيير اوى ..انا بتعلم منك حاجات كتيرة اوى بس مش اطلعها مع حد..لان اللى قدامى مش حيحسها منى كدة للاسف وانا فرحانة انى بكتب الكلام دة دلوقتى لانى ماكنتش حاسة معناه واد اية انا طلعت مش فاهمة حاجة....:)

heba يقول...

عجبنى البوست ده أوى ,, معاك حق الناس زى ماتكون مستخسره تعبر عن مشاعرها ...؟؟؟ المشاعر اللى بتقول عليها مهجنه مش بعيد قريب اوى تبقى فى قوالب (صلبة) وتتباع ,, وممكن كمان يعملوا منها أقراص :)
الحلم بقى اللى مش ممكن يتحقق هو ان الكلام الفاضى ده كله يتلغى والناس ترجع تكتب لبعض جوابات على ورق .............

Aya يقول...

هو ليه مجتش النهارده
تقولي صباح الخير؟ :)

إين أنت من حسابات الكون?
.
.

البوست دي تجنن
:)

نهر الحب يقول...

جميلة اوي اغنية فيروز

بس خليتني ادمع
عشان ماحدا نطرني
:(((

تعرف انا كمان بستني الرد
ديما بتسني ...
بس الانتظار صعب قوي وقاسي اوي

بس ممكن الاحساس يبقي اكبر ممكن نحس بحاجة حوالينا من غير رد ولا اثبات انها موجودة
تفتكر الاحساس ان روح حد حوالينا مثلا مش كفاية
!!!!

فيه جملة بحبها اوي بتقول
في الاانتظار لا نموت ولا نحيا

غير معرف يقول...

انا اسمى فريدة بس انا مش عجبنى اسمى بس انا حبيت الاسم علشان مش لازم تعرفو بس اية رايكم فى الاسم بس بصراحة انا مش بزعل

غير معرف يقول...

انا بقى فريدة

Timo.. يقول...

Boky:
مش ها اقولك غير "وحشتي المدونة"

Timo.. يقول...

لولا وزهراء:
تخيلي قد ايه اتاخرت في الرد..
وكمان فريدة اتاخرت ومش ظهرت..!!! :)

Timo.. يقول...

dondon:
المشكلة مش في الفهم..
المشكلة في "التوقيت"..
بس خلاث :)

Timo.. يقول...

heba:
ياريتنا نرجع زي زمان..
هو فيه احلى من ايام زمان..!!
نورتيني بالزيارة ولو اني اتمنى اعرف عنك اكتر :)

Timo.. يقول...

AYA:
مش عارف اقولك ايه غير اني "مذنب واستحق العقاب"
ومع ذلك..
صباحك سكر :)

Timo.. يقول...

نهر الحب:
اتعلمت زمان ان :
"العذاب هو الانتظار"
واتاكدت من صدق الجملة دي مع الايام..!!

Timo.. يقول...

غير معروف:
انت بقى فريدة..؟؟
طب وليه متخبية و (مش معروفة) كده يا فيري..؟؟

طالبة مقهورة ..درجة أولى يقول...
أزال المؤلف هذا التعليق.
نهر الحب يقول...

ساعات بحاول واكتب رسالة ..وانتظر الرد على احر من الجمر...
و ديما انا المرسل... وديما باستنى ((رد))
...........

miss ur words awyyyy

Radwa ElShami يقول...

جميلة أوي . . . بس انا مش بكره الأحلام لأنها تتمة لما ينقص في الواقع.

Timo.. يقول...

نهر الحب:
كا ما بنستني اكتر..
كل ما الجايزة بتكون اكبر :)

Timo.. يقول...

Radwa ElShami :
كنت باحب الاحلام.
بس حاسس اني بدات اكرهها..
لانها ببساطة...
مش واقع..!!

نورتيني بالزيارة الاولى :)

نهر الحب يقول...

صدقني...مش ديماً بيبقى فيه جايزة...مش انا قلت قبل كدة ساعات بعد ما نستني كتييير اوي بنحس كأن مشاعرنا من كتر ما استنينا وقعت ع الأرض ملقتش حد يحس بيها
.....
وممكن يبقي صحيح فيه جايزة على قد ما استنينا..

""""كنت باحب الاحلام.
بس حاسس اني بدات اكرهها..
لانها ببساطة...
مش واقع..!!""""

هو الكلام ده مايدلش علي الحزن!!!
دانت اللي ديما بتقول جمال الحلم اننا حلمنا بيه وعيشنا لحظات حلوة في انتظار تحقيقه حتى لو مابقاش واقع

صباحك بنفسج
:))