الجمعة، مارس 23

أزرق...!!!

لأن الخط الميري.. أزرق
والقلم في الفصل.. أزرق
ولما قال مقلوب وهأطفح..
ركبوه البوكس.. الازرق..!!
ولبسوه في السجن.. أزرق..!!
وختموا ختم... النسر..الازرق..!!
واللي ضايعة بتستخبى.. جوة ليلة هلس.. أزرق..!!
والولد لف لف ودخًّـن.... فخ كان دخانه.. أزرق..!!
مص دمه.. ودارى همه.. في البنطلون الجينز الازرق..!!
وإن قال حرام... يرموه في مكان.. مايعرفوش الجن الازرق..!!
يبقى ليه الاحمر والابيض...؟؟؟
لما هى لونها أزرق..!!!


........حكمة اتعلمتها في يوم.. واتاكدت منها مع الأيام.........



"كل مـا هاتتعـلم.. وتفـهم زيـادة..
كل ما ها تتـعذب..وتتألـم زيــادة "

هناك 66 تعليقًا:

نهر الحب يقول...

طيب والحل ؟؟
تفتكر ما نفكرش عشان منفهمش ..؟؟
والا نفضل زي ما احنا ونفهم ونتألم ونتعلم؟؟

يمكن يكون اكتر سؤال ملهوش اجابة
...
...
...
زعلت اوي لما قريت البوست يمكن عشان بعد ما استنيت كوووووووول ده ملقتش حاجة زي اللي اتمنيتها
:(
بس معلش

ياره عبدالله يقول...

السلام عليكم ورحمه الله وبركاته
الون الازرق مالى حياتنا
فالبحر ازرق
والسما لونها ازرق
ده حتى الفيس بوك لونه ازرق
وبرضه الالوان التانيه موجوده حوالينا
انت اختار الون الى بتحبه واتعامل بيه
انت الى بتحدد الون مش هو الى بيحدد
اضحك لدنيا تضحكلك .
دومتـ بكـل الـود ..
مع تحياتى وتقديرى ..

ُEman يقول...

"كل ما هاتتعلم وتفهم زيادة..
كل ما ها تتعذب..وتتألم زيادة "

يبقى ليه الاحمر والابيض...؟؟؟
لما هى لونها أزرق..!!!

ساعات بيكون الاحسن اننا منفهمش عشان منتوجعش وحتى اذا اتوجعنا مننساش ان ده كان اختيارنا عشان كنا عايزين نفهم!!

بس دايما بيكون الاحسن اننا لما نحس ان احنا مش فاهمين نبعد عشان على الاقل نحافظ على الصورة الحلوة اللى اتكونت فى اذاهناواللى هتتشوه بمجرد ما نفهم ونضايق وعشان بمجرد ما حنتوجع الصورة حتتغير وعمرها ما حترجع زى الأول !!!

الحباه لا هى ابيض واسود ولا كلها أزرق هو بس اوقات فى حياتنا نحس ان كلها زرقه بس لازم نتفكر ان الازرق هو لون البحر اللى بيخلى كل الالوان جنبه تبان اللون المريح للعين وللاعصاب ولون السماء اللى دايما نبص لها لما الدنيا تضيق علينا اوووى ونقول لنفسنا "لعلــه خيــــر"

لـــولا وزهـــراء يقول...

كنت منتظرة فريدة ...
اللون الازرق لون التفاؤل والتشاؤم معاً
انا انظر له من المنظور الاول اما المنظور التاني كانت نظرتك من خلاله في البوست
اتمنالك السعادة وبلاش النظرة التشاؤمية
لولا

reem يقول...
أزال المؤلف هذا التعليق.
reem يقول...

ولن نتوقف عن الفهم والتعلم من الحياة طالما نحن فيها .. ولن تنوقف عن ان نتعذب
لانها لا تعلمنا مجاناً كل معلومة يقابلها عذاب .. تلك هى قوانينها التى رضيناها ووافقنا عليها دون ان نبرم عقداً صريحاً بها
ونظل رغم ذلك نعشق الحياة ونعشق الازرق ونغوص في اعماق كل ازرق ويجذبنا كل ما هو ازرق

جميييييل اوووي البوست يا تيمووو كالعادة
عجبنى اوي اوي كل ازرق ذكرته
دايما ليك رؤية جميلة وخاصة جدا
وحشتنى المدونة جدا ووحشنى اكتب كومنت هنا جدا
يارب بقى الاقي يوم بوست عن فريدة يفرحنا :)))

ريـــمـــاس يقول...

صباح الغاردينيا
وهناك أيضاً ألوان أخرى حولنا في الحياة تجعل من حياتنا كما نريد وكما نحتاجها أن تكون "
؛؛
؛
رؤية جميلة
عميقة بعمق البحر الأزرق :)
لروحك عبق الغاردينيا
كانت هنا
reemaas

هبة فاروق يقول...

الحياه بقى لونها ازرق ههههههههه
قوى الملاحظه ياتيمو عجبتنى فكره البوست وارتباط الاشياء السيئه باللون الازرق الغامق
بحب الازرق بس الفاتح لانه لون السماء والبحر
وعجبتنى ملحوظتك الاخيره
"كل ما هاتتعلم وتفهم زيادة..
كل ما ها تتعذب..وتتألم زيادة "
للاسف لا مفر فكل يوم نتعلم شىء ونفهم شىء مش بيقولك اللى يعيش اكثر يشوف ويتعلم اكثر
بوست لذيذ ومميز ومتغبش كثير علينا تانى

rona ali يقول...

كله ازرق ازرق مافيش احمر

بس انا بحب الازرق معنديش اعتراض

بخصوص الجمله الاخيره آة
نقول إيه بقي انا تعبت قولان

هكتفي بكدة حاليآ :)

reemaas يقول...

انا كمان بقالى فترة بسال نفس السؤال

ليه كل الالوان لما هى بس ازرق


!!!!!!!!!!!!!!

فراشة يقول...

بحبها قوي الكلمات دي :)

يبقى ليه الاحمر والابيض...؟؟؟
لما هى لونها أزرق..!!!

(عشان ربنا خلق لنا ألوان كتير قوي مش بس أزرق ,,, يمكن بس اللون الأزرق اليومين دول كتير شويه ,,, بس أنا واثقه إنه فـ يوم هتبقى الألوان كلها موجوده ومشرقه )

"كل مـا هاتتعـلم.. وتفـهم زيـادة..
كل ما ها تتـعذب..وتتألـم زيــادة "

لما كان حد يقولي الجمله دي كنت بعترض
وبقول مينفعش نبقى نفهم زياده ونتألم زياده كنت حساها علاقه مش مظبوطه
بس للأسف إتأكدت إنها صح قوي قوي

بس الألم بيبقى مفيد عشان منه هنتعلم اكتر بكتير لو الألم مش بيعلمنا أكتر ما كل الحاجات التانيه بتعلمنا كنا بطلنا نفهم ونتعلم

صباحك مشرق ومبتسم ^_^

shemo_ joker يقول...

السلام عليكم...

أزيك يا تيمو ..
ليكم وحشةو والله انت والمدونة .

بحب اوى القصيدة دى ...

وفعلا زيى ما بتقول دى اكتر حاجة متأكدة منها ويمكن هو دا الى تاعب البيفهموا فى الدنيا ...وأوقات كتير بحسد الجهلة او المتعلمين من غير ثقافة ع ان دماغهم مرتاحة ...انك تتعلم اكتر وتفهم اكتر دا بيخليك تفكر أكتر التفكير دا شىء متعب اووى فى الزمن دا وبذات فى بلدنا دى ..



دومت بخير
وسلملى ع فريدة..
ودعوة لزيارة قريب تنور بيها المدونة عندنا .
shemo

أمة الرحمن يقول...

هتبقى احلى لو قلبناها احمر
وتبقى دى من نتائج الثورة
يعنى ممكن نغير لبسهم للاحمر علطوول

دمت بخير


رؤى

الشوكه الناعمه يقول...

اولا ازيك :)
تصور انا كانت على بالى القصيدة دى وكا نفسى اقراها اوى
والجميل جدا انى لاقيتك منزلها
نفسى اعرف بجد هى ليه بقا لونها ازرق
ليه بقينا اغراب فى اوطاننا وقدرنا بقا هو الازرق

محمد الجرايحى يقول...

تقبل أخى مرورى وتقديرى واحترامى
بارك الله فيك وأعزك

;كارولين فاروق يقول...

ازيك يا تيمووووو
بص يا تيمو هي عجبتني جدا
وفيها لون جديد بعيد عن الازرق
وعلشان انا ايامي زرقه اليومين دول
واتمني تكون كاروهات
فأنا شعرت بيها جدا
واجمل مافيها انها تعطي كذا معني وفكر
احييك عليها يا عبقري

The illusionist يقول...

صحيح
عندك حق
رايق يا تيمو من يومك
وبتنقى حاجات رايقه
ليه صحيح احمر وابيض
لما هى لونها ازرق
ازرق غامق قوى

Timo.. يقول...

نهر الحب:
معلش...
مش كل حاجة بنتمناها ... بنلاقيها..!!

عارفة..
لو عاوزة تتعلمي... لازم تتالمي..
ولو مش عاوزة تتالمي... يبقى مش ها تتعلمي..!!

بس خلاص :)

Timo.. يقول...

يارة عبد الله:
صح.. ورغم ان الازرق ممكن يعبر عن حاجات مش مفرحة..
الا اننا ممكن نربطة بحاجات كتر حلوة..
يعني عينينا بتشوف اللون زي ما هي عاوزة.
نورتيني بزيارتك الاولى :)

Timo.. يقول...

Eman:
برضة ها اقول لك لو عاوزة تتعلمي... لازم تتالمي..
ولو مش عاوزة تتالمي... يبقى مش ها تتعلمي..!!

صدقيني..مش كل الازرق وحش..
وكمان مش كله حلو..
وعشان كده من غير الوحش..
مش هانحس بقيمة الحلو.

Timo.. يقول...

لولا وزهراء:

فريدة جاية.. قريب قوي :)

انا نظرتي للازرق مش تشاؤمية ولا حاجة..
ده مشهد من الحياة واتنقل زي ماهو.

عندي احساس انك زعلانة مني..
لو ده صحيح.. بيقى عندك حق..!!

Timo.. يقول...

reem:
"الحياة لا تعلمنا مجانا..
كل معلومة يقابلها عذاب..
تلك هى قوانينها التى رضيناها ووافقنا عليها دون ان نبرم عقداً صريحاً بها "

والله يا ريم قولتي احسن من كل اللي ممكن اقوله..!!

وعشان كده انا ديما باستناك يا اجمل ريم في الدنيا :)

Timo.. يقول...

ريماس:

صباح الغاردينيا..
بداية كل تعليق حلو منك..

كانت هنا ريماس.
نهاية كل تعليق..

وما بين البداية والنهاية.. عبق اجمل غاردينيا :)

منوراني ديما ريماس :)

Timo.. يقول...

هبه فاروق:
نفس الازرق الموجود في السما..
هو اللي موجود في السجن..!!
نفس الازرق الموجود في البحر..
نفس الازرق الموجود في الحبر...!!


صدقيني الغياب مش بايدي يا هبه ومبسوط قوووي بوجودك :)

Timo.. يقول...

Rona ali:
الازرق موجود في كل حاجة حلوة..
واحيانا في كل حاجة وحشة..
وشتان بين الاثنين...!!

لازم نتالم عشان نتعلم رونا..

منوراني ديما :)

Timo.. يقول...

reemaas:
والله الكومنت والسؤال ده ماشي مع صورتك جدااا يا نور :)

تفتكري ليه كل الالوان.. لما هي بس ازرق..؟؟!!!

Timo.. يقول...

فراشة:
بالضبط.. رنا خلق لنا الوان كتير بس الازرق زايد شوية ..
ولازم ييجي يوم باقي الالوان تبقى كلها موجودة عشان تكمل باقي الصورة المشرقة اللي زي صباحك :)

انا كمان باحب وجودك يا فراشة :)

Timo.. يقول...

shemo_ joker:
عندك حق.. انا كمان اوقات باحسد الناس اللي مش بتفكر ولا بتفرق معاهم على راحة البال..
بس بعد شوية بارجع تاني واقول لنفسي مفيش تعليم من غير تعب ..
ومفيش تعب من غير ألم..

قريب هتلاقيني باتنطط عندكم في المدونة :)

Timo.. يقول...

امة الرحمن:
ها احاول بس ما اوعدكيش لان الالوان مش بايدي :)

اسمك حلو..
نورتيني في زيارتك الاولى :)

Timo.. يقول...

الشوكة الناعمة:
اولا انا كويس
ثانيا عشان انا عرفت انك عاوزاها فا كتبتها هنا :)
ثالثا انت وحشتي المدونة جدااا..
رابعا انا كمان باسأل نفس السؤال..!!

Timo.. يقول...

محمد الجرايحي:
نورت المدونة وشكرا (لمرورك) .

Timo.. يقول...

كارولين فاروق:
كارولين فاروق منوراني في مدونتي...!!
فينك من زمان...؟؟
يارب ايامك تكون الازرق الحلو اللي في السما واللي في البحر :)
نورتيني ومبسوط بزيارتك :)

Timo.. يقول...

The illusionist :
بص يا زناتي..
اولا نتفق اني بابقى مبسوط قوي لما بتيجي عندي وبلاقي تعليق منك..
ثانيا وحشاني دماغك وافكارك وطريقتك جداااا..
ثالثا عاوز اشوفك في اقرب لقاء تدوني يكون متاح تواجدنا فيه :)

يارب ديما تنورني بوجودك اللي بيسعدني :)

Bent Men ElZman Da !! يقول...

المشكله اننا نوصل ان نشوفها اسوء من الازرق !!

Baskouta يقول...

انا بحب الازرق
بس وهو معاه ابيض او بينك او سيلفر
الازرق لما بيجي مع الوان طيبة بيبقى هو كمان لون طيب
تمام زي حياتنا
الحاجات الصعبة لما بتيجي وانت عندك حاجات لونها طيبة ودفى وامان ورضا
بتتحول الحاجات الصعبة لنعمة من ربنا
بعتهالك علشان بس يفكرك بالحاجات الحلوة اللي موجودة بس انت من كتر ما اتعودت وجودها نسيت احساسك بيها

ربنا يبعتلك حاجات حلوة كتير بالوان طيبة ومفرحة

يسعد اوقاتك يا تيمو

Timo.. يقول...

Bent Men ElZman Da:
عندك حق فعلا..
وساعتها مش ها تبقى مشكلة..
دي ها تبقى كارثة..!!

Timo.. يقول...

Baskouta:
كل لون وله طعمه يا بسكوتي..
بس لو جربنا نستخدم لون واحد في كل حاجة وحشة.. ممكن علاقتنا بيه (تتحول) لمنحنى آخر..

ومع ذلك انا مش باكره الازرق..
انا بكره كل حاجة وحشة (ظلمت) الازرق.
يا رب ايامك كلها سعادة وهنا،
وانا مبسوط قوي انك جيت اخيرا هنا :)

amiraali يقول...

علي كده بقي احنا منتعلمش ...ولا نحاول نفهم...عشان نرتاح...
هيا دي الدنيا ...وهي دي الحياه ..ماهو محدش بيتعلم ببلاش....شكرا ليك نورت مدونتي

E73 يقول...

فهمت دلوقتي سر السؤال الأزرق بتاع ريماس

وليه مسكت في الأبيض والأحمر ونسيت الأسود؟

Noha Saleh يقول...

يعنى الجهل نعمة؟
ممكن برضه فى الظروف اللى احنا فيها دى،
بس برضه ولاننا غاويين الم وعذاب بنفضل نتعلم

Timo.. يقول...

AmiraAli:
لأ طبعا.. نحاول نفهم.. بس مش اكتر من (اللازم) لان ده متعب جدا..

Timo.. يقول...

E73:
تصدقي انك نبهتيتي ان فيه بوست عند ريماس عن البوست بتاعي..!!

Timo.. يقول...

Noha Saleh:
للاسف..
اوقات بيكون (الجهل بالشيء) نعمة..
شوفتِ احنا وصلنا لايه...؟؟!!!

سابرينا يقول...

كل مـا هاتتعـلم.. وتفـهم زيـادة..
كل ما ها تتـعذب..وتتألـم زيــادة "
كل ماتحس زيادة عن البشر أنت اللي حتتألم كمان أسرع وأكثر!
..............
الأغنية رووووعة والواحد أصلا خلاص !

دعاء العطار يقول...

"كل ما هاتتعلم وتفهم زيادة..
كل ما ها تتعذب..وتتألم زيادة "

دايما انا مقتنعه بكده ياتيمو .. جرب تبص ف عين طفل وتشوفه وهو بيضحك .. هتلاقى الضحكه طالعه صافيه ومن القلب

ده لانه لسه جديد ع الدنيا ولسه مش فهم حاجات كتيره ولا اتعلم ولا اتلوث

كل ماهيتعلم .. كل مالضحكه الصافيه هتختفى وهيحل مكانها ضحكه صفرا مش ليها طعم

بحب القصيده دى اوى وخاصة لما بشوفها باداء احمد حلمى .. دايما اختياراتك جميله ياتيمو :)

دعاء العطار يقول...

"كل ما هاتتعلم وتفهم زيادة..
كل ما ها تتعذب..وتتألم زيادة "

دايما انا مقتنعه بكده ياتيمو .. جرب تبص ف عين طفل وتشوفه وهو بيضحك .. هتلاقى الضحكه طالعه صافيه ومن القلب

ده لانه لسه جديد ع الدنيا ولسه مش فهم حاجات كتيره ولا اتعلم ولا اتلوث

كل ماهيتعلم .. كل مالضحكه الصافيه هتختفى وهيحل مكانها ضحكه صفرا مش ليها طعم

بحب القصيده دى اوى وخاصة لما بشوفها باداء احمد حلمى .. دايما اختياراتك جميله ياتيمو :)

شمس النهار يقول...

واهم جم اللي هيخلوا العيشة ازرق في ازرق

re7ab.sale7 يقول...

"كل مـا هاتتعـلم.. وتفـهم زيـادة..
كل ما ها تتـعذب..وتتألـم زيــادة "
وكل ما هتحب هتتعذب اكتر
يا ريتك متحبش حاجة
متحبش البحر ولا السما
متحبش اللون الوردي
متحبش الرقة والنعومة
متحبنيش
ومتحبكش

متحبش حد
متحبش الحب
.


.
.
لا يا تيمو انا مش بضربك ف خلاط
ده انا اللي مضروبة ف خلاط مشاعر متلغبطة مش عارفة توصل لبر

Timo.. يقول...

سابرينا:
عندك حق..
"كل ما ها تحس انك بتتالم اسرع.. واكتر.. من الباقيين"

مش عارف اقولك ايه على الزيارة الحلوة دي..
بس بجد نورتيني :)

Sometimes يقول...

الازرق من الالوان البارده
بس تعرف انا مفهمتش المقصود من حكاية الازرق دى
ياترى هل كل حاجه وحشه قلبت ازرق
لا بس نا بحب القلم فى الفصل ازرق
بس انا بستخدم الاحمر لما كنت بصحح


حكمتك صح
مش الفلاسفه مخها بيلسع من كتر التفكير


اقولك بس لصفاء السما والبحر لازرق وانت تنسى ده كله
ولما تبعد هتفكر تانى ههههههههههههههه

اه يانى
تصدق تعبت


المهم انت اخبارك ايه؟

عمرو يسرى يقول...

عندك حق

Story pain يقول...

الحكاية بسيطة جدا ومهما اتلونت بكل الالوان فى النهايه لونها واحد لون الوجع( الأزرق)

يبقى ليه الاحمر والابيض...؟؟؟
لما هى لونها أزرق..!!!


"كل مـا هاتتعـلم.. وتفـهم زيـادة..
كل ما ها تتـعذب..وتتألـم زيــادة "

المشكلة ان دروس القدر بتبأه اجبارى زى السؤال الاجبارى اللى كان بيبأه ارخم سؤال فى الامتحان كله مهما حاولت تهرب منه لازم بتحله فى الاخر...الواحد مهما كان غبى لازم برده بيتعلم بس كتيير بنعدى امتحانات القدر بدرجات الرأفة..بدرجات الرحمة من الله

دايما بوستاتك بتخلينى اكتب كتيير ليه مش عارفه..يمكن لان بساطتها وصدقها بيخليها تدخل جوه قلوبنا وتدور على كلام كتير مش بنقوله..
ما تتاخرش علينا ..منتظرة البوست الجديد :)

خيط الحرير يقول...

بسم الله والصلاة علي رسول الله

ذيك يا عم تيمو

مالوا لزرق والأسود يعني
بالألوان لون ألوان
والأسود خليلوا مكان
بالأسود لونا الليل
والشمس بتطلع وتميل
الشمس تلون ألوان
بالألوان لون الوان
يا سما أنتي لونك أيه
م الأزرق والأبيض ليه

ده الأزرق لون الفيروز
مين يكبر بالعلم يفوز

بلألوان هدخل جنه
متزوج ناقش حنه
بلألوان أحمد ربي
الرحمن غافر ذنبي
الصوت يعلي بلألوان
نعمل أيه بلألوان
بالأفكار لون الوان
بالألوان لون ألوان..

كل سنه وانت طيب ياأخي ...
سنه لبني إن شاء الله ...
وهو بوست أزرق بس حلو.

Timo.. يقول...

دعاء العطار:
فعلا يا دعاء..
كل ما الوقت بيعدي.. كل ما بنفقد شفافيتنا..
وجزء من احساسنا بالاشياء الصافية الجميلة..
وشوية شوية.. بتتحول كل الالوان للازرق..!!

Timo.. يقول...

شمس النهار:
هما كانوا موجودين..
طووول الوقت كانوا موجودين...!!
بس بيتخبوا في الالوان..!!

Timo.. يقول...

re7ab.Sale7:
انت بقالك فترة متلخبطة ومضروبة في خلاط مشاعر..!!
وانا بقالي فترة مضروب في خلاط الوان..!!
فهمت حاجة..؟؟!!!!

Timo.. يقول...

Sometimes:
الازرق موجود في حاجات كتير..
منها الحلو... ومنها الوحش..
بس كتر الازرق الوحش..
خلانا ننسى الازرق الحلو..
وارتبط معانا بكل حاجة وحشة..!!

Timo.. يقول...

Story pain:
مبسوط بوجودك وتعليقك فوق ما تتخيلي..
وزي ما قولتِ كتير من الامتحانات في الحياة بنعدي منها بدرجات الرحمة من الرحمن.

عجبني "لون الوجع الازرق"

صدقيني بحاول ما اتأخرش..
و.....بفشل..!!

Timo.. يقول...

خيط الحرير:
ما احنا قولنا ان الازرق ممكن يكون في الحلو وممكن يكون في الوحش..
بس المهم.. عينينا ارتبطت اكتر بالحلو ولا بالوحش..!!
نورتيني بالزيارة.

Timo.. يقول...

عمرو يسري:
عارف يا عمرو..
الحياة فيها الوان كتير..
بس المشكلة ان يتفرض عليك لون واحد من كل الالوان..
وعشان كده.. كل لون مفروض.. بيبقى مرفوض..!!
نورتني بالزيارة.

نقيه الروح يقول...

الالوان كلها موجوده بالحياة
ونقدر نلون ايامنا باللون اللى نختاره
متخليش نظرتك للحياة مقصوره على لون واحد وبعدين الاشياء اللى ذكرتها احنا اللى زرقنها مهو ممكن اوى نعملها بلون تانى وحاجات كتير حلو بالون الازرق
لو حابب تشوف الدنيا حلوه هتشوفها بكل الالوان ولو مش موجود غير لون واحد
ولو عاوز تشوفها غامقه وكئيبه هتشوفها ولو حواليك كل الوان الطيف
غير نظرتك وتفااائل
تقبل مرورى المتواضع
واعجابى الشديد بقلمك
دمت كما تحب

NaDa يقول...

والأزرق ده
هتلاقي فيه من حاجات حلوة برضو :)

EL pRiNcEssA يقول...

لساك زي ما انت

كل رمضان وانت طيب

Khadega Ghatwary يقول...

حلوة جدا جدا جدا
و صح فعلا
الحكمة دي صح بس للاسف لازم تتحقق !!

paix يقول...

اسف على غيابي وشكرا لسؤالك عني
وابداعك

دمعة حائرة يقول...

أنا لا أقرء لمجرد القرأة ولا أعلق لمجرد التعليق أن أبحر دائماوراء الحروف وإن لم تكتمل وإن كانت قديمة قتظل لها قيمة تعليقى ان محبى الازرق ليسوا كالاخرين هم سعات فى حيرة وسعات فى غيرة وسعات حياتهم بتكون حزينة وسعات بتكون خيال جميلة الدنيا لونها ازرق مكتوبة بحبر سرى عارفة اللى افترق وعشانه الصبح قالى حاجات كتير عن الازرق