الأحد، ديسمبر 01، 2013

وداعا نوفمبر..!!

"انتظرتك ِ .. كثيرا ً
حتى ملنــي الانتظار..!!
انتظرتـك ..أن تنسي اسمي
ولربما..تنسي صوتي
ولكن ....بئس َ الانتظار..!!

اليوم َ .. سأغلق ُ دفاتري
وسأنشر نبــأ ..هزيمتي
فأشعلي الشموع يا حبــيبتــي ..
وأعلني.. عليّ..الإنتــصار."

(يوميات رجلٍ مهْزوم)
نزار قباني

الامل هو اللي بيعيشنا..
الامل هو اللي بيخلينا نكمل..
هو اللي بيخلينا ننام.. ونحلم انه بكره يمكن يتحقق..
وساعات الامل ده ما بيتحققش..
ساعتها.. باشكره..
من كل قلبي..
لانه عيشني لحظات جميلة في انتظار تحقيقه..
وكل لحظة فيها.. بابقى عيشتها واستمتعت بيها وكانها حقيقة ثابتة.. وموجودة.

النهاردة قررت اودع نوفمبر
او.. هاحاول اقنع نفسي بده..
ها اسيب نوفمبر يعيش زيه زي اي شهر تاني..
وداعا نوفمبر..
لن انتظرك بعد اليوم..
لن احلم بقدومك كل شهور السنة..
لن احملك عناء التفرد والخصوصية..
فكل شهر..
هو نوفمبر.
 
اكتر مشهد بأحبه في الفيلم:

" كل شهر هو نوفمبر..ساره..
وأنا أحبك كل يوم..
هذا شهرنا،
ولم يكن لينتهى أبدا.."

هناك 24 تعليقًا:

reemaas يقول...

متفجأة الصراحة.. واضح انك اقتنعت بوجة نظر دعاء

مش عارفة اتبسط لده لانها وجهة نظرى ولانى شايفة ان الامل اللى مابيتحققش اكرمله يفضل ذكرى جميلة كل مايجى معادها نبتسم احسن ما ننتظره كل سنة بخوف انه مايتحققش اكتر مننا امل فى تحقيقه

ولا ازعل لانك مش هتستناه تانى ..

حيرتنى معاك على الصبح كدهون

اقولك .. ماليش مزاج ازعل وهتفائل وبما انك قلت كل الشهور هتبقى نوفمبر فهستنى منك تدوينة كل شهر بقى #تدبيسة_ستايل هههههههههههه

صباحك سكر

النسر المهاجر يقول...

للأمل وجود دائما اذا امنا بوجوده وكل الأوقات متساوية ولكل شهر متعته الخاصة كالعمر كل مرحلة به لها مذاق خاص


تحياتى

رحاب صالح يقول...

الامل موجود فينا بنعيشه وبيعشنا
بس الشاطر الي يقدر ميخلهوش يبهت ويفضل متألق علي طول

رحاب صالح يقول...

نسيت اقولك انك وحشتنا اووي علي فكرة

نهر الحب يقول...

مش عارفة....
يعني تغيب تغيب وترجع تحيرنا...
...
فيه حاجات مبتتنسيش..
وفيه احلام مينفعش منفضلش نحلم بيها...
وفيه أمل بنفضل عايشين عليه حتى لو عملنا نفسنا مش واخدين بالنا واننا نسيناه واستغنينا عنه...
وفيه ذكريات بنضطر نشيلها جوه قلوبنا وتفضل محاوطانا كأنها روح حلوة حوالينا بنبتسم لما نفتكرها وزي ما انت قلت بنشكرها لأنها عيشتنا يوم ولو حتى لحظة حلوة.....

لو كل الناس فقدت الأمل أنت لأ....
وحعتبر ده معناه في ان كل الشهور نوفمبر وكأنك حولت كل السنة لنوفبر لكن مش حبيت نوفمبر يتوه ويبقى عادي وسط الشهور...

شكرا انك رجعت تكتب بس مش معقول حنقرأ بوست في يناير وبوست في نوفمبر بس
مستنيين ابداعك دييييييييييييييما

Do3aa El_attar يقول...

ازيك أولاً ومبسوطة جدًا انك كتبت ^ـــــــ^

نيجي بقى للبوست .. عارف لما كانوا بيقولوا لكل مقام مقال .. آهو أنا ببقى مش عارفة امتى نتمسك بالأمل ونعيش عليه حتى لو كل المنطق والواقع بيقول انه مش نافع .. ولا عارفة امتى أسيب الأمل في حاله أو أخليه يسيبني في حالي وأعيش الواقع .. مش عارفة لما نتمسك بالأمل هل ده لأننا مؤمنين بيه فعلاً ولا لأننا بنهرب من الواقع بأي قشاية حتى لو جوانا عارفين إنها قشاية .. امتى أفرق بين الوهم والأمل ؟؟؟

اممممم أسئلة كتيرة ياتامر .. وللأسف مش قادرة أوصل لإجابة :(

بس اللي عارفاه وحاساه .. إننالازم نحلم ومانبطلش حلم .. ممكن نلاقي نوفمبر في صورة تاينة .. أو في شهر تاني .. وأكيد ممكن جدًا تلاقي فريدتك زي ما بتحلم :)

Nour يقول...

انا قررت اعمل كده مع اكتوبر وديسمبر وقررت كمان ابطل تشاؤم من ابريل

الانتظار متعب ايا كان، بس الأمل هيفضل هو السبب اللي بيخلينا نقوم من سريرنا كل يوم آملين ان النهاردة يمكن يبقى احسن

welcome back :))

Story pain يقول...



وداعا نوفمبر.. لن انتظرك بعد اليوم.. لن احلم بقدومك كل شهور السنة.. لن احملك عناء التفرد والخصوصية..

صعب جدا اننا نواجه املنا ..ونشوف أد ايه هو بعيدأو مستحيل ونباه بالقوة اللى تخلينانبعد على اد ماهو بعيد ونتحمل وجع الحقيقة وقرار الوداع

لا تحزن ياصديقي . . خُلقت الأحلام كي لا تتحقق !

أحلام مستغانمي

غير معرف يقول...

والله ساره دى بهدلته على الاخر
دخلت حياته وقلبتها رأسا على عقب
وبعد كده سابته ببساطه كدا فى بحر حيره لاعارف يرجع زى ماكان ولاعارف يكمل من غيرها.
دى رؤيتى للفيلم


مع تحياتى

بودا

لــــ زهــــــراء ــــولا يقول...

سويت نوفمبر ... لو حسيت انك ممكن تتخلى عن حلمك ومتتمسكش بالامل تبقى ايه لازمة الحياة!!
موقعناش الا عشان نعرف نقوم
ومأخفقناش الا عشان ندوق لذة النجاح
ومجاش الليل الا عشان يعلمنا انتظار النهار

كله مستني الامل .. بس مش هيجي مع نوفمبر .. هيجي لما ربنا يريد. المهم منوقفش نحلم ولا نقتل الامل


لولا

Tamer Moghazy يقول...

Reemaas:
صباحك سكر يا نور..
مش يمكن فعلا ها احول كل الشهور لنوفمبر..؟؟

Tamer Moghazy يقول...

Gamal Abu El-ezz :
حقا يا صديقي
لكل شهر متعته الخاصة
ونحن من يصنع تلك المتعه..
ونحن من يمنحه هذا التميز.
تشرفت بوجودك

Tamer Moghazy يقول...

رحاب صالح:
الامل..
الكلمة السحرية للحياة..
من غيرها......نموت.

عاوز اقولك حاجة..
انا كمان وحشني وجودي هنا.. وسطكوا :)

Tamer Moghazy يقول...

نهر الحب:
"فيه حاجات مبتتنسيش..
وفيه احلام مينفعش منفضلش نحلم بيها...
وفيه أمل بنفضل عايشين عليه"

صح جدا..

"لو كل الناس فقدت الامل.. انت لأ"

شكرا لكل حرف كتبتيه.. وعلى الثقة دي..

"حعتبر ده معناه في ان كل الشهور نوفمبر وكأنك حولت كل السنة لنوفبر "

انت صح :)

Tamer Moghazy يقول...

doaa elattar :
صديقتي الكاتبة العظيمة :)
مبسوط جدا بوجودك..
مبسوط انك بتقري لي..
وممكن انا كمان انضم ليكي ونسأل اسئلة كتيييير من اللي بدون اجابات :)

"ياترى لما نتمسك بالأمل هل ده لأننا مؤمنين بيه فعلاً ولا لأننا بنهرب من الواقع بأي قشاية حتى لو جوانا عارفين إنها قشاية"

هااسيبك تختاري اجابة وتقوليها لنفسك زي ما انا عملت في صمت .

Tamer Moghazy يقول...

Nour:
والله انا باحسد نفسي يا نور على انه ناس بتكتب حلو قوي زيك وبتقرالي انا...!!
مش عارف ايه بس عاجبكوا في حد بيكتب كل فين وفين..
وكمان بيرد بعد ييجي 15 سنة..
وكمان معندوش سيرة غير ست فريدة..!!

اقولك سر.؟؟
باستنى رايك في كل بوست ..
شششششششش..
انا قولت سر :)

Tamer Moghazy يقول...

Story pain :
"خُلقت الأحلام كي لا تتحقق..!!!"
"خُلقت الأحلام كي لا تتحقق..!!"
"خُلقت الأحلام كي تتحقق..!!"
"خُلقت الأحلام لتتحقق..!!"
"خُلقت الأحلام لتتحقق.!!"
"الأحلام تتحقق..!!"
"الأحلام تتحقق."


شوفت سهلة ازاي..؟؟
نورتيني :)

Tamer Moghazy يقول...

غير معروف:
اه... شوفت ازاي..؟؟

Tamer Moghazy يقول...

لــــ زهــــــراء ــــولا :
الايام علمتني يا لولا انه مفيش حد بيتمسك بحلمه.. الا وبيحققه.

الحكاية بس بتبقى عاملة زي رسم القلب.. شويه فوق.. وشويه تحت..
بس المهم اننا ماشيين مع الخط لحد النهاية :)

rona ali يقول...

حمد الله على السلامه دة مبدئيا

والتعليق بقي الافضل هيااااااااااااااح

مش عارفه اقول ايه عن الامل او التعليقات اللي بنعلقها لنفسنا وارتباطنا بشهور والخذلان لما مبيحصلش اللي عايزينه او الخذلان من الشخصيات نفسهم
او الخذلان للخذلان وخلاص

واتوقف عند نقطه كن كل الشهور

واختيار موفق لفيلم مميز فعلا

واخيرا شوفنا ليك حاجه :)

Unknown يقول...

كلام جميل اوي

P A S H A يقول...

كل سنة وأنت طيب وبألف خير وصحة وسعادة ورضا وراحة بال وسلام وإن شاء الله يكون عام جديد سعيد عليك وعلى أسرتك الكريمة وتحقق فيه كل ما تتمنى
:)

أطيب تحياتي

maha el-lithy يقول...

اناشفت الفيلم ده زمان بس مش فاكراه
ممكن لو عندك لنك احمله منه ؟
وساعتها اقدر ارد على البوست

دمعة حائرة يقول...

أنا لا أعلق لمجرد التعليق ولا اقرء لمجرد القراءة الحلم حلم عشان خيال لما لقى الواقع محال قرر يجمل حاجات مش فى الامكان