بِحلوه..بِمُره.. كُله بيتسخط لمفيش!

مفيش إحساس لحُسن الحظ ، ولسوئه مابيعديش..

مفيش ولّا طعم حاجة من اللي بتدوقه مسيرُه يعيش

بحلوُه.. بمُره.. كُله بيتسخط.. لمفيش !!
 

إحساس إنك جوّه مشهد أو حدث كبير قوي ، وإنك واقف ع المنصة لوحدك ، وان كل الأضواء والكاميرات متسلطة ليك أو عليك..
وان كل حاجة في المشهد بتتعمل بإيقاع متناغم لمجرد (بس) إنه يوّاكب المشهد واللي مش بيدوم للأبد لأنه -وببساطة- بعد شوية أو شويتين المشهد بيتغيّر والعدد بيّقل من الصورة!
الأضواء بتختفي ، والفلاشات بتخرج من المشهد..
الكاميرات بتنسحب واحدة..  ورا التانية !
العمال كل واحد اخد (سبوت لايت) معاه.. ومشي!
صوت الحركة بيّقل ، الخطوات بتبعد خطوة ورا التانية..
لحد صوت خروج آخر رِجل م المشهد..
لحد.. مايفضل.. إنت.. وبس..
انت.. وبس في المشهد !

بُص فوق.. و فُوق شوية..
هتشوف لمبة.. أو إتنين.. أو يمكن تلاتة..
كانوا هناك.. موجودين.. في أول المشهد.. أو حتى من قبله..
عشانك انت موجودين..
هُما دول اللي هايكملوا ، هُما دول اللي هاينوّروا المكان حتى بعد ما(إنفض) المولد ، حتى بعد ماخِلص المشهد.
يمكن وسط الزحمة ماكانوش باينين ، ماكنتش شايفهم وسط الزحمة والدوشة من الأغراب..
مش المُهم انك ماخدتش بالك من وجودهم من الاول..
بس الأهم انك تاخد بالك إنهم دايما موّجودين.. موجودين (بس) عشان ينوّروا لَكْ حتى لو مفيش ناس.. حتى لو مفيش مشهد.
حاول تمسك فيهم.. بإيديك.. أو سِنانك
(جايز) مايكونش نورهم بقوة الباقيين ف المشهد..
بس الأهم.. إنهم دايماً هايكونوا هناك.. حتى لو مفيش مشهد!
موجودين..
عشانك.. وليك.. موجودين.

يا سبحان اللى بيعودنا ع الحاجة..فاننساها..
وبيخفف كاسات الناس بميه.. بدال ما يملاها..
عشان طعم اللى فيها يروح..
عشان طعم اللى فيها يخف..

  20-02-2015

قصيدة تفرانيل