- آلوو..- آيواه...
- انت فين...؟
- هنا..
- هنا فين...؟
- في الدنيا..
- بجد انت فين.. ؟
- عاوزني فين..؟
ده انا لما بأرد على الموبايل والاقي اسخف سؤال طلع لنا بيه عصر الموبايل..(انت فييين؟)
والرد الطبيعي على السؤال السخيف و (الحشري ) ده هو :
- وانت مال "...." ؟!!
مرة قريت مدونة بتتكلم عن نفس السؤال بس مش في الموبايل، ده سؤال عام في الحياة بنقابله بشكل متكرر اول ما حد يقابلك يقوم (يثبتك) ويقول لك "انت فين..؟"
وعجبني قوي فكرة المدون اللي اقترح انه السؤال عشان يكون كامل الدسم لازم يكون (انت فين مني...؟) (';')
نفسي افهم يفرق في ايه مكان تواجدي مع المتصل اللي غالبا بيكون عاوز يسال عن حاجة وغالبا بيكون ردي بالتليفون ولا يحتاج الموضوع لتواجدي...!!
ولا هو مجرد فضول سخيف لمعرفة معلومة تخص (الآخر) وخلاص..؟؟
او مرض وتفشى في المجتمع اللي عاوز من وجهة نظري "يعاد تربيته من تاني"..!!
اظرف المواقف اللي قابلتني بسبب بحثي في هذا السؤال انه مرة واحد صاحبي كلمني على التليفون الارضي الثابت والمعلوم مكانة في بيتنا وتاني جملة قالها بعد "آلو"..هي السؤال المحبب إلي (انت فين)....؟؟؟
وطبعا الاجابة المتوقعة مني وانا راسم بحواجبي رقم 88 (هو سيادتك طالبني فين...؟؟!!!)
هناك 21 تعليقًا:
ليا ناس اصحابى كده
فلما السؤال بيتسأل بقيت ارد بالظبط
انت فين ...فى الصالون ...على الكنبة ...على الارض
^_^
او عاوز تفقعه ...قوله فى الكرة الارضية :p
ههههههههههههههههه
اه والنبى صحيح اصله دا شعب ابن تيت عاوز يتربى من جديد
يلا بقى ياتيمو على الله ثم عليك المهمه دى ......
شد حيلك وربيه وتعالى نغيرها ونقول :
الوو
ايوه
انت مشغول ولا ممكن نتكلم شويتين ؟
بمنتهى البساطه لو مشغول موش هارد على التليفون .
وسلملى على الكوسه
تصدق اول مرة اخد بالي من الحكاية دي؟
سؤال مستفز فعلا
temooooooooooooo....enta fen mny ya temooo
هههههههههههههههههههههه
لما يقولك برخامه انت فين خليك ترخم وقول مش هنا
متشكرة لزيارتك مدونتي وان عجبك كلامي
ثانيا بقا دة خلاص بقا السؤال الكارتوني المعتاد
بس انا حقوللك حاجة
لما يسالوك انت فين وهما بيتصلوا ع موبايل بيشوفوك في لابيت ولالا عشان يقفلوا ويتصلوا ع الارضي
ولو بيتصلوا ع الارضي بيشوفك في اوضتك ولا في الصالة عشان الكلام اللي بعد كدة حيكون سرر
هذة خبرتي في الحياة ههههههههه
كل سنة وانت طيب
دمت البف خير
سلامي إليك وتقديري
أحب أن أوضح لك أن مثل هذه الأسئلة تعبر عن نمط ثقافي ... فلا تجد هذا السؤال أو هذا التطفل من قبل شعوب اخري ... أو ربما يكون بادئة كلام لمن لا يجيد التعبير عما يجول بخاطره
شكرا
مدونة لطيفة...بس انت فين اكيد المقصود بيها...فينك يعنى غطسان ...مش باين...وكما قال الفنان القدير حسام حسنى فى اغنيته المغموره الشهيرة جدا الهابطه جدا ...انتى فين دلوقت دلوقت دلوقت....انتى فالناد ى ولا مع دادى...ويا صاحباتك ولا زميلااتك ..ولا جارتك تحت...دلوقت..دلوقت..دلوقت
انا اول مره اخد بالى من السؤال ده
رغم انه فعلا بيتكرر كتير
ودايما بارد عليه بكلمه واحده
فى الدنيا
كل عام وانت بخير
السلام عليكم/ بجد هو سؤال مستفز وفى نفس السؤال بس بطريقه تانيه (هى بتتكلم مننين) والرد اللى يجننهم من بوقى ههههه وده لو على التليفون الارضى او المحمول لان شيىء مش يخصهم المكان المهم الطلب اواللى عاوينه
دى رخامه يا معلم
والرخامه واجهها بالرخامه
وعلى فكره هو بيبقى موضوع فضول مش اكتر
متلاقيش انت حد بيسأل عليك لله فى لله دلوقتى
وكل سنه وانت طيب
حلو اوى البوست اللى فات
بتاع المبادىء كلامك عجبنى جدا
بس معلش انا بوفر فى الكومنتات ههههه
كل سنه وانت طيب تانى
عيد سعيد عليك وعلى كل الناس
أدام الله لكم الأعياد دهورا
وكل عام وأنتم بألف بخير
ياسمين
هههههههههههههههههههههه..ده حد غريب أوي فعلا
:)
أنت فين دلوقتي
:))
عيد سعيد
تجياتي
الســلام عليكم تويتى...
طيب ليه ما تقولش إن المشكلة فيك انت يا تموره... يمكن لأنك لسه إنسان بتفهم الكلام وتتمعن فى معــناه...
بمعنى إن لما حد بيقولك (انت فين) بتفهمها على إنهـا فعــلاً ســؤال المقصود منه يســألك عن مكانك أو عن أخبارك أو إنك مش باين أو ما بتســألش عليه.. لكن لو اعتبرت إن كلمة (انت فين) دى هيا أصــلا جزء من كلمة (ألو) اللى بنفتتح بيها المكالمة.. يعنى مثلاً اللى تليفونه يرن مفروض يكون رده (ألو.. انت فين) بدلاً من (ألو) بس..
وبالشــكل ده مش هتدايق أبداً من الكلمة لأنك ما بتدايقش من كلمة ألو دلوقت...
عبش الحياة بمفهومها الجديد يا توتى...
"ألو ....أيوة يا مريم" ..." ايوة يا احمد انت فين اية الاستهتار دة" يرمى احمد التليفون فى النيل... "10000 مبروك" ......
انت فين ده سؤال بيكون نوع من المجاملة
اللي هو انت فين يا راجل مبتسألش ليه
وبيكون معناه نوع من الاطمئنان ومش مستني منك أي رد
غير إنك تقوله تحت النظر يا باشا :D
الفضووول ..
الفضول الأزلي اللي بقي ملازم لمعظم البني آدمين اللي في حياتنا ..
ساعات بيكون خوف وحب ..
يعني، ممكن تكون الطريقه والشخص بيفرقوا كتير ..
او
ممكن تكون الحكايه كلها احنا .. ممكن نتقبل ده من حد معين ونمقته من حد تاني ..
بسم الله والصلاة علي رسول الله
أنه العقل الراكد في دنيا التفاهات..
فلا واجهه..ولا هدف...ولا غرض هام ينشده من ذاك الإتصال..لو عقل كل منا عرف واجهته..لتعلمت ألسنتنا طريق الصواب في الحوار والكلام...لكن للأسف أصبحت العقول فارغه الي حد يصعب معه الحياة...ولا نملك من أسئلتنا في النهايه سوي سؤال وحيد ...أنت فين؟!
بالمناسبه أنت فين ؟!
مررت 4 مرات وأولهم فريده...ولم تمر مره..
ومدونتي فريده !!!
يااه ده انا لقيت كنز حرفيا xD
طريقة كلام الناس سنة 2009 غير طريقة كلام الناس دلوقتي الكلام اختلف خالص الواحد بيحس انه لقى كنز لما يشوف الفرق بين عادات دلوقتي وعادات الناس زمان خصوصا ان الفترة الزمنية لين دلوقتي ووقت كتابة المدونة ديه حوالي 14 سنة !
إرسال تعليق