الجمعة، سبتمبر 04، 2009

أنت فين مني...؟؟

- آلوو..
- آيواه...
- انت فين...؟
- هنا..
- هنا فين...؟
- في الدنيا..
- بجد انت فين.. ؟
- عاوزني فين..؟

ده انا لما بأرد على الموبايل والاقي اسخف سؤال طلع لنا بيه عصر الموبايل..(انت فييين؟)
والرد الطبيعي على السؤال السخيف و (الحشري ) ده هو :
- وانت مال "...." ؟!!


مرة قريت مدونة بتتكلم عن نفس السؤال بس مش في الموبايل، ده سؤال عام في الحياة بنقابله بشكل متكرر اول ما حد يقابلك يقوم (يثبتك) ويقول لك "انت فين..؟"
وعجبني قوي فكرة المدون اللي اقترح انه السؤال عشان يكون كامل الدسم لازم يكون (انت فين مني...؟) (';')

نفسي افهم يفرق في ايه مكان تواجدي مع المتصل اللي غالبا بيكون عاوز يسال عن حاجة وغالبا بيكون ردي بالتليفون ولا يحتاج الموضوع لتواجدي...!!
ولا هو مجرد فضول سخيف لمعرفة معلومة تخص (الآخر) وخلاص..؟؟
او مرض وتفشى في المجتمع اللي عاوز من وجهة نظري "يعاد تربيته من تاني"..!!

اظرف المواقف اللي قابلتني بسبب بحثي في هذا السؤال انه مرة واحد صاحبي كلمني على التليفون الارضي الثابت والمعلوم مكانة في بيتنا وتاني جملة قالها بعد "آلو"..هي السؤال المحبب إلي (انت فين)....؟؟؟
وطبعا الاجابة المتوقعة مني وانا راسم بحواجبي رقم 88 (هو سيادتك طالبني فين...؟؟!!!)

هناك 20 تعليقًا:

safa7_karmooz يقول...

ليا ناس اصحابى كده

فلما السؤال بيتسأل بقيت ارد بالظبط
انت فين ...فى الصالون ...على الكنبة ...على الارض

^_^

او عاوز تفقعه ...قوله فى الكرة الارضية :p

غير معرف يقول...

ههههههههههههههههه

Cute Kitty **sookra يقول...

اه والنبى صحيح اصله دا شعب ابن تيت عاوز يتربى من جديد
يلا بقى ياتيمو على الله ثم عليك المهمه دى ......
شد حيلك وربيه وتعالى نغيرها ونقول :
الوو
ايوه
انت مشغول ولا ممكن نتكلم شويتين ؟
بمنتهى البساطه لو مشغول موش هارد على التليفون .
وسلملى على الكوسه

غير معرف يقول...

تصدق اول مرة اخد بالي من الحكاية دي؟
سؤال مستفز فعلا

dodooo يقول...

temooooooooooooo....enta fen mny ya temooo

حـــلـــم كـــان يقول...

هههههههههههههههههههههه

لما يقولك برخامه انت فين خليك ترخم وقول مش هنا

حرووف يقول...

متشكرة لزيارتك مدونتي وان عجبك كلامي
ثانيا بقا دة خلاص بقا السؤال الكارتوني المعتاد
بس انا حقوللك حاجة
لما يسالوك انت فين وهما بيتصلوا ع موبايل بيشوفوك في لابيت ولالا عشان يقفلوا ويتصلوا ع الارضي
ولو بيتصلوا ع الارضي بيشوفك في اوضتك ولا في الصالة عشان الكلام اللي بعد كدة حيكون سرر
هذة خبرتي في الحياة ههههههههه

كل سنة وانت طيب
دمت البف خير

كرسي أعتراف يقول...

سلامي إليك وتقديري

أحب أن أوضح لك أن مثل هذه الأسئلة تعبر عن نمط ثقافي ... فلا تجد هذا السؤال أو هذا التطفل من قبل شعوب اخري ... أو ربما يكون بادئة كلام لمن لا يجيد التعبير عما يجول بخاطره

شكرا

vision يقول...

مدونة لطيفة...بس انت فين اكيد المقصود بيها...فينك يعنى غطسان ...مش باين...وكما قال الفنان القدير حسام حسنى فى اغنيته المغموره الشهيرة جدا الهابطه جدا ...انتى فين دلوقت دلوقت دلوقت....انتى فالناد ى ولا مع دادى...ويا صاحباتك ولا زميلااتك ..ولا جارتك تحت...دلوقت..دلوقت..دلوقت

عاشقه الرومانسيه يقول...

انا اول مره اخد بالى من السؤال ده
رغم انه فعلا بيتكرر كتير
ودايما بارد عليه بكلمه واحده
فى الدنيا

كرسي أعتراف يقول...

كل عام وانت بخير

سندريلا يقول...

السلام عليكم/ بجد هو سؤال مستفز وفى نفس السؤال بس بطريقه تانيه (هى بتتكلم مننين) والرد اللى يجننهم من بوقى ههههه وده لو على التليفون الارضى او المحمول لان شيىء مش يخصهم المكان المهم الطلب اواللى عاوينه

~ISLAM~ يقول...

دى رخامه يا معلم
والرخامه واجهها بالرخامه
وعلى فكره هو بيبقى موضوع فضول مش اكتر
متلاقيش انت حد بيسأل عليك لله فى لله دلوقتى
وكل سنه وانت طيب
حلو اوى البوست اللى فات
بتاع المبادىء كلامك عجبنى جدا
بس معلش انا بوفر فى الكومنتات ههههه
كل سنه وانت طيب تانى
عيد سعيد عليك وعلى كل الناس

كرسي أعتراف يقول...

أدام الله لكم الأعياد دهورا
وكل عام وأنتم بألف بخير


ياسمين

micheal يقول...

هههههههههههههههههههههه..ده حد غريب أوي فعلا
:)
أنت فين دلوقتي
:))
عيد سعيد
تجياتي

Right Man in Wrong Time يقول...

الســلام عليكم تويتى...

طيب ليه ما تقولش إن المشكلة فيك انت يا تموره... يمكن لأنك لسه إنسان بتفهم الكلام وتتمعن فى معــناه...
بمعنى إن لما حد بيقولك (انت فين) بتفهمها على إنهـا فعــلاً ســؤال المقصود منه يســألك عن مكانك أو عن أخبارك أو إنك مش باين أو ما بتســألش عليه.. لكن لو اعتبرت إن كلمة (انت فين) دى هيا أصــلا جزء من كلمة (ألو) اللى بنفتتح بيها المكالمة.. يعنى مثلاً اللى تليفونه يرن مفروض يكون رده (ألو.. انت فين) بدلاً من (ألو) بس..
وبالشــكل ده مش هتدايق أبداً من الكلمة لأنك ما بتدايقش من كلمة ألو دلوقت...
عبش الحياة بمفهومها الجديد يا توتى...

غير معرف يقول...

"ألو ....أيوة يا مريم" ..." ايوة يا احمد انت فين اية الاستهتار دة" يرمى احمد التليفون فى النيل... "10000 مبروك" ......

still-searching يقول...

انت فين ده سؤال بيكون نوع من المجاملة
اللي هو انت فين يا راجل مبتسألش ليه

وبيكون معناه نوع من الاطمئنان ومش مستني منك أي رد

غير إنك تقوله تحت النظر يا باشا :D

غير معرف يقول...

الفضووول ..
الفضول الأزلي اللي بقي ملازم لمعظم البني آدمين اللي في حياتنا ..

ساعات بيكون خوف وحب ..
يعني، ممكن تكون الطريقه والشخص بيفرقوا كتير ..

او
ممكن تكون الحكايه كلها احنا .. ممكن نتقبل ده من حد معين ونمقته من حد تاني ..

Sahar Elgafary يقول...

بسم الله والصلاة علي رسول الله
أنه العقل الراكد في دنيا التفاهات..
فلا واجهه..ولا هدف...ولا غرض هام ينشده من ذاك الإتصال..لو عقل كل منا عرف واجهته..لتعلمت ألسنتنا طريق الصواب في الحوار والكلام...لكن للأسف أصبحت العقول فارغه الي حد يصعب معه الحياة...ولا نملك من أسئلتنا في النهايه سوي سؤال وحيد ...أنت فين؟!
بالمناسبه أنت فين ؟!
مررت 4 مرات وأولهم فريده...ولم تمر مره..
ومدونتي فريده !!!