الجمعة، مارس 05، 2010

تعليق...لا يليق..!!

زي ما قلت انا شخصية بتحب الاهتمام بادق التفاصيل.. وحاسس اني ها اموت من كتر التخيل والتفكير في ادق التفاصيل دي.. بالظبط عامل زي ما تكون حياتي كلها...جزء كبيييير من فيلم Final Destination نقطة صغيرة ..اسرح فيها واهتم جدا بيها وتفضل شاغلة تفكيري لدرجة انها تمنعني افكر في اي حاجة غيرها.. وفجأة الاقي حاجة شدتني لحاجة... والحاجة بتوديني لحاجة تانية..
 وشوية شوية ألاقي نفسي دخلت في حدووووتة انا نفسي مش عارف اخرج منها غير وانا هنا بأكتب عشان انظم افكاري وافتكرها..!!
 نرجع تاني لموضوع التفاصيل..ديما باتاخر في البوست يمكن لاني بحب اهتم بكل حاجة ومش بحب اكتب لمجرد الكتابة وبس.. ولا اعلق عند الناس لمجرد اني ابقى سيبت تعليق وبس..!!
ديما قبل ما اعلق على بوست باهتم اخد جولة في المدونة الاول واتعرف طبعا على كل بيانات وشخصية صاحبها قد ما اقدر لانه ممكن شخصيته مش بتظهر في بوست واحد..
وفي مرة من المرات كنت باتصفح مدونة وصلت ليها بالصدفة وفهمت بعد ساعة من التسلسل في القراْة بتمعن ورسم شخصية صاحب المدونة اكتشفت ان صاحبتها ماتت من سنة 2007 ..!!!
وسبحان الله..المدونة شغالة بآلية من لا يشعر بموت صاحبه.. وبتتلقى رسايل وتعليقات الاصدقاء..!!
وانا بأتابع القراءة.. وتسلسل التعليقات.. فات علي أصعب جزء في التعليقات اللي فيها نقطة التحول.. ما بين عتاب على الغيبة ودهشة من عدم الرد..إلى صدمة تلقي خبر موت صديقتهم لان اختها كتبت تعليق تقول انها ماتت وان الباسوورد مش مع حد عشان كده هي كتبت تعليق تعرف فيه الناس الخبر ده.....!!
صممت اكمل التعليقات للآخر...واتابع التواريخ بتاعتها.. واشوف الزمان عمل ايه في المدونة واتابع مشاعر الاصدقاء المقربين وهي بتتغير وتقل.. وفي خلال دقايق اكون تابعت الشريط الزمني لسنتين وكأني باشوف فيلم بيجري قدامي...!!
الاصدقاء كانوا كتير في اليوم الواحد..وبعدين بيقلوا...بيقلوا..!!
بعدين فاتت شهور..وجه حد يترحم عليها.. وبعدها في الذكري...دخل اصدقاء...والمفاجأة انه المدونة شغالة بنفس الآلية..الرتيبة..!!
وكأن المدونة نجم تم اطلاقه في الفضاء..وقدره انه يلف في مدارة الى ما شاء الله..ويشهد على محتوياته كل من يشاء..!!

..  طول عمري بقول (اصعب حاجة في الكون هي الاستمرارية) وأديني عرفت معنى جديد وشعور خفي جوة الصعوبة دي..ما اعتقدش حد هايلمسة زي ما انا حسيته...!! وتخيلت نفسي بسال نفسي سؤال مهم جدا... لو انا مكانها..يا ترى مين ها يواظب على انه يزور مدونتي ويدعي لي بالرحمة زيها..؟؟ وهو ده....معنى الحب الحقيقي..!! المشكلة الاكبر انه لما حد بيموت بنقول ان الزمن اعظم دواء يعني ها يداوينا بالنسيان.. لكن لما يبقى للانسان العزيز علينا مدونة...واحنا عارفين عنوانها...!!
كل ما ها ندخلها..هنلاقي اخر بوست هو كتبه...يعني بروحة وهو وسطنا..والحالة المزاجية اللي كان فيها وقتها.. وندخل ع التعليقات نلاقي كلامنا ونفتكر مشاعرنا وقتها...وطريقته في الردود علينا بتلقائية...وكمان ها نشوف تعليقاتنا المصدومة وهي بتتغير لما فارقنا
صديقنا واحنا بنبعتها وعارفين انه (مش ها يرد علينا ابداا)...!!

الحكاية عــاملة زي الدوايــــر..
 دواير صغـيرة..جوه دايرة كبيـرة
 الدوايـر الصغيـرة ممكن تتغيـر..
 لكن الدايرة الكبيرة ما بتتغيرش..!!

المهم وانا منساب في افكاري ومتعمق في التخيل والتفكير.. اذا بي الاقي مدونة مبتدئة غير مدرجة .. وغير قارئة..  داخلة تسيب تعليق بالطريقة التالية: ( السلام عليكم.. زيارتى الاولى..وباذن الله لن تكون الاخيره.. البوست رائع..سلمت يداكى ..دمتى بخير بانتظار زيارتك)
يااااااااااااااااه..!!
للدرجة دي..الناس هي كمان بقت ماشية بآلية... ومن غير تذوق او اهتمام بالآخر او بأي فارق..!!
 كل اللي يهمهم يقوموا بمهمتهم ويجمعوا اكبر قدر من القراء..!! و يعملوا الاعلان بتاعهم..عشان كده بقول وبقول وبصوت عالي..وعاوز اوصلها لكل المدونين..التعليقات تهمني.. لكن اللي ها يرد بالآلية الجافة دي ها اقوله شكراً.. بلاش ترد احسن لانه الرد من النوع ده مش محتاجه..!!
أنا مش هأدون لمجرد التدوين.. وأنت بلاش تعلق لمجرد التعليق..!!
 
الاغنية دي ما تتخيلوش حلوة ومعبرة قد ايه..
Ain't no sunshine when she's gone
It's not warm when she's away
Ain't no sunshine when she's gone
And she's always gone too long anytime she goes awy

هناك 110 تعليقات:

still-searching يقول...

والله يا تيمو أنا كنت هعيط لما قريت التدوينة دي

ياريت كلنا فعلا مش نسيب بس مدونة
الناس تزورها وتترحم علينا

لا نسيب عمل صالح وصدقة جارية تنفعنا في آخرتنا

وأنا معاك في شعار:

"أنا مش هأدون لمجرد التدوين..
وأنت بلاش تعلق لمجرد التعليق..!! "

مجرد حلم صغنتوت يقول...

كلامك صعب اوي يا تيمو
يمكن علشان بتخليني افكر في حاجات مفكرتش فيها قبل كده
التدوين المفروض انه حالة خاصة بتعبر عن صاحبها
ناس بتحب تعبر بطريقة اليوميات.. ناس تانية بطريقة الخواطر
المهم ان كل واحد بيبقى ليه هدف من ده
اللي بيدون من غير هدف يبقى المفروض ميدونش من الاول

ربنا يرحمنا لما نبقى زي صاحبة المدونة اللي انت زرتها دي
ويا رب الناس تفتكرنا بالخير ساعتها وتدعيلنا

حروف يقول...

عشان كده بقول وبقول وبصوت عالي..وعاوز اوصلها لكل المدونين..التعليقات تهمني..
لكن اللي ها يرد بالآلية الجافة دي ها اقوله متشكر..
بلاش ترد احسن لانه الرد من النوع ده بيسبب لي ألم نفسي لا تتخيلة..!!
أنا مش هأدون لمجرد التدوين..
وأنت بلاش تعلق لمجرد التعليق..!!


بتقول اللي انا عايزة اقولة بجد

انا التعليق بيهمني ممكن يفرحني اوي وممكن يحبطني اوي اوي واصاب باكتئاب

يمكن دة السبب اني مش بزور اي حد ولا بعلق عندي ف المدونة وبهتم اني اروح للي زارني واقرا اخر حاجة نزلها واعلق وارد عليه لو كان سأل عن حاجة

سؤال؟؟

انت فين مش بتيجي ؟؟؟

دمت بخير

The illusionist يقول...

اقسم بالله انت راجل بتفهم
وموضوعك ده مخلينى عاوز اكتب بوست عندك
والله فى تعليقات فعلا قمه الاليه
تعليق مثلا
ههههههههههههههه
وتعليق تانى
يخرب عقلك
وتعليق تالت
اه والله انت فعلا مفيش منك
وتبقى كاتب حاجه
طز فى راى الناس يا عم
انا كاتبها
عندك راى عدل
قوله
معندكش
يبقى غور من هنا
لا
تلاقى واحد مقراش حرف اصلا
ويقولك
اها
دى قصه جميله
واكتر حاجه مخلياها
حلوه
انك انت اللى كاتبها
انت مبدع
رهيبه
ايه الجمال ده
ده كلو
عشان يدارى انو معفن ومنافق
الاليه دى مقرفه
وانا عن نفسى
اى تعليق من النوع ده
بمسحه
لانى ميشرفنين
ان حد يعدى غندى
عشان يعمل كده
صومت انت كتير
وكتبت بوست محترم
وانا باذن الله
لما ظروفى المتعسره تنتهى
هخش ارزع بوست فى الجون عن الحكايه دى
ربنا يسهل بس
انا فعلا ظروفى وحشه قوى حاليا
بس موضوعك شدنى وكان لازم ارد
واكيد
انت من حبايبى اللى بيفتكرونى

أحمد عاطف يقول...

بسم الله الرحمن الرحيم

زيارتي الاولي ... وباذن الله لن تكون الاخيرة

اتمنى زيارتك

سلام عليكم



الكام كلمة دول مش آلية رد انا باعتبرهم هطل رد

باحس ان اللي رد عليا بيهم او على اي مدون اخر انه مجرد واحد اهطل

اروح مدونته اتاكد من دا

انا بادخل مدونات قد تصل ل 100 مدونة احيانا مبلاقيش رد بقول لو رديت برائع ولذيذ

هاعرفه اني قريت لكن مافدتوش

طيب ارد اقول ايه

اقوله انا قريت ومش لاقي تعليق

ممكن يفهم غلط

طب ارد اقول ايه

بلاقي نفسي باعمل حاجه واحده

باقفل المدونة واقول هو فعلا كتب موضوع حلو بس انا مش لاقي تعليق

يارب يكون عرف اني قريت

.... انا حبيت اقولك ان موضوعك

رائع ولذيذ

ومش هاتكون زيارتي الاخيرة

اوعى تزورني لان الموضوع اللي موجود دلوقتي عامل زحمة ودوشة

سلام يا تيمو

فكرة من الزمن ده يقول...

ياااه ياتيمو البوست ده جميل بجد
عارف حسيت اني باتغير بقرايتي للكلام ده وحسيت اني سعيدة جدا اني اتعرفت علي شخص زيك واني من المحظوظين اللي انت زورتهم وقريت تدويناتهم القديمة وتجولت في شخصية مدونتهم ومش مجرد كلمة ناس بتقولها ((اني تجولت في المدونة وعجبتني))

فعلا التعليق لمجرد التعليق مش بيسعدني انا كمان
وكمان التعليقات اللي بتدعوك للمشاركة في مدونتها بالراي من غير حتى لما يكلف نفسه ويقرا ويشارك انت برايه


اكتر جملة ضربت جوة راسي


والحالة المزاجية اللي كان فيها وقتها.

تخيلت مشهد في فيلم الف مبروك لما كان احمد في اخر تكرار لليوم بيوصي صديقه على اخته وبيسمح لمشاعره لاول مرة تجاه احته انها تخرج بطريقة صحيحة ولما بيوصي امه انها تتعالج وتفرح مهما حصل وتخيلت ساعتها انه بعد لما بيموت الشخص الناس بتفتكر اخر احجات هو قالها ودايما بيقولو كان قلبه حاسس

وسبحان الله لقيتك كاتب


الحكاية عــاملة زي الدوايــــر..
دواير صغـيرة..جوه دايرة كبيـرة
الدوايـر الصغيـرة ممكن تتغيـر..
لكن الدايرة الكبيرة ما بتتغيرش..!!

من نفس الفيلم

يعني يمكن الاحساس او الافكار اللي كنت بتفكر فيها وصلت لدماغ فكرة وهي بتقرا كلامك وعرفت توصل لنا انت بتفكر في ايه
تحياتي ياتيمو واحترامي

راء يقول...

شوفت مدونة شبه اللي حكيت عنها
واثرت فيا جدا
بتدويننا هنا احنا بنكتب التاريخ ..
وبتدوينا ممكن نغير فكر ونكتب احاسيس كتير ممكن تساعد غيرنا..

انت متخيل مثلا بعد 50 سنة ولا حاجة وتلاقي حد داخل مدونتك لسه وبيقراها!!!
هوا ده عالم النت مستمر وبيتجدد بس اساسه ثابت

واعتقد في طبيعة الانسان اهتمامه بالتفاصيل..اعتقد انك بتفكر بالجزء الشمال من دماغك اكتر

مش بحب ردودي تكون جافة كده ولا احب ان اي رد ييجي عندي يكون بهذا الشكل واعتقد اني مبزورش اي مدونة بتقولي مستنية تعليقك عندي..بحس ان عالم التدوين بقى عالم مصالح وانا ضد الفكرة ديه نفسها

بيتهيألي اني مش عارفة ارتب الرد بس هقول اللي عاوزاه كله

وهيا ان حياتنا بتدور حوالين شيء واحد زي فاينال ديستينيشن بس كل واحد يقدر يحدد هتدور حوالين ايه الموت..ولا التغيير وانه يسيب بصمة..ولا الوقوف والجمود بدون اي تحرك..الدايرة واحدة بدايتها هيا نهايتها وانت اللي ترتب الدواير الصغيرة بمزاجك

من مدة قولت..
"الحياة بأكملها مجرد دوائر مترابطة لا يمكن تحديد أيهم تتداخل مع الاخرى
ولكن بطريقة ما يمكن برمجة الدوائر كما نريد.."

بوست متميز..بس انت بتتأخر ف المواضيع اوي مش معقول كل الفترة ديه مكنش فيه افكار بتدور وبتدور على مخرج!!

Remas يقول...

ازيك ياتيمو

انا بئيت عارفه انك مشغول دايما علشان كدا مش هاقولك انت فين هاقولك ربنا يعينك يارب ويوفقك في شغلك

بس ابئا طمنا عليك بكلمة صغنونة

انا يمكن اول واحدة قريت البوست لما نزل بس بجد مش عرفت ارد خالص وقتها لانى فعلا دخلت كم مدونة اصحابها الله يرحمهم توفو
وبجد اثرو فيا جداوتخيلت مدونتى بعد وفاتى

وازاى فعلا كلمة بتفضل وصاحبها ساب الدنيا

عارف يا تيمو انت البوست بتاعك فكرنى باختى الله يرحمها مع انى مش بنساها
بس صوتها على موبايلى بيخليها توحشنى اوى وبيخلينى افكر في مليون حاجة

مش عارفه يمكن خرجت برا الموضوع واتكلمت كتير
سورى بجد

اما التعليق بئا فانت عارف رأيي
ان في حاجات فعلا بتفرق اوى انا بدايق جدا من حد جاى بس يعلق تأدية واجب او علشان الزيارة ترد له مش اكتر

بحس ان التعليق زى قطعة تلج مش فيها اى لمسة دفا

علشان كدا انا قعلا كتير بدخل مدونات ومش بعلق لانى مش بحس ان عندى حاجة اقولها

تيمو انا عارفه ان تعليقى ملخبط معلش سامحنى بليز

انا بئالى فترة كدا مش في المود

Mona Shereif يقول...

انا فرحت جدا لما قرأت تعليقك عندى
ليه بقى
لانى انا بعمل كده
بدخل المدونة الجديدة دى على اساس انها كتاب قدامى
امسكه من اوله لاخره حتى بتعليقاتها
وساعات كتير برد على موضوعات قديمة وبرضه ساعات مبعرفش ارد مش علشان معجبتنيش لاء علشان مش لاقيه كلام اقوله فى وقتها وساعات كسل

عارف انت نبهتنى لحاجه
دايما بقول انى نفسى اعيش بعد ما اموت
دلوقتى اتحققت
الحمد لله رب العالمين

على فكرة
I LIKE YOUR NAME

lostlove يقول...

بوست حلو بجد

مينفعش اننا نروح نسيب رائ علي كلام ميستهلش اننا نقول رائ فيه لمجرد جمع عدد تعليقات
مش شرط كلامي ولا كلامك ولا كلام اي حد يعجب كل الناس
الي بيكتب بيوصل رساله
والي بيعلق بيوصل رساله اهم
يعني لو كتبت تعليق مجامله مينفعش
الي بيعلق ياكتب الي حسه يابلاش منها خالص
بوص يا تيموو هي حمله ونمعملها تحت شعار ياتعلق باحساس يا تنفض وخلاص




بس في البوست ده وحشتني فريده اتعودت عليها في كل مواضيعك

وفيلم القدر النهائي حلو اوي

بس انته ليه حاسس انك جزاء من الفيلم ده بزات؟؟

تحياتي

اتمني التوفيق

سمسمة الاسكندرية يقول...

انا بصراحة اول مرة اكتب تعليق لانى كنت الاول بقراء من غير مااسيب تعليق لانى مكنتش بعرف اقول اية بس بجد الكلام دة اثر فيا اوى لانة فكرنى بموقف حصل معايا ان كان ليا زميل فى الكلية واتوفى بس قبل وفاتة كان عملى الحرف الاول من اسمى على الورق وفضل الحرف موجود وهو اللى معدش موجود انا شكلى كدة طولت عليكوا بس انا فعلا اتاثرت بالموضوع ومن رائى اننا نعلق على اى موضوع لما نحس بية اوى غير كدة بلاش

بنت المحلة يقول...

انا دايما بقراء المدونة دية بس معرفش غيرها ممكن حد يقولى على اسماء مدونات غيرها وشكرررررا

رشا عبيد يقول...

ياه بقالي زمان ماشوفتش المدونات والناس بتكتب ايه والنهاردة قولت ادخل افرفش شويه واضحك ع الافهات والحكايات اللي الناس بتمر بيها وبتدونها بس للاسف نكدت علي وخليتني مش قادرة اتصفح اي حاجة تانية
تحياتي

miroooo يقول...

السلام عليكم
بجد البوست وكلامك خلانى اعيط كلامك هزنى حقيقى مش عارفه ليه؟ مع انى عمرى متخيلت انى اعلق لمجرد التعليق او انى عملت حاجه زى كده فى يوم من الايام بس بجد استفدت كتير من كلامك اشكرك لانك علمتنى شىء مهم وهو الاهتمام بامور الاخرين ومتابعه اخبارهم واتمنى لما نبقى زيى الصديقه اللى اتوفت نلاقى حد يزور مدونتنا ويترحم علينا ويفتكرنا بالخير
دمت بكل الخير

صدى الصمت - عاشقة الورد - يقول...

فعلاً عندك حق بخصوص التعليقات المكررة
ساعات بأدخل عند مدونين كتير وبألاقى الشخص نفسة سايب نفس التعليق بالظبط عندهم كلهم وكأنهة مش بيقرأ البوست ولا يتفاعل معاة
تحياتى

Aиgel يقول...

السلام عليكم ورحمة الله وبركاته

تيمو .. أنا مبسوطة أني جيت المدونة دي بجد
وف نفس الوقت زعلانة أني كل الفترة دي معرفتهاش
بس أحب اقولك أني مسيبتش ولا بوست هنا ألا لما قريته
بجد كتاباتك رائعة ومختلفة وجاذبة كده بشكل غير طبيعي " ويا بخت فريدة " (:
أنا هرغي كتير أوي في التعليق ده علشان أعوض اللي فاتني (:
............
تعليقي ع البوست ده
بدايةً اسمه حلو أوي وله معاني كتير
ثانياً .. الدقة في جميع الأمور مهمة جداً مع اختلاف مقايسها من شخص لأخر وإن كنت مما يهتمون بالدقة بشكل غير طبيعي .. وأنا معاك جداً في حكاية ان الواحد مش يكتب لمجرد انه يكتب ومش يرد ع الناس علشان يثبت وجوده ع الساحة D:
وكون أنك تفاجئ بأن أحد المدونين توفى والرفاق ما زالوا لا يشعرون وفي روح لسه في مدونته .. فا ده أنا بصادفه كتير جداً ويمكن بلاحظ أنهم متواجدين في مدونته أكتر من اللي لسه عايش حقيقي وسطيهم لكن في نظرهم .... !!! ميت
الزمن اعظم دواء يعني ها يداوينا بالنسيان
صعب أوي وفعلاً اللي وصفته من عتاب ومراجعة النفس في اللي عملته وسرد الذكريات من جديد بيحصل كتير أوي بس خصوصاً لما بنفقد شخص كان في حياتنا حتى لو من بعيد

أما بالنسبة للتعليق اللي وصلك ومدى جفائه .. فلا تعليق لأني بصادف كتير أوي من كده والمسألة للأسف بقت خد وهات وزي ما هرد هترد عليا وكأن المدونة دفتر لتسجيل المرور فقط ليس ألا !!!!

الأغنية وباقي الموضوعات السابقة هرد عليها في تعليق تاني علشان أنا خارجة دلوقتي D: بس مقدرتش مردش بصراحة (:

سعيدة اوووووووووي أني عرفت مدونتك دي

خالص ودي واحترامي

Angel love

Remas يقول...

يا تيمو اخيرا ظهرت

والله بقلق عليك

وبكون مبسوطة جدا لما الاقي كومنت منك

عندك حق انانية بس عموما الانسان انانى بطبعة من غير حتى ما يحس حتى لما يحب حد اوى يقول له ربنا يخليك ليا

وبعدين الانانية مفيدة اهو واوحيت لك بالبوست

ههههههههههههههه

مش تقلق دا سر بينى وبينك وفريدة مش هاتعرف اى حاجة خااااااااالص

اتفقنا يا تيمو ؟

micheal يقول...

شر البلية ما يضحك !
بقى البوست عجب سيادته..مممممممم..لا تعليق
عموما الله يرحمها..متهيألي قصدك على شيماء؟
احترم تأملك للموضوع..عن نفسي انا مش مدي الباسوورد لحد.
تحياتي

داليـ ـ ـ ـ ـ ـ ــــا يقول...

عايزه اقلك ان الاحساس ده فعلا صعب وحلو اوى منك انك حاولت تتخيل نفسك مكان البنت دى
انا حاسه اوى الكلام ده لانى جربته
معلشى انا خدنى احساسى كده واندفعت من غير حتى سلام
حبيت اعلق بسرعه قبل ما يروح احساسى بكلامك
ازيك ياتيمو
انا مبسوطه اوى انى اتعرفت على مدونه حلوه زى دى بجد
يكفى الوقتى وانا بقرء كلامك حاجه جوايا اتهزت وعندى فضول كبير ادخل المدونه الا انتا كنت فيها دى
تحياتى الكبيره

خوخه يقول...

السلام عليكم جميعا
ازيك ياتيمو
يارب تكون بخير دايما
ياريت كلنا ندعيلها وندعي لغيرها بالرحمه ولكل موتانا جميعا
تحياتي ("خوخه )

vision يقول...

يوووووووووووووووه كنت عاملة كومنت طويل عريض واتمسح.....بس كنت بقوللك فيه ان عمرى ما كنت بدى اهتمام بالناس دى الى حافظة مش فاهمة...زيه زى تعليقه الى علقه بالظبط لأنه بيبان....انت محضرش واح\ كان اسمه ديفيد برتغالى..وكان داير على كل المدونات وكل المواضيع بتعليق عجيب غير مفهوم كان بيقول فيه(جيد الأسبوع)..ربنا يرحمها....الكتابة بتكون ديما عاملة زى النقثش عالحجر

اما عن الأغنية فدى واحدة من الأغانى المفضلة بالنسبالى بجد.

Tamer Moghazy يقول...

لسه بدوّر:
سلامتك ولو ان العياط حاجة حلوة مش وحشة قوي..
وبالنسبة للشعار يلا بينا ننظم حملة بنفس الشعار :)

=============================

مجرد حلم صغنتوت:
لو كلامي صعب..فا الحياة والواقع اصعب بكتير..
انا بقول ده عشان الناس تعرف وهي بتكتب ايه اللي هي ها تسيبه.

=============================

حروف:
ازاي بقول اللي انت عاوزة تقوليه يا حروف..؟
مش ده كلامك اصلا وانت طلبت مني انشره عندي..؟
(وش بيطلع لسانه) + (وش خبيث موووت)

اما اجابة السؤال..انا كل ما بيكون فيه فرصة باجي وبجد مش باضيعها لاني ديما مختفي وباتحرك لدرجة محدش يتخيلها (';')

Tamer Moghazy يقول...

The illusionist :
اولا اسف على التاخير يا زناتي بك.
ثانيا ما تعرفش تعليقك ده عجبني قد ايه لانك قولك كتير من اللي انا كنت عاوز اقوله وخاصة الكوبليه ده:
"عندك راى عدل..قوله
معندكش..يبقى غور من هنا"

وكمان الكوبلية ده موتني من الضحك:

"ويقولك..اها..دى قصه جميله..واكتر حاجه مخلياها
حلوه انك انت اللى كاتبها..انت مبدع..
رهيبه..ايه الجمال ده
ده كله عشان يدارى انو معفن ومنافق"

بجد نورتني يا زناتي بتعليقك وديما ها استناك :)

Tamer Moghazy يقول...

احمد عاطق:
معلش اتاخرت عليك اعذرني..
هو فعلا زي ما سميته (هطل رد) وطبعا ما ينفعش اني حتى افكر ان دي زيارتك الاخيرة لاني ديما باستناك..
تحياتي :)

طوبه فضه وطوبه دهب يقول...

عارف انت كل بوست بتكتبه بيفكرنى بافلام احمد حلمى اللى لو بصيت عليها بسطحيه هتطلع منه بفكره ولا اتنين انما لو وصلت للمغذى وتعمقت فى المعنى هتطلع بالف معنى ومعنى عشان كدا بحترم الممثل والشخصيه دى جدا تسلم ايدك وخليك على نفس النهج لان فعلا الحياه دواير كبيره جواها دواير وتفاصيل صغيره وعلى فكره لما تدقق فى التفاصيل الصغيره مش هتوه ولا حاجه ذى ما بنفتكر بالعكس هنقدر نوصل لمغذى الدواير والاهداف الاكبر ونرسم لها صوره اوضح دا رائى

أسماء حسين يقول...

أنا بردوه أول مرة أزور مدونتك الجميلة دى..بس مش أخر مرة :)
بجد انت كتاباتك جميلة جدا وأنا عجينى انك اثرت الموضوع دة لان الكتابة والتعليقات احساس وفكرة مش مكان بيتملى وخلاص
عن نفسى بصراحة..بزور مدونات كتير وبحب أوى اقراها واتصفحها لكن أوقات مش بعلق ولا بكلمة رغم ان البوست عاجبنى جدا..يمكن لان مبقاش فى كلام يتقال وغير كدة هيكون تزييف ملوش معنى ولا لزمة
وعاوزة أقولك ان حصللى موقف زى كدة مرة كتبت بوست بابيات شعر جميلة عاجبانى لبنوتة فوجئت بيها بتعلق تعليق مهين جدا وبتهمنى بالسرقة وبتطلب حذف البوست رغم انى منوهة انه مش شعرى وكاتبة ان الكلمات عجبتنى
اد ايه دايقنى انها قابلت اعجابى بفكرها باهانة لفكرى !!
تحياتى ليك بجد على كل كلمة فى مدونتك الجميلة دى وأنا لسة ما غزتهاش كلها لكن هيتم الغزو خلال الفترة دى ان شاء الله :)

شاب فقرى يقول...

رائع ما كتبت أخى الفاضل

دمت بكل ود
خالص التحية والتقدير

شاب فقرى

======================
مقدرتش أقاوم نفسى فى غنى اعلق تعليق رخم :$

تعرف يا صديقى

الإستمرارية عذاب بلا حدود

اه والله
الناس تفضل تتكلم عليك
وتجيب فى سيرتك وتقرالك
وتطلع عليك حاجات غريبة
وكمان لو انته كاتب حاجة على غير فهم
وحد خدها ومشى بيها
هتكون الكارثة الأعظم
وتاخد فى سيئات بقى

هوا لو واحد ساب لنا ساعة ومات
هنفضل فاكرينه بيها على طول
ويمكن الساعة قيمتها تتطور وتبقى غالية علينا اوى
لانها بتفكرنا بلحظة غالية علينا فى حياتنا
لنفس السبب اللى الزوجة بتحب فستان فرحها وصور الفرح
يمكن تكون عايشة فى نكد مع الشخص دا
ولكن
بتحب اليوم دا
بتعتبره اسعد يوم فى حياتها
بتفتكر احساسها واحلامها
اللى انته قلته
بيفكرنى بكدا بالظبط
ان انته بتحب شىء مثلا مدونة وبتفتكر تفاعلك معاها
انقل الموضوع للواقع بقى
هتلاقى نفسك بتحب كتاب الكيمياء بتاع ثانوى لانه بيفكرك بمدرس المادة اللى كان بيعاملك كويس
وتلاقيك بتحب الفرنساوى مع انك مبتفهمش فيه الا عشان استاذ بتحبه اوى

احنا بطبيعتنا بنعمل ربط
مش قادر اوضح فكرتى اكتر من كدا للاسف
بس هرجع للموضوع

انته عارف اكتر حاجة عجبتنى ايه
كلامك وانته بتقول
ان انته تابعت تعليقات الاصدقاء المقربين

شفت الناي بتتغير ازاى ؟
شفت الناس بتنسى كل حاجة إزاى أحيانا
يمكن لأن صاحبة المدونة مكانتش صديقة بالنسبة لبعضهم بجد
بس اكيد فى حد كان بيعتبرها صديقة جدا
وبيخش يترحم عليها
لحد النهارده
ويمكن هوا او هى هناك ناو
الله أعلم
خالص التحية
شاب فقرى
----------
برقية :)
(( لما بكتب تعليق كبير بيبقى توضيح لوجهة نظر مش مستنى عليه رد ضخم ... متقلقش يعنى :D )
إبقى طمنى عليك صحيح بايميل كدا وقولى اخبارك ايه
وعلى فكرة انا مبسوط اوى بالبوست دا وزعلان اوى
وهبقى اقولك ليه
فقرى

قوس قزح يقول...

اولا
ميرسى على زيارتك لمدونتى المتواضعة و ميرسى على كلماتك الجميلة
و كان يشرفنى معرفتك قبل ما ابعد عن التدوين

ثانيا
فى حالة البنت اللى تركت تعليق ..ممكن جدا تكون مش بتقرا تعليقات غيرها بس بترد عادى على البوست ..فى ناس بيهمها البوست و بس ..و ناس تانية بيهمها تقرا البوست بتعليقاته ..و ناس تالتة مش بتقرا التعليقات الا لما تعلق الاول علشان متتأثرش بوجهات النظر المتروحة
يعنى مش شرط تكون البنت غير مهتمة .بس ممكن تكون مختلفة عنا فى طريقتها للمتابعة

لكن فى نفس الوقت ممكن تلاقى حد علق بدون ما يقرا زى مرة واحد دخل علق على بوست بيحكى موقف بكلمة مبروووووووك و بوست هايل ..شكله كان سهران فى فرح و اختلط عليه الامر :)

انا زمان كتبت عن التعليقات بوست .. ده لينكه لو تحب تقرا .. و ركز على ردود افعال المعلقين
http://kouskoza7.blogspot.com/2008/05/blog-post_08.html

Tamer Moghazy يقول...

فكرة من الزمان ده:
انا فعلا لما باتجول في مدونة بحاول قد ما اقدر ارسم صورة لشخصية المدون..
وبجد مش عارف ارد على الكلام الحلو اللي انت كتبتيه..
الاحساس او الافكار اللي كنت بتفكر فيها وصلت لدماغ فكرة وهي بتقرا كلامك وعرفت توصل لنا انت بتفكر في ايه (وش.....) ;)

Tamer Moghazy يقول...

طالبة مقهورة ..درجة أولى:
"بتدويننا هنا احنا بنكتب التاريخ"
هو ده اللي انا عاوز اقوله والله.. انا اصنع تاريخي وكل يصنع تاريخه..
- حكاية اني بافكر بالجزء الشمال من مخي دي اول مرة اسمعها بس ها ابحث فيها..!!
-انا عارف اني باتاخر بس الموضوع موضوع وقت مش اكتر.. يعني الافكار موجودة بس مشكلة وقت واتمنى اكون متواصل مع المدونة ديما..!!

على فكرة طريقة تفكيرك مرتبة ومش ملخبطة زي ما تخيلتي في تعليقك..نورتيني بالزيارة وفي انتظارك ديما طالبة (مش) مقهورة :)

Tamer Moghazy يقول...

Reem:
ريم..يا ريم..يا رييييييم..
سلامتك يا ريم مالك ملخبطة ليه وموش في المود..؟
طيب قوليلي اعمل ايه ليكي وانا مستعد اعملة عشان تبقي في المود :)

طب بتحبي تورتة الايس كريم..؟
ايه رايك..تعزميني عليها..؟
(وش خبيث )

Tamer Moghazy يقول...

Sometimes:
انت عرفت توصلي للمعنى اللي بين السطور يا منى بكلامك في التعليق (نفسي اعيش بعد ما اموت) وفعلا المدونة هي كتاب بتبين صفحاته شخصية الكاتب..
ها استناكي ديما تقري ما بين السطور (';')

Tamer Moghazy يقول...

Lostlove:
لو البوست حلو..فا بجد تعليقك هو اللي احلى.
وبعدين ما تيجي ننظم فعلا حملة انا وانت بالشعار اللي انت اخترعتيه"ياتعلق باحساس يا تنفض وخلاص"..؟
وبعدين يا ستي انا قلت اخبي فريدة جوايا شوية عشان توحشكم مش معقول كل شوية فريدة فريدة فريدة لحد ما كل الناس عرفت بفضيحتي :)

Tamer Moghazy يقول...

سمسمة الاسكندرية:
بجد نورتيني بالزيارة ولو اني مش عارف مدونتك ايه عشان اتعرف عليك اكتر..
وطبعا زميلك ساب لك حاجة حلوة ومعبرة عن مشاعر جميلة عشان كده ها يفضل عايش جواكي وديما ها تفتكريه بالرحمة ودي كمان مشاعر حلوة..
اتمنى اشوف تعليقك ديم وكمان نعرف مدونتك يا سومة :)

Tamer Moghazy يقول...

بنت المحلة:
بجد شرف ليا التعليق بتاعك..انك ديما بتقري المدونة دي..
اكيد فيه مدونات تانية كتير لناس بيكتبوا كويس جداااا بس مش عارف اقولك ازاي عليهم..
فا ابسط حاجة انك تعملي بحث جوه جووجل عن مدونات بالعربي وتكون بتنتهي بمقاطع زي .blogspot.com
نورتيني بالزيارة واتمنى ديما التواصل :)

Tamer Moghazy يقول...

رشا عبيد:
والله ما اقصد انكد عليك ولا على اي حد (وش مكسوووف موت) بس يمكن الحقايق ديما كده..!!
انا الموقف هزني وخلاني اتامل كتير حواليا عشان كده كتبته من وجهة نظري.

Tamer Moghazy يقول...

miroooo:
سوري اني خليتك تعيطي بس ده موقف حقيقي من الحياة ويحتاج لوقفة تأمليه فيما نفعله ويفعله الاخرون..!!

بالنسبة لتعليقك فا انا فيه كلمة بتتردد ديما في عقلي بتقول : (اقسى من القسوة على الناس..ان لا تبالي بمشاعرهم)
سعيد بزيارتك يا ميروو..وان فيه حاجة جواك اتغيرت بعد قراءة البوست :)

Tamer Moghazy يقول...

صدى الصمت..عاشقة الورد:
الناس اللي بتقولي عليهم دول حلهم الصمت عنهم ولا كأنهم موجودين ولا كأنهم علقوا لحد ما يفهموا مضمون الرسالة كويس..

Tamer Moghazy يقول...

Angel:
بجد مش عارف اقولك تعليقك غير لي مودي قد ايييه..
وحكاية فريدة دي شكلها اتفضحت قووووي...
ولو انه الموضوع (الصيت ولا الغنى) (وش مكسوف جدا)
وبجد انا مبسووووط قوي انك جيتي هنا وعجبتك المدونة والموضوعات فيها..
وكده يبقى اصدقائي زاد عددهم واحد عشان اعاتبك لو مش جيتي هنا تاني :)

بالنسبة لتعليقك ع البوست ده فهو فعلا زي ما وصلت..ازاي يكون الانسان عايش في قلوب اللي حوالية وهو ميت..ما يكون ميت ومحدش حاسس بوجود رغم انه...لسه عايش..!!

Tamer Moghazy يقول...

micheal:
منورني يا عميد ولو اني بجد مقصر في حقك..اعذرني لاني مش منتظم خالص..
المدونة مش فاكر اسمها لان الموقف خلاني اسرح لمدة طويييييييييييلة جدا ..ربنا يرحما كلنا.
وبلاش تتاخر علي وخليك انت احسن مني :D

Tamer Moghazy يقول...

داليا:
بجد نورتيني بالزيارة الاولى واللي ها استناها ديما و الجميل منك انك تقولي احساسك قبل ما يروح بسرعة بسرعة زي ما عملتي في التعليق بتاعك..لانه ناس كتير بتأجل احساسها لحد ما يقل وبعدين يموت وينتهي وكأن شيئا لم يكن..
ها استنى تعليقك ديما ؛)

Tamer Moghazy يقول...

خوخة:
اخييييييرا ظهرت خوخة..!!
ايه الغيبة دي كلها..؟
بلاش تغيبي فجاة كده عشان مش نقلق عليكي..:)
نورتيتي يا خوخه.

Tamer Moghazy يقول...

cmera_girl:
يا ميرووو....ياميروووو..
عرفت ليه انا بأفتقد تعليقك لما تغيبي..؟
عشان انت فاهمة مش حافظة يا ميرو..
وعشان كمان بتعرفي تختاري الاغاني اللي بتسمعيها..
وعشان كمان مدونتك وحشتني ويلا بقى ارجعي من تاني :)

Tamer Moghazy يقول...

طوبة فضة وطوبة دهب:
كلامك بحد حسسني اني صح او ع الاقل (مش غلط) ودفعني اكمل فعلا زي ما انا مقتنع..واني ادقق في اختياراتي..
لان انا بحترم عقليتك جدا من خلال متابعتي لبوستاتك اللي بحبها جدا.. :)

Tamer Moghazy يقول...

Boky:
نجم جديد يسطع عندي وانت اللي قولت بنفسك مش ها يكون اخر سطوع والا ها نتعاتب :D
جميل منك اهتمامك بالمدونة ويشرفني انك تقومي بغزوها كلها ولو ان ده ها يخليني مستني تعليقك على كل حاجة خاصة وانت عقلية مرتبة ومدققة زي ما حسيت من كتاباتك. (';')

Tamer Moghazy يقول...

شاب فقري:
كرمللة زعلان مني انا...؟؟
يعني فرحتي وزعلتني في نفس الوقت...!!
تعليقك فرحني قوي لانه الموضوع عجبك وانك دققت في كل تفاصيله ورجعت في الاخر تقول انك زعلان..!!
يا ريتك تقول لي ايه زعلك والا ها اضطر اعزمك في كافيه كل الكراسي اللي فيه لونها اصفر واخليك تطلع قدام الترابيزة ييجي مترين تلاتة واسيبك تغير الواقع لوحدك يا كوكو..يا كوكو..يا كوكو :D

Tamer Moghazy يقول...

قوس قزح:
داليا..بجد زي ما انت قولتي كان يشرفك تعرفيني قبل ما تبعدي عن التدوين..
انا كمان كان يشرفني اعرف مدونتك من قبل ما ادخل التدوين..انا قريت البوست بتمعن شديد..وقد ايه انت مش سايبة اي تفاصيل الا وعرضتيها..بس لسه مش قريت التعليقات.
ده انا لو كنت قريت البوست ده قبل ما اكتب البوست بتاعي كنت استأذنتك ونشرت اللينك عندي وبسسس لان كلامك معبر جدا وبيحلل كل حاجة.

عفوا أنا أميرة يقول...

أخدت جولة سريعة فى مدونتك وعجبنى قوى التوبك بتاع أنت فين مني؟؟؟ كل حرف فى مدونتك يأكد أنك بتهتم بأدق التفاصيل تفاصيل كل حاجة ودى ميزة كبيرة وعيب فى بعض الأحيان...بالنسبة للتدوينة دى قوية جدااا لا التدوين لمجرد التدوين ولا التعليق لمجرد التعليق...عجبتنى قوى ربنا يجعل المدونة دى فى ميزان حسناتك

يــوم جــديد يقول...

أنا كده جدا
بهتم بالتفاصيل لدرجة متعبة
وفكرة توديني لفكرة
كل كلمة قلتها في أول البوست تنطبق علي بشكل غريب
مش بعرف أعلق غير لما آخد جولة في المدونة وأعرف على قد ما أقدر وبراجع البوست كمية مرات مهولة قبل مما أنشره ومش بعلق (تحياتي وتقبلي مروري)

عشان أرد على البوست دا محتاجة بوست تاني
لأن البوست دا خلاني فكرت في مليون فكرة على الأقل ما ينفعش كلهم أكتبهم في تعليق واحد
هاجي تاني إن شاء الله

سمسمة الاسكندرية يقول...

على فكرة حاجة جميلة اوى انك ترد على كل اللى بيسيبوا تعليقات ليك ...انا لما سبت التعليق مكنتش اعرف انك هترد بصراحة وبالنسبة هو انا لازم يكون ليا مدونة علشان ادخل مدونتك واقراءها

قوس قزح يقول...

من غير استئذان ..يشرفنى انك تنشر لينك لبوست عندى
و سعيدة ان البوست عجبك

بس عندى سؤال
هو انت قريب شاب فقرى ؟ فيكم شبه من بعض :)))

Remas يقول...

تيمو ازيك

ربنا يخليك ياتيمو يارب

اه بحبها جدا جدا
ومستعدة اعزمك عليها

شفت انا عسوله ازاى وبولفق على طول ؟

اخبارك ايه ياتيمو

على فكرة انا برتاح جدا لما ادخل عندك المدونة يعنى كفاية ادخل هنا علشان مودى يبئا حلو

Remas يقول...

ههههههههههههههههه

شفت اللخبطة اللى انا فيها

انا اقصد بوافق بسرعة مش بولفق اللى قلتها دى

سارة درويش يقول...

عارف يا تيمو ابقى خد بالك من حاجة كمان
المدونات اللي صاحب المدونة اللي اتوفى حاططها
اول ما يموت كل المدونات اللي هو بيزورها وحاططها في الجنب كاتبين عنه وعن نعيه

بعد اسبوع الناس بدأت تتكلم عن اكتئاب غير مبرر او حزن بسبب فقدانه

بعد اسبوعين حد حصلت له حاجة تفرح فيقولها بعد شهر المواضيع عادي جداً

................


هي دي سنة الحياة .. للأسف !

في مقولة لدكتور احمد خالد توفيق تقريباً بيقول فيها
فيما معناه
لو الأم اللي ماتت شافت السرعة اللي اطفالها نسيوها بيها كانت ماتت من الحسرة تاني


مش عارفة دي أنانية ولا ايه ولا يمكن جنون عظمة

بس انا عايزة اما اموت ماحدش ينساني

مش بطلب يحزنوا طول العمر .. بس ع الأقل يفتكروني

ما ابقاش كلب وراح يعني هههههههههه سوري ف الكلمة :)


بالنسبة للتعليقات المستفزة فبجد حاسة بيك
تعرف .. انا عاملة اشراف ع التعليقات
بنزل الكومنت لو كان بيشتمنى بس ما انزلوش لو هو بالسخافة دي

انا اهو انا اهو

زورتك تعالى زورني بقى والنبي والنبي هههههههههه شحاتة وتسول ع افكارهم

لــــ زهــــــراء ــــولا يقول...

انا كمان لما جيت ادون هنا شوفت صورتك الافيتر ووضحتلي حاجات عن الشخصية بس مدققتش لاني ممكن اقرا الصور غلط بس من خلال كلامك عن الدواير والافكار المسلسلة عرفت اني مقرتش غلط وانك شخصية تملي بتحب تتعب تفكيرها بالتدقيق ومش اي شئ يمر كدة من قدامك مرور الكرام على فكرة ...لازم تسيطر على تفكيرك بجد لان كدة خطر وممكن يوصل لحالات من الاكتئاب ...وبخصوص اللي بيعلق عشان بس يعمل اعلان ده شئ بيضايقنا جدا في مدونتنا لانه مش بيحترم شعورنابيجي يحط الاعلان ويمشي هل تتخيل حضرتك لما تحطلي اعلانك وتمشي هكلف خاطري واهتم باعلانك اذا كنت انت مهتمتش بالمدونة اللي انت دخلتها !!! شئ بجد ينرفز بس بنضطر في بعض الاحيان نرد ونزور المدونة اللي اعلن عنها عشان منكسفش حد ... الرسمة اللي انت حاطتها في البوست معبرة جدا عن الموضوع مش عارفة ممكن تكون انت اللي رسمها الرسم ممكن يوصل الفكرة اسرع من الكلام وممكن يسهل علينا فهم الكلام ..دومت مبدع يافندم

Aиgel يقول...

تيمو صديقي
أنا جيت تاني اهوه عشان اسأل بس
أخبارك ايه ؟؟
شكلك كده بتكتب بوست كل شهر او كل كام شهر
ع العموم يارب تكون بخير يارب

shoshta_ joker يقول...

السلام عليكم.....
ازيك يا تيمو ....
بقالى حبة غيبة بس بجد زعلانه منك عشان مش بتيجى ولا بتسال حتى بقالك كتير

البوست
اتاثرت اوى بجد بتسلسل الاحداث
لدرجة انى دمعت
وفضلت افكر فى خمستلاف حاجة
ويااااه لو موت واصبحت كدا زكرى
هل ممكن مدونتى دى تبقى سبب الم لحد من الناس الى بحبهم فى انه كل اما يدخلها بعد ما ابقى مش موجوده وايه ممكن يبقى مصيرها او ممكن اساسا محدش يدخل خاااااااالص ولا اكون مهمه سعتها بالنسبة لحد او مفيش حد يفتكرنى من الاساسا
ع الرغم انى ممكن اكون زيك فى انى بهتم بالتفاصيل فى اقات كتير بس كلامك علمنى حاجة اثارت فيا اوى ان فى تفاصيل اكبر من التفاصيل والتفاصيل الى قبل كدا كنت بعتبرها تفاصيل اكتشفت انها عنوايين

بس مش متفقة معاك فى حاجة ع موضوع التعليق ع الرغم انه فى احساس كبير بعدم الاهتمام ولا مبلالة وبذات فى الحالة والموقف دا بس زى ما انت بتهتم بالتفاصيل البسيطة انت بتملك قدر ع الصبر وانك تدور وتبحث كتير
ممكن غيرك مش عنده نفس الاهتمام ولا القدره
وصعب اوى كل ما تدخل فى مدونة تفضل تقرا كل الموضوعات الى فيها عشان تكون صورة وقتيه ع صاحبها ممكن دا يجى بعد متبتعك ليه بعد كدا والناس كلها مش زى بعضها.
بشكرك عشان اتعلمت من البوست معانى كبيرة اوى

وبجد نفسى تيجى عندى وتنورنى فى المدونة عشان زيارتك رايك بيهمنى اوى .
دومت بخير
فى رعاية الله
shemo

мαησηα يقول...

انا جــــــــه ... على فكرة

انا كتبت تعليق من زمان

وكالعادة ماتبعتش وانا افتكرته اتبعت

خيييييييير المهم .. عايزة اقولك

انى انا كمان بتابع المدونة دى

وعيشت وحسيت الاحساس اللى

انت حسيته وقلت عليه ده

بجد اصعب حاجة ف الكون الاحساس ده

ربنا مايكتبه على اى حد ولا نشوفه ابداااا

==========

نيجى للمدونة ههههههههه

هلكتنى من الضحك بعد ماكنت خليتنى بكيت

عاااااادى ناس كتير جداااااااا

بتيجى تقولى حاجات عجيبة

وفعلا مش قادرة اقولك الاحساس ده محزن

على قد ماهو مؤلم

عارف تحسه استهتر بيك اوى واللى يغيظك

ان الواحد ماضؤبهمش على ايديهم وقالهم

تعالوا علقوا عندى والنبى ههههههه

زى مافى ناس بتعمل

معلش ربنا يصبرك على ما ابتلاك وابتلانا

جميل اوى البوست رغم انه بكانى بس بجد تسلم ايدك

мαησηα يقول...

يانهار اسوح ده انا رغاية يخرب عقلى

سارة درويش يقول...

تيمو شَيّك ع اينبوكس الهوتميل :D

shirry يقول...

wow and just wow
عجبني طريقة كلامك وتشيبهاتك
واستنتاجاتك
كمان البوست نفسه كان مؤثر جدا
ومعاك ف موضوع التعليقات دي

ياريت الواحد يقدر يسيب علامة زي دي

micheal يقول...

جاي أسلم عليك
:)

Tamer Moghazy يقول...

عفوا انا اميرة:
بجد يا ريت كلنا نرفع الشعار ده عشان يفضل فيه مجتمع كويس لاننا احنا اللي بنحكمة فا ممكن نطبق فيه احلامنا وبعدين لو مدونتي حلوة فهي حلوة بوجود ناس بتعرف تتذوق وتفهم معاني الكلمات زيك :)
نورتيني بالزيارة وها استناكي ديما يا سلمى :)

Tamer Moghazy يقول...

يوم جديد:
بجد انا سعيد اني اتعرفت على مدونتك وبعدين ما انا لازم اكون عارف ايه اللي بينطبق عليكي..احنا مش اصحاب ولا ايه..؟ :)
وبعدين انا مستني البوست التاني اللي هو رد على البوست ده اللي هو الاولاني...فهمتي حاجة (';')

Tamer Moghazy يقول...

سمسمة الاسكندرية:
بعنب انتي تتعبي نفسك وتيجي وتنوريني بالزيارة مرة واتنين وانا مش ارد...؟!!
لا طبعا ما اقدرش..
وبعدين مش لازم يكون عندك مدونة انت ممكن تيجي وتدخلي اي مدونة وتتابعيها بس لو عندك مدونة الناس هي كمان ها تيجي عندك وتتواصل معاكي :)

Tamer Moghazy يقول...

قوس قزح:
والله يا داليا انا كمان اخدت بالي من الملحوظة دي من زمان وان كنت انا وكريم مش قرايب..للاسف لانه ده شرف ليا وبعدين كريم حد نشيييط جدا ما شاء الله..اما انا فا كسووول جدا :)

Tamer Moghazy يقول...

reem:
ما انا قريتها (بلفق) ومشي معايا المعنى برضه يعني تجيبيها كده..تجيبيها كده..برضه ها الاقي لها حل يا ريم يا قمر..
وبعدين طبعا لازم ترتاحي لما تيجي هنا..مش ده بيتك ولا ايه..؟؟
انا كمان حاسس انك بقيتي جزء من المدونة ما ينفعش تغيبي :)

Tamer Moghazy يقول...

سمو الاميرة سارة:
يعني سموك تيجي المدونة المتواضعة بتاعتي، وكمان تكتبي تعليق..لأ..وتعليق كبير كمان..
وبعدين انا ها افتكرك ديما يا سو..جربي انت بس وشوفي انا ها اعمل لك ايه :D
لأ طبعا انا بهزر والف بعد الشر عليكي.. هو الشعب اللي هو احنا ينفع يعيش من غير سموك..!! :)

Tamer Moghazy يقول...

لولا وزهراء:
ما شاء الله عندك قدرة تحليلية حلوة جدا وكمان تذوق للصور والمعاني اللي فيها..وكمان عندك حق في حكاية التفاصيل اللي بتؤدي لنوبات اكتئاب..كأنك تعرفيني..!!
على فكرة..انا فعلا بأصمم صور البوستات بنفسي.
بجد تعليقك ده فرق معايا كتيييير وديما ها استناكي :)

Tamer Moghazy يقول...

Angel:
انا مش باكتب بوست كل شهر..
انا بكتب بوست كل ما الظروف تكون مهيئة لميلاده :)

Tamer Moghazy يقول...

Shemo:
ديما يا شيمو..فيه تفاصيل ادق واصغر من تفاصيل..وفي نفس الوقت اعمق من باقي التفاصيل..
وعلى فكرة..تفهمك وتأثرك بالبوست والقصة ده معناه انك حد بيعرف يقدر التفاصيل وبيعرف يتذوق المعاني :)

Tamer Moghazy يقول...

MaNoNa:
انت مش (جه)...انت نورت المدونة يا منونا..
وبعدين يا ستي اديني بكيتك...وبعدها على طوووول ضحكتك..
يعني لا كسبنا ولا خسرنا..يبقى كده احنا خالصين .صح.؟؟
طمنيني عليك ديما وابقي تعالي خدي شاي وقت العصاري هنا من وقت للتاني :)

Tamer Moghazy يقول...

shirry:
اهلا..اهلا..شيري جات ونورتنا :)
بجد تعليقك ده شرف ليا بس ليا سؤال:
انا كان عندي واحدة صاحبتي اسمها شيري..وكنا بندلعها نقول لها "شيرين"
فهل يا ترى.يا هل ترى..الاسم ده له علاقة بشيرين من قريب او بعيد...؟ :)

Tamer Moghazy يقول...

Micheal:
العميد بنفسةى جاي يسلم علي ..؟؟
تسلم لنا يا عميد ويا رب كده تلاقي الفرصة اللي بتحلم بيها :)

saragebaly يقول...

أنا كمان مش بحب اعلق لمجرد التعليق وكسب قراء لمدونتي وبس
ولا احب التعليقات الي يكون محتواها (واو ـ رائع _ جميل ـ .... الى ما شابه ذلك )

التعليق بيدل على جزء كبير جدا من شخصية صاحبه وفكره ونظرته لكتير من الامور

========

المدونة الي بتقول عليها اعتقد انها نفس المدونة الي دخلتها من فترة
واتشديت ليها جدا ولتعليقاتها
لحد ما جت الصدمة بتعليق اختها بأن صاحبة المدونة توفاها الله ـ وسألت نفسي بعدها نفس السؤال

لو انا توفاني الله يا ترى هيفتكرني مين ؟؟وكام حد هيجي يترحم عليا وكل كام فترة؟؟

فعلا الدنيا زي الدواير

ربنا يرحم الجميع يارب

طولت عليك في تعليقي الاول ـ لكن مش زيارتي الأولى

تحياتي لك وكل التقدير

سارة

lostlove يقول...

تيمووووووو
ازيك

شكرا علي سؤالك

الاحتفاء كان بسبب ظروف شغل وسفر وحجات ملغبطه
________

حلوه فكرت الحمله صح
عشان فكرتي اكيد:D
يلا نعملها
بس بشرط فريده تيجي البوس الجاي
وبعدين خلاص الي حصل حصل واتفضحت والحمد لله
:D:D:D

تحياتي
اتمني التوفيق

القمرالباكي يقول...

السلام عليكم

موضوع يستحق النقاش وبالذات عندي لان جديده فالتدوين ولسه بتعرف علي ملامحه وطباعه والناس الي في دنيته
لما لجأت للتدوين عشان اقول كلام بحسه مش خاص بيا بس لكن بحالات وناس بشوفها حوليا واتعرف ع شخصيات محترمه تقدر تحس بالي حوليها مش بالكلام وتعليق عابر لا بالاحساس
وبحرض ان معلقش عند اي حد وان احظي بناس جيدين بالفعل
كل واحد له حريه التعبير عن نفسه سواء بسرد يومي او خاطره او شعر المهم نشارك بعض المعرفه الطيبه ولو عن طريق سطور

قصه البنت دي سبحان الله ان لسه ليها وجود ربنا يرحمها ويرحم جميع الاموات
ديما بيتعبي دماغي الي بتروح وتيجي وبقول لما اموت مين هيفتكرني مين هيدور عليا
لكن الاحساس ده مخطرش عليا فالتدوين وانت خلتني افكر فيه
معلش طولت عليك
تقبل مروري

Ms Venus يقول...

مش عارفة اعلق اقول ايه

يمكن انا زيك بهتم جدا بالتفاصيل

ممكن اركز فى شىء صغير لمدة كبيرررة اوى

واطلع منه استنتجات وحاجات كتير كده داخلة فى بعض


انا بحب ده وبحس بمتعه لانى بحس انى بكتشف حاجة محدش اكتشفها او عرفها


حكاية المدونة اللى انت حكيتها دى بجد اثرت فيا اوى

بس تعرف المعنى حلو اوى

تخيلته كده قدامى لو انا زيها


هل اللى حواليا هيفتكرونى كده؟


ومتفقة معاك اوى فى كلمة اننا مش ندون بس لمجرد التدوين او الكتابة

لو مكانش فى احساس معين وفكرة معينه عاوزين نوصلها

يبقى بلاش من الاصل نكتب


سعيدة بزيارتك لمدونتى وسعيدة اكتر انى جيت هنا واتعرفت على فكرك

اقبل وجودى وتحيتى

عايزه أشتغل يقول...

تابعوا مدونه مش عايزين نتجوز
http://entoeah.blogspot.com/

سارة درويش يقول...

:) دوس واعمل اللي انت عايزه يا تيمو
البيت بيتك :)

Tamer Moghazy يقول...

saragebaly:
نورتيني يا سارة وعلى فكرة ممكن نزور ناس كتير ومش نعلق عندهم وده له سببين:
الاول انه ممكن ما يكونش عجبنا الموضوع وده ما بيقللش من فكر الناس ده، كل ما في الموضوع انه (ماعجبنيش)
والتاني انه يكون فعلا موضوع وحش وماعجبنيش ولو علقت ها اكتب كلام انا مش حاسه :)

Tamer Moghazy يقول...

Lostlove:
طبعا الحملة حلوة لانها فكرتك :)
وبعدين فريدة هنا ما غابتش عشان تيجي..
انت مش شايفاني رايح جاي من الصبح عمال اقولها فريدة..فريدة..فريدة..؟
ولو ع الفضيحة..ماخلاص..مصر كلها عرفت والحمد لله..
المهم الموضوع ما يخرجش بره نطاق البلد دي..عاوزينا فضيحة محلية بسسس :D

Tamer Moghazy يقول...

القمر الباكي:
داليا..نورت المدونة..وعلم التدوين كله :)
وصدقيني ديما التقدير بالـ (كيف) وليس بالـ (كم)
وبعدين عاوز اسالك سؤال : هو انا قلت لك ان الوان مدونتك حلوة..؟؟
طب ما انا عارف :)

Tamer Moghazy يقول...

Ms Venus:
صدقيني الاهتمام بالتفاصيل فيه ميزة...
وفيه الف عيب..
وطبعا بما انك زيي في الحكاية دي. فا مش محتاجة اقولك انه الموضوع ده مش بايدينا (لاسف)
نورتي وها استناك ديما :)

Unknown يقول...

السلام عليكم

جزء من البوست لمس فيا احساس كان بيلح عليا من مده شهرين من غير اي مقدمات
كان نفسي اني لو قدر الله ليا ومت تفضل مدونتي شغاله
عشان كدا نزلت بوست بعنوان وصيتي

اما بالنسبه للجزء الثاني و للعباره اللي بيسبها المدونين لبعض
(ارجو الزياره) بحس انه علق عندي عشان يجمع قراء مش عشان البوست يستحق التعليق

في الاخر احب اعلق علي (وكأن المدونة نجم تم اطلاقه في الفضاء..وقدره انه يلف في مدارة الى ما شاء الله )

اللي دون مماتش
:)
:)

Tamer Moghazy يقول...

Nesreen:
انا بجد اتصدمت في طريقة الناس او الـ (آلية) اللي بقوا بيتعاملوا بيها بدون ما يفكروا في التصرف.

عجبني قوي تعبير :((اللي دون مماتش))

Bent Men ElZman Da !! يقول...

السلام عليكم

تنحت بصراحه لما قولت ان صاحبه المدونه ماتت
حسيت ان جسمى قشعر
وتخيلتنى انا فى نفس الموقف
الواحد ياترى ساعتها هيكون حاجه تفيد غيره
والا حاجه هياخد عليها ذنوب
والا حاجه اصلا ماحدش هيهتم بيها
اما بالنسبه للشخصيه المستفزه اللى ردت
فا ده من ضمن الشخصيات الآليه اللى تجيب للواحد شلل

تقبل مرورى

الغاردينيا يقول...

قرأت التدوينه من اول حرف لاخر حرف

بجد كلام منطقي وجميل ,, الاخت اللى ماتت دي سبحان الله

ساعات الانسان لمابيعمل شئ بنيه صافيه

بيظل كل شئ زي ماهو حتى لما هو نفسه ينتهي من هذا

العالم وتظل اثاره موجوده حتى لو كان الاثر دا مجرد

مدونه رحمها الله ! وطبعا لو كان المدون دا صديقك

بجد اكيد بتظل تذكرة ولو شغلك الزمن على الاقل

بتذكره كمجرد ذكر ,

تاثرت بحديثك عنها كثيرا ما ادري

يمكن عشان مزجت الحياة و الموت بوقت واحد وفين بعالم

النت !

اهتمامك بالامور الضغيرة شئ جميل انا كنت كذا بس

بدات احس اني بظل افكر 24 ساعه فمابنام يعني

بتجنن لاني افكر افكر وانتقل من نقطة لثانية !

وبدات احس يومها اني عايشة بعالم اخر لذا احاول

كثيرا التوازن لكي لا افقد عقلي ^_^

تحية عطره

غير معرف يقول...

لقيت فريدة ولا لسة بتستناها ؟

غير معرف يقول...

انا حاولت ابعتلك رسالة على الميل بتاعك بس معرفتش اوصل للميل اصلا _عموما هحاول تانى

Tamer Moghazy يقول...

Bent Men ElZaman Da:
هو ده قصدي بالضبط..
يا ترى الواحد ها يسيب ايه وراه..
حاجة الناس تفتكره بالخير بسببها
ولا حاجة ممكن تجيب له ذنوب..؟؟
اما الشخصيات الاليه فدي كتيييير قوي في الحياة ولسه ها اكتب موضوعات عنها :)

Tamer Moghazy يقول...

الغاردينيا :
اولا الاسم جميل جداا..
ثانيا نورت المدونة بعطور الجاردينيا :)
يا صديقتي الحياة والموت وجهان لنفس العملة اي انهم دائما معا..!!
وعالم الانترنت يجمع بين الاثنين بل ويؤرخ الاحداث ايضا..!!
اما التفكير المتواصل والاهتمام بصغائر الاشياء فا للاسف (مش بإيدنا) :) :)

Tamer Moghazy يقول...

غير معرف :
كلام في سرك.......لسه. (';')
بس ايه طيب..؟
عندك فريدة ولا ايه..؟؟

غير معرف يقول...

تفتكر القدر ممكن فعلا يخلق فريدة لكل انسان

غير معرف يقول...

عارف مدونتك دى فكرتنى بحاجات كتير كان نفسى تحصل فى حياتى عموما منها اللى حصل ومنها اللى اتمنيتة يحصل ولما حصل ندمت اوى

غير معرف يقول...

انت اون لاين

غير معرف يقول...

لو انت اون لاين فعلا تبقى صدفة غريبة اوى

Tamer Moghazy يقول...

غير معروف:
الاغرب اني اون لاين وانت كمان اون لاين ومنعرفش بعض..
بس الفرق انك شايفني..وانا مش شايفك..!!
وبالنسبة لموضوع الحاجات اللي بنتنماه وبتحصل ونتمنى في الاخر لو مش حصلت..
فا ديما بافتكر كلمة بتقول: (احذر مما تتمنى)

غير معرف يقول...

لو ميسببش ليك ازعاج ازاى ممكن اكلمك على الميل ؟

داليـ ـ ـ ـ ـ ـ ــــا يقول...

السلام عليكم

ازيك ياهندسه

انا عارفه ان الكومنت رقم 100 ده هيبقا غريب شويه وبعيد عن البوست
لأنى عاوزه اطلب فيه طلب صغنون
أأقدر اوصل ازاى للشاعره ايمان البكرى الا قلتلى عليها فى التعليق
بليزززززززز
منتظره ردك عندى فى المدونه

داليـ ـ ـ ـ ـ ـ ــــا يقول...

مش عارفه اقلك ايه ياهندسه

انا عاجزه عن الشكر

بس بجد ميرسى كتير ليك

على تلبية طلبى

بس تعرف حسيت ان فى كلام مشابه بينى وبينها تعرف فرحت اوى انا شكلى هبقا شاعره قريب
ههههههههههههههههه

سمسمة الاسكندرية يقول...

السلام عليكم ورحمة الله وبركاتة ..انا سبت تعليق من فترة كدة وحضرتك قولتلى انة يبقى كويس لو تعرفوا مدونتى علشان تتعرف عليا اكتر .وبصراحة الفكرة كانت موجودة عندى بس كلام حضرتك شجعنى اكتر ..هى مدونة لhttp://a7lafriends4ever.blogspot.com/لسة فى البداية ومشتركة بينى انا واصحابى ..ياريت تعجبكوا

Tamer Moghazy يقول...

سمسمة الاسكندرية:
انا عندك (';')

سمسمة الاسكندرية يقول...

انا بجد مش عارفة اشكرك ازاى..انت بجد انسان ذوق جدا ..ربنا يحفظك ياااارب

Sahar Elgafary يقول...

بسم الله والصلاة علي رسول الله
كل شىء ..دوائر دوائر ..وفي قطب الدوائر أنا دائر ...حاولت الفرار..مرارا مرارا..وفشلت خطتي وأجوبتي صارت سؤالا حزينا مللت الدروب فكل الدروب معتمة ..وإن راودتنا همسات الضياء ..في ظلمة الليل الحزين تدوسنا أسراب الهموم فتسحقنا ...
يابن آدم أعمل الصالح فهو باق
ولا تكن....لكتاب الله عاق
من لاقاه ربه فمن الدنيا عبر
والدور دور من فلنتق الله ولنعتبر

غير معرف يقول...

بقالى حوالى ساعة فى مدونتك اقرأ بوست والتانى يشدنى
اولا عجبنى اسلوبك فى سرد المواضيع جدا وخيالك الممزوج بالواقعية و المنطق
لما قرأت البوست دة لقيت عينى بتلمع يمكن لان نفس الموقف تقريبا اتعرضت له ومُقدرة حجم الذهول والشعور بالموقف دة

للأسف الناس لما بتدخل منتدى او ماشابه بتتحول لهجتها والمؤسف اكتر ان فى ناس بتكتب منتظرة بشغف كلمة الشكر وكأنها عملت معجزة !! .... بصراحة بكرهها التعليقات العادية دى و الكلام العادى عموماً

بعتذر انى طولت وبشكرك لأنى استفدت حقيقى من مدونتك

حبات التوت يقول...

فكرتنى انا لية صديقة ماتت من سنة تقريبا وانا ضيفاها على الفيس بوك ولحد دلوقتى بدخل عندها على الصفحة واعد اقلب فى القديم او بس ادخل الصفحة وافتحها واشوف الناس اللى ترحمت عليها
بحس باحساس غريب
الله يرحم الجميع الاحياء منهم والموتى

انتة من ابلنوع اللى بيهتم بالتفاصيل اوى اوى مع انها حاجة حلوة بس بتتعب اوى

Old Blogger يقول...

لا .. تعليق .. يليق

Antika يقول...

هو انا فكرت ف حاجة واحدة بس
لما اموت .. الكلام اللى باكتبه هايكون حاجة كويسة ليا
ولا سيئة جارية

ربنا يستر :)

نهر الحب يقول...

استغربت انى ملقتش تعليقي هنا.....
بس بعرف السبب
التدوينات القليلة اللي كلام بيقف عندها....
بس انا قريتها كتير
واول مرة قريتها اول مرة دخلت مدونتك من اربع سنين.....تخيل........لما قريتلك كذا حاجة ورا بعض ومكنتش قادرة اسيب المدونة.....
المهم .....
عاوزة اقولك حاجة مهمة جدااااا
انامازلت بقرأ بوستاتك كلها وبدخل هنا لما ببقي مخنوقة جدا ومش عارفة اتكلم... بفضل اقرا كلامك وواشوف تعليقي كان عامل ازاي....
المهم اني ف الاخر ببتسم لانها ذكريات حلوة بجد....
انت عارف نفسي قد ايه ترجع للكتابة زي مانا كمان نفسي ارجع اكتب زي الوقت ده 2011 ومش عارفة ايه اللي اتغير فينا وليه مش قادرين او مش عارفين نكتب او نعبر عن اللي جوانا
بجد نفسي الاقي اجابة للسؤال ده ومش لاقيه......
صدقني الموت بيخلي الواحد يغيب بس ع الاقل معروف سبب غيابه وانه مش حيرجع تاني...
لكن الغياب بالصمت ده مؤلم جدا لأنه مش معروف سببه ولا نهايته ....
وف الاخر حقولك...
من الافضل ان اكون غائباً حاضراً علي أن اكون حاضراً غائب
:)

بدخل المدونة ديما عل امل الاقي بوست جديد