الأحد، مايو 8

أنا....وأنا..!!

اللي..في الصورة ده..اسمه احمد.. جلال.. عبد القوي
اللي .. في الصورة..واحد عمره ما جازف..!!
ولا حتى جازف انه يفكر..
مع انه..بيشتغل في البورصة..
والبورصة....يعني..
مكسب...........
...............................
......................وخسارة..

تعرفوا...
ساعات بيقبى فيه اسهم.. الواحد فاكر انها خسرانة..
ومع انها بتبقى قدامه..لكنه عمره ما بيشتريها..لأنه فاكر انها خسرانة..
مع انه لو فكر..شوية..هايلاقيها هي الاسهم الكسبانة..
اللي كان المفروض يراهن عليها من زمااان..

انا عمري ما بعت..لكن قررت ابيع النهاردة..
قررت..
النهاردة..
اني..
أبـيع..!!



...........................على الهامش ومش للتعليق......................


ها اكتب كل كلمة..
عشان يعرفوا..
بعد كده حصل ايه..
بعد كده حصل ايه..!!
أه..بابا طلب الجزمة البني..
ماحدش فاهم اي حاجة..
بعدين خالتي دخلت
وقالت..صباح الخير يا عريس..
روحت على الكمبيوتر
اضطريت اشيله عشان بيشتغل الصبح..!!
بعدين..
ركز يا احمد متوتر ليه..؟؟
متوتر ليييه..؟؟
بعدين..
بعدين..
باروح الفرح..
بعدين..
بأموت..
بأموت..
بأموت..
بأموت..
بأموت..
بأموت..

هناك 85 تعليقًا:

Ramy يقول...

أزيك يا تيمو

فيه أيه يا ابنى

عارف المُجازفة الوحيدة فى حياتى هى لما حبيت بس حتى المجازفة مش راضية بيا (:

مش هأكلم كتير أهوا (:

لـــولا وزهـــراء يقول...

تيموووووووووووو

ازيك واخبارك ايه يارب تكون بخير وسعاده

بصراحه مش فاهمه اى حاجه بس الكلام كويس احسن تقول انى غبيه ^_^

انت عارف من فتره بافكر اكتب سوت اسمه بورصة البشر وانا بافكر فى نقاطه لاقيت فعلا فى اسهم كتييير بنخاف نقرب منها وفجاه نكتشف انها اسهم للربح على المدى الطويل يجوز نظرنا ضعيف او يمكن نستعجل الامور

ربنا يهب لك الخير

زهراء

Timo.. يقول...

Ramy:
واحشني يا روميو والله..
بس سؤال صغنون..
هي المجازفة الوحيدة ولا المجازفة الكبيرة..؟
(وش خبيث)

Timo.. يقول...

لولا وزهراء:
عارف انك ممكن مش تكوني فهمت حاجة وده لاني فعلا كتبت حاجة ليها معنى جوايا انا (وبس)
منوراني ديما بوجودك وكفاية انك حاولت تفهمي..ده له معنى كبير عندي:)
يا رب يومك كله سعادة وهنا :)

Antika يقول...

والاسوأ انه يركز مع الاسهم الخسرانة
والـ عمرها ما هاتكسب
:S

بلاش الكلام الـ ف وقته ده D: !!

دعاء العطار يقول...

ماأعرفشى ليه بالرغم انى ببقى سامعه الفيلم وعارفاه ... الا انك لما بتتكلم عنه بحسه نمختلف

مع ان المفروض ان مفيش حاجه جديده قولتها ... لكن "الاحسااااس "

احساسك عاااااالى أووووووووى ياتيمو


..............

بصراحه الدنيا من غير مجازفه ... ممله وروتينيه وتقليديه .... حاجه مفيهاش جديد

أصل لو ماجازفناش وغامرنا وغلطنا ... مش هنتعلم

فيها ايه لما نغلط ... فيها ايه لما نحب غلطاتنا

الفيلم ده لما سمعته أول مره وترنى أوووى ووجعنى أوووووى بس عجبنى جدا لأنى حسيته مختلف

فيه أكتر من فكره فلسفيه وفى كل مره هتسمعه هتكتشف حاجه جديده

بفرح لما بلاقيك منزل موضوع (: (:

reemaas يقول...

تيمووووووووووووو
بفرح لما بلاقى ليك بوست ده للعلم واتخاذ اللازم

بحييك على اختيار الصورة بتاعة البوست

بحييك على اختيار الفيلم لان دول اكتر قصتين ممكن اقولك اثروا فيا فيلم البوست وفيلم مدونتك كلها


الخسارة والمكسب حاجات فى نظرى نسبية عمرنا ماهنتفق عليها كبشر الا فى الثوابت

الاسهم اللى انا براهن عليها هتفضل كسبانة فى نظرى لحد ما تخسر وقتها هبدء اقول لو لعبت على التانيين كنت هكسب

طبيعة بشرية

على الهامش ومش للتعليق
بموت
بموت
بموت

Tears يقول...

مش مهم اكون فهمت كلامك كله

بس المهم انك رجعت للتدوين بالسلامة :)

hana يقول...

عارف أصعب حاجة بجد لما نروح للخسارة والمكسب كان مابين ادينا واعتقادنا العكس
مش عارفة بس كلامك وداني لهنــاكـ
شعور فظيع بألم ذائد كتلة إحباط والمشكلةالكبيرة لو كانت مجازفة وانتهت بعكس ما بنفكر !
لك اسلوب جذاب في الكتابه ووممتع للغايه
الإحساس فيه دايماًواصل لأبعد مدى نبئا مش بس بنقرا لا بنحس ونسمع

وجع البنفسج يقول...

بصراحة مافهمتش ..

عموما حبيت اقول اني كنت هنا ..

hanan khorshid يقول...

فى فيلم "forces nature" بتاع ساندرا بولوك ... البطل بيقول جملة مهمةأوى لساندرا وهم فى مدينةالملاهى بعد ما أصرت إنه يشاركها اللعب
جملة بتعبر عن الفرق بين شخصيته النمطية وشخصيتها المختبرة
بيقولها
"الأشخاص نوعين أحدهم بداخل هذه العربة والآخر يشاهد من بعيد ويفكر أين سيتقيأ بعد أن يرتادها "
............
أن آسفة جدااا لتدنى اللفظ بس هو قال كده والجملة عجبتنى اوى لانى اكتشفت فعلا ان الواحد ممكن يضيع حياته كله عشان خايف ان تكون نتيجة التغيير او المجازفة اسوأ مما يحياه
............
مدونتك جميلة جداااااااا
وبجد اسلوبك فعلا مختلف
دى مش مجاملة
ولا رد مجاملة
بس بجد اسلوبك متفرد اوى
تحياتى....

شيرين سامي يقول...

تيموووو
بوستاتك دائماً بتبقى ليها طابع خاص جداً عشان كده بستناها بس اظاهر مش لوحدي :)
رغم خطورة المجازفه الا انها بتبقى أمتع بكتير من الأشياء المضمونه و خساره الحقيقيه ان انسان ميجازفش عشان سعادته.
نصيحه متبيعش حد اشتراك
و محدش بيموت من الحب:)
تحياتي ليك و يا رب تكون بخير

Timo.. يقول...

Antika:
للاسف ساعات بيبقى عنده (امل)..!!

Timo.. يقول...

دعاء العطار:
بقى عندي هواية اعادة اكتشاف الاشياء مرة تانية وتالته ومليون..
وكل مرة باحسها باحساس مختلف.

عندك حق..الحياة..مجازفة..

عارفة..انا بافرح لما بتيجي عندي :)

Timo.. يقول...

reemaas:
"الاسهم اللى انا براهن عليها هتفضل كسبانة فى نظرى لحد ما تخسر "
اللللله عليك يا ري..

"على الهامش ومش للتعليق
بموت
بموت
بموت"
كنت متاكد انك ها تعملي كده :(

وللعلم..تم اتخاذ اللازم :)
ومبسوط اني بدأت يومي بتعليقك (';')

Timo.. يقول...

Tears:
فعلا فيه جزء في البوست مش مفهوم عشان كده قولت عنه مش للتعليق :)
بس عجبني وجودك :)
يا رب يومك كله سعادة وهنا.

Timo.. يقول...

hana:
ما احنا لحد وقت الخسارة بنبقى فاكرين العكس ومتاكدين اننا راهنا على الاسهم الكسبانة وده نوع من (الامل)
اللي ساعات بيتكسر ويتحول لــ(وهم)

يارب اكون فعلا الجزء الاخير من تعليقك لاني باحترم كل حد بيدخل ويقرأ ، عشان كده باهتم باللي باكتبه:)
صباحك كله هنا يا هنا :)

Timo.. يقول...

وجع البنفسج:
كفاية انك جيتِ..هنا :)
تحية لكل اهل غزة وفلسطين الحبيبة :)

Timo.. يقول...

hanan khorshid:
مممممممم...
وكمان اكتشفت انك بتتابعي الافلام بعيون مدققة..وبتاخدي منها اللي ممكن غيرك مش يشوفه..
عجبتني طريقتك في التعليق قوووي اللي اتمنيته يكون اطول من كده بكتييييير :)
وهاستنى اشوف تعليقك ديما وده مش مجاملة برضه :)

Timo.. يقول...

شيرين سامي:
لو تعرفي قد ايه باتخيل كل حد وهو بيقرأ، وازاي ها يسيب تعليق ها تعرفي اني بجد (مش بادون لمجرد التدوين)

وفعلا..محدش بيموت من الحب :)
تحياتي لوجودك المميز ديما.
صباحك ورد وبنفسج شيرين :)

sony2000 يقول...

من الواضح انك بتحب الفيلم دا

وهو اساشا يتحب
واكتر حاجه عجباني

اخر جمله فالفلم
فاكرها؟

Timo.. يقول...

Sony2000:
طبعا فاكرها..
"ما اعظم ان تكون غائبا حاضرا..عن ان تكون حاضرا غائبا"
انا باحب المعاني اللي ممكن نطلع بيها اكتر.. :)

just waiting يقول...

عارف في الفيلم الجامد طبعا واللي بحييك على ذوقك فيه هو قرر يبيع علشان كان شايف الحقيقة بعينه هو بس وكل الاسهم الخسرانه طلعت ف الاخر كسبانه

فراشة يقول...

كنت همشي زي كل مرة من غير تعلييق :)

قلت اغير واجازف انا كمان :)

وأقولك زي ما كلهم قالوا ودي والله الحقيقة فعلا فعلا انا بستنى بوستاتك بحس كدا انها طالعه من جوه القلب حقيقي

يمكن كلنا محتاجين من وقت للتاني نشوف الحاجه من منظور تاني او وجهة نظر مختلفه

sosonata88 يقول...

ازيك..بجد بحب الفيلم دا جداا..
انا كنت ناويه اقولك كومنت على ال نيكست بوست..بس لما اريته مفهنتش اوى
واستبوخت ان يكون اول كومنت..انى مش فاهمه..يعنى بس دا الوصلتله على اد فهمى يعنى..ان احنا بنركز على الاسهم الخسرانه ونسيب الكسبانه لان احنا بنعتمد على المظاهر وعوامل الابهار(ال تاثيرها بيبا قوى وبينتهى على مدى قصير) اكتر ما بنعتمد على الجوهر(ال بيبان قيمته على المدى الطويل)..واحنا بنستعجل ومش بنحب المجازفه......فبنستسهل..
معلش طولت...اصلى متعوده على الايميلات..

مها البنا يقول...

ساعات بيقبى فيه اسهم.. الواحد فاكر انها خسرانة..
ومع انها بتبقى قدامه..لكنه عمره ما بيشتريها..لأنه فاكر انها خسرانة..
مع انه لو فكر..شوية..هايلاقيها هي الاسهم الكسبانة..
اللي كان المفروض يراهن عليها من زمااان..


صدقت !!!

richardCatheart يقول...

ازيك يا تيمو ليك وحشه كبيره

للاسف فهمت وللاسف اتوجعت
بس بين الوجع والفهم ملامح فرحه لانك اخير انت كمان فهمت وبعت

مش مهم انك ما اخدتش بالك قبل كدا من الاسهم الخسرانه والكسبانه المهم انك دلوقتى اخدت بالك

احمد جلال عبد القوى والف مبروك بقى رمز ليك عندى من فتره ولما بشوف احمد كانى شوفتك
تحياتى ليك ويبارب تبقى احسن واحسن ان شاء الله

فتافيت يقول...

انا عمري ما بعت..لكن قررت ابيع النهاردة..
قررت..
النهاردة..
اني..
أبـيع..!!

في يوم من الايام قررت ابيع
رغم اني اشتريت غالي اوي.. وكانت مجازفة
ولما قررت ابيع.. كانت مجازفة
كبيرة.. خطيرة.. والوحيدة في حياتي

ساعات لما نبيع بخسارة.. نبقى كسبانين

حلو البوست يا تي ^_^

sosonata88 يقول...

hi,how r u,it`s the second time i write u comment the 1st one was deleted,
i like this moviee so much
i intended 2 write 2 u comment in the next post but honestly when i read it,i donn`t get all wt u write..and find it bai7`a en ykon awel comment ane msh fahma awee..
but i try and this is wt i conclude(3la ad fhmee y3nee
we focus on the loss stocks and ignore the gain stocks coz..

our selections based on almazaher w 3wamel al2bhar(which its effect is so strong but it is over in the short run)....more than we based on algawhar (which its value is appeared but in the long run)w27na bnst3gel w msh bn7b lmogazfaa...fa bnstshel..
by the way am gonna 2 make mogazfa..rbna yostor..
nice movie...good selection...high sense..sorry for the length of comment...it`s the 1st one..

miroooo يقول...

السلام عليكم
ازيك يا تيمو؟
الصراحه يا تيمو انا مش فاهمه اوى وحاولت افهم بس مش عارفه افهم اكتر من كده
لكن اللى بيعجبنى فيك وبصراحه اكتر انك مختلف بجد مواضيعك مختلفه حقيقى
اللى انا فهمته ان كلامك ممتاااااااز
تحياتى

بوبا يقول...

البوست حلو يا تامو واحساسك احلى بكتير لازم الانسان يجازف عشان يوصل للنشوة اللى بيحلم بيها حتى لو هيتمتع دقايق احنا هنتحاسب على حياتنا فلازم نعشها اوى بكل الطرق

Rosie يقول...

قررت أبيع..مش عارفة ليه لما قرأت الكلام ده كنت عايزة أقول أنا كمان قررت أبيع...أو عارفة و باستعبط..هههه......اللى يبيعك بيعوه.......دى المعلومة اللى الواحد بيوصلها بعد ما يكون اتخنق..

shemo_ joker يقول...

السلام عليكم.....


ازيك يا تيموووووووو قولى فين فريدة بس وانا هشتيكلها منك ....

وزعلانة ومنك عشان بقالك كتير مش بتدخل عندنا ولا بتنزل بوستات ومختفى ووحشتنى اوووووى والله كتاتبتك وجنانك فى الكلمات

البوست تحفة عشان دماغك جامدة اساسا ودى مش حاجة جديدة لانك بتعرف تطلع من افلام حلمى افكار انا بعشق فيلم الف مبرووووووووك عشان الفكرة الجامدة الى جواه


متاخرش بقى وتختفى كتير

دومت بخير
فى رعاية الله...
shemo

Silver Eyes يقول...

بأموت ..
..........

!!

Nesreen يقول...

وان كانت كتاباتنا احيانا شخصيه
الي انها تصل الي الاخرين لانها صادقه

...
..
.
انت وان كتبت شئ شخصي بيك
بس متاكده انه كل من قراءه ذكره بشئ شخصي ايضا

تحياتي

5o5a يقول...

ازيك يا تيمو

نظرتك لجزء معين في البوست بتاعك او اي حاجة بتكتبها بيبقي فيها فكرة عميقة
الحياة من غير مجازفه متبقاش حياة

ربنا يبعتلك الخير ديما

Bent Men ElZaman Da !! يقول...

الدنيا نفسها عباره عن مجازفه
بنخاف نخسر حاجه عشان مش نقول ياريتنا
ابسط الكلام بتقوله باحساس مختلف كالعاده :))

Eman يقول...

ساعات بيقبى فيه اسهم.. الواحد فاكر انها خسرانة..
ومع انها بتبقى قدامه..لكنه عمره ما بيشتريها..لأنه فاكر انها خسرانة..
مع انه لو فكر..شوية..هايلاقيها هي الاسهم الكسبانة..
اللي كان المفروض يراهن عليها من زمااان..(عجبـــــــــانى جـــــدآ)
...........................على الهامش ومش للتعليق......................
كـــم هــو جميل عندما تكتب كلمات. يراهـــا البعـــض جميلــــه... و يراهــــا البعــــض معبـــّره .. و يراهـــا آخرون بلا معنـــى !!!! لكـــنك أنت الوحيـــد الذي تعلــــم عندمــــا تكتبهــا ماذا يوجــد وراء كواليــــسها

موجة يقول...

مع اني مش فاهم حاجة
بس مدونتك جميلة
موضوعاتها شديدة العمق
محتاج اقرأ البوست تاني
خالص تحياتي
أحمد

Timo.. يقول...

richardCatheart:
قد ايه بيوحشني تعليقك ووجودك :)
احمد جلال عبد القوي..موجود جوة كل واحد فينا..
محتاجين بس نشوفه عشان نقدر نفهَمه ونفهّمُه.

Timo.. يقول...

فتافيت:
"ساعات لما نبيع بخسارة.. نبقى كسبانين"
يااااااه يا ري..
قد ايه انت بتلمسي النقطة المقصودة..
وبعمق كمان..
بتفكريني اعلان بيقول:
(نذهب بعيدا..لتبق قريبا)

Timo.. يقول...

sosonata88:
تاني مرة تكتبي التعليق..!!
مممممممم...!!
طيب ليك على اول ما تعملي مدونتك اكتب لك التعليق تلات مرات :)

عندك حق اننا بنختار على حسب المظاهر واننا للاسف مش بنهتم بالجوهر وبنكتشف ده كمان متاخر..

بالنسبة للمجازفة بتاعتك.. يا رب تكون اللي بافكر فيها :)
مبسوط بالتعليق بتاعك اللي اتمنيته يكون اطول من كده :)

Timo.. يقول...

miroooo:
كفاية يا ميرو انك حاولت..
وانك جيتي :)
ساعات بتبقى الامور مش (سهلة) الفهم..
قد ما امور كتير بتبقى (صعبة) التنفيذ.. تحياتي :)

Timo.. يقول...

بوبا:
..........
..............كلام كتير...
...ووجودك احلى من الاتنين يا بوبا :)

عندك حق اننا لازم نجازف.. بس المجازفة المحسوبة احسن من المجاذفة الـ(غير) محسوبة يا بوووبا :)

Timo.. يقول...

Rosie:
انا مش بابيع (حتى) اللي يبيعني يا روز..!!
انا قصدت بيع تاني :)
وعشان كده قصدت اقول على نص البوست انه مش للتعليق لانه ببساطة كمان (مش للفهم) :)

Timo.. يقول...

shemo_ joker :
والله يا شيمو لو اعرف مكانها كنت انا اللي اشتكيت (لها)....(منها)..!!
معلش يا شيمو على غيابي.. اعمل ايه بقى.. فريدة مجنناني وماشي ادور عليها في كل حتة (';')

هتلاقيني عندك بعد شوية صغننين آآآآآد كده :)

Timo.. يقول...

Silver Eyes :
آآآآآي...
تعليق بطريقةذكية قوي..
وبتوجعني قوي في نفس الوقت..!!
بس مش غريبة على طريقتك في الكتابة اللي بحبها قوووي :)

Timo.. يقول...

Nesreen:
عارفة قريت التعليق ده كام مرة..؟
اكتر من اللي ممكن تتخيليه بشوية..!!
كتير باتعب عشان اعمل بوست ومش باكتب لمجرد الكتابة..
ولما بلاقي تعليق زيك باحس اني فعلا عملت اللي كنت عاوزة ولقيت المقابل :)
خالص تحياتي لفكرك :)

Timo.. يقول...

5o5a:
"الحياة من غير مجازفة متبقاش حياة.."
بتغيبي كتير يا خوخة وباقلق عليك..
بس بحب وجودك عشان كده بسال عنك ديما :)

Timo.. يقول...

Bent Men ElZaman Da:
الحياة نفسها عبارة عن مجازفة..
لو احساسي بيوصل فا اكيد عشان فيه حد بيحسه..زيك :)
مبروك الخطوبة :)

Timo.. يقول...

Eman:
"كـــم هــو جميل عندما تكتب كلمات. يراهـــا البعـــض جميلــــه...
و يراهــــا البعــــض معبـــّره .. و يراهـــا آخرون بلا معنـــى !!!! لكـــنك أنت الوحيـــد الذي تعلــــم عندمــــا تكتبهــا ماذا يوجــد وراء كواليــــسها"

التعليق ده اكبر من اي رد ممكن اقوله..
يمكن لان فعلا وصل (لأكتر) من المعنى اللي قصدته لما قولت "مش للتعليق"..
الحياة كلها كواليس..
وده المكان اللي ممكن تلاقيني فيه :)

Timo.. يقول...

موجة:
شرفتني بالزيارة يا ابو حميد واتمنى تقرأ البوست تاني وصدقني..
اذا مش (كسبت)...
اوعدك مش ها (تخسر) :)

حروف يقول...

المجازفة قرار ام طبيعة ؟!!!!


wb

مجرد حلم صغنتوت يقول...

ما هو احنا لما بنجازف مش المفروض نندم على ده حتى لو خسرنا لاننا اكيد كسبنا حاجة تانية احنا مش شايفينها دلوقتي

وساعتها هنكسب تاني وتالت بعدها ونخسر تاني ونكسب تاني
هي الدنيا كده هنعمل ايه

بس بلاش اليأس لانه هيضيع كل حاجة حلوة

EL pRiNcEssA يقول...

وانا كمان قررت اني ابيع
.
.
.
.
بـــــــصرة

Bassant Elsawy يقول...

أنا جيت عشان أسلم كده لقيتك بقالك فترة غايب :)

سمكه واحده يقول...

عامل ايه؟

Ms Venus يقول...

بعدين..
بأموت..
بأموت..
بأموت..
بأموت..
بأموت..
بأموت.


ممكن اقول لا هعيش ؟!

كتير عايشين ومش عايشين

وكتير راحوا ولسه موجودين

يمكن لو نموت

نعيش جواهم ...


مش عارفة

انا اتأخرت جدا

بس معلش


تحية دائمة لعبقرية حروفك يا تيمووو

سابرينا يقول...

الولد ده رغم أختلافه عن الكل ..يعشق أباه ويجعلك تبكي بكاءا شديدا عندما يكلمه ويخبره انه يثيت للكل انه عايش ولم يغادره أبدا فتنزل هذه الجملة كسكين بقلبك لانك تتذكر أنت الأخر انك مثله تماما وأباك غادر ولكنه لم يبرحك أبدا فتصيبك الدهشة لأنه فكرك بالوجع!

Timo.. يقول...

حروف:
(ساعات)بتبقى قرار..
و (كتير) بتبقى طبيعة..!!

Timo.. يقول...

مجرد حلم صغنتوت:
حتى لو بنخسر...فا احنا برضه بنكسب لاننا (بنتعلم) بالخسارة..
فا مش بتبقى خسارة..
بتبقى مكسب على المدى البعيد
وبنتعلم (مانعملش كده تاني) (';')

Timo.. يقول...

EL pRiNcEssA :
انا قررت ابيع بعد ما (مليت) اني اشتري...!!

Timo.. يقول...

Bassant Elsawy:
انا باغيب عشان وقتها (مش ينفع اكون موجود) :)
وفي نفس الوقت مش ينفع اغيب عن مدونتك لاني زي ما قلت لك : باحس ان انا اللي خسرت :) :)

Timo.. يقول...

سمكة واحدة:
مبسوط..انك جيتي :)

EL pRiNcEssA يقول...

ياه ياتيمو انا بطلت اشتري من زمان لدرجة اني حاسة اني انا دلوقتي اللي بخسر
وحاسة بحاجات كتير ضايعة جوايا مينفعش احكيها

يمكن الكتابة بتخفف عني كتير
يمكن الحلم بياخدني اوقات
بس ف الاخر برجع لنفس الحياة ولنفس الملل
ولنفس الضياع كأنه جزء من شخصيتي

اسفة غلست عليك كل ده
ومش قولتلك ان المدونة بتاعتك اصلا تحفة

re7ab.sale7 يقول...

هو انا قرأت البوست ده امتي....؟
طيب انا لية كل مرة ادخل عشان اعلق
التعليق يعاند
والا الاقيني ف مود مش حلو
والا هو البوست
والمجازفة
والتفكير
والا هو أنا...وأنا ...
عارفة ومش عارفة
مش عارفة
هو انت فهمت حاجة ...؟
لو فهمت يا تيمو ...يبقي اهنك واقولك صباحك ورد
ولو مش فهمت هقولك....
فكر..وجازف
و.....^-^.......... ايموشن ملخبط مشاعر

reemaas يقول...

هو انت ليه غايب كده وليه مش بتظهر:(

ana يقول...

برغم انهم فلمين بس حسيتهم احساس انسان واحد عشان ميموتش هدر لازم يغير الواقع وعشان يغير الواقع لازم يجازف ويبيع ويشترى وعشان يختار صح لازم يقدر اللى حواليه ويقدر الناس اللى بتحبه ويحفر اسمه جواهم...دايره :D
اسلوبك حلو اوى...تسلم

سكرتيرة جديدة يقول...

اهلا يا تيمو
مش عارفه ليه رغم قلة بوستاتك هنا
لكن فى حاجه شدانى للمدونة
يمكن لانى بحب احمد حلمي ؟
:)
اه بحبه عادي يعني ..بحبه زي اخويا بالظبط
:)

انا جازفت ..مرة ..اتنين ..اممممممم بيتهيقلى التالته كانت تابته
بعدها سبت الحياه تمشي بما قدر الله لها

بس يمكن المرة الاولى كانت اصعبهم ..واكثرهم واعمقهم تاثير فى تشكيل تفكيري

وان يكن ..ماحدش بيتعلم بالساهل
والمجازفة بتعلى نسبه الايدرينالين فى الدم .وبتعمل دمااااااااااااغ
:)

Timo.. يقول...

EL pRiNcEssA :
بس صدقيني البيع طبع..
والشراء..طبع..
وصعب نغير طبعنا..!!
وبعدين ايه اللخبطة اللي جواكِ دي كلها..؟؟ (';')

Timo.. يقول...

re7ab.sale7:
اييييييييه الخلاط اللي ضربتيني فيه ده يا ري..؟؟
وبعدين يا ستي...
صباحك ورد وقرنفل كمان :)

Timo.. يقول...

reemaas :
بأختفي عشان تسألي علي فا اقوم اظهر يا اجمل ري ماس :)

Timo.. يقول...

ana:
ساعات بنبيع...عشان (نشتري)
وكتير بنشتري.. عشان مش عرفنا (نبيع)..
ديما تعليقك مميز..
وديما مش بتيجي كتير..
وكده انا اللي (بأخسر) :)

Timo.. يقول...

سكرتيرة جديدة:
صدقيني ..ديما المجازفة تستاهل..
ولو حتى ها نكسب شرف التجربة.

وبعدين ياسكرتيرة انت دوختيني معاك عشان اعمل كومنت عندك لان المدونة بتاعتك مش بتقبل اي كومنت لدرجة اني بقالي 10 ايام بحاول..!!

reemaas يقول...

ههههههههههه طب انا هاجى اسال كل يوم:)

الغريب ان التدوينة لسه بتشد ناس ياخى
ده مش حسد على فكرة ده مجرد أر :P

Timo.. يقول...

reemaas:
طيب يا ري..
ها استناكِ كل يوم وعلى الله ما تجيش (';')

reemaas يقول...

كنت هنا
:)

آخر العنقــــــود يقول...

هى الدنيا كلها مكسب وخسارة
مفيش حد بيكسب كل حاجه او بيخسر كل حاجه

سعدت بالتعرف على مدونتك

--------

سؤال على الهامش..
"انا لا ادون لمجرد التدوين.."
لماذا تدون اذن؟!!

paix يقول...

مرحبا انا سلام من الاردن
قرأت كلامك وكتير عجبني ممكن نكون اصدقاء

Timo.. يقول...

reemaas:
هاااا...؟؟

Timo.. يقول...

آخر العنقود:
الدنيا فعلا مكسب وخسارة..
لكننا ديما بنسعى لذيادة المكسب.. وتقليل الخسارة.

انا لا ادون لمجرد التدوين يعني مش ها اكتب في يوم لمجرد اني ابقى باكتب بوستات وبس ولاني باهتم بتفاصيل كتير فا ديما باحترم اللي بيقرأ كلامي فا مش ها اكتب له اي كلام او يومياتي مثلا وخلاص (';')
نورتيني بوجودك .

Timo.. يقول...

Paix:
عجبني كلامك عن الذكريات ومقتنع انه الصفحات البيضاء اللي بتتحول لرمادية لازم نطويها ونكتب على صفحات جديدة بيضاء..
ده حق (الاخر) علينا :)
نورتيني بوجودك بمدونتي..
واكيد الصداقة شرف لي.

EL pRiNcEssA يقول...

هو انت لسه شفت لخبطة ياتيمو
انت مجتش عندي من زمان
ابقي عدي واتفررررررررررج ع اللخبطة
الموضوع الجديد بتاعك محتاج تركيز
صدقني هرجع واقراه

Eman يقول...

انا عمري ما بعت..لكن قررت ابيع النهاردة..
قررت..
النهاردة..
اني..
أبـيع..!!
i hope to do that one day at least gain peace of mind with my self for awhile & can deal with everyone in his way

mostafa behiry يقول...

السلام عليكم ورحمة الله وبركاته
مدونتك جميلة جدا
وأعجبتنى جدا
ونفسى مدونتى تبقى زى مدونتك رجاء مساعدتى
وده رابط المدونه
http://mostafabehiry.blogspot.com/